ކަނިފުށި އިންވެސްޓްމެންޓް ޕވޓ ލޓޑ ވ. ޔޮންސަން އިންޖިނިއަރިން ޕވޓ ލޓޑ

ނަތީޖާ: އިސްތިއުނާފު ބާޠިލް، ދަށުކޯޓުގެ ނިންމުން ޤާއިމް

ދަށު ކޯޓު: ސިވިލް ކޯޓު 144-B2-CR2/VM/2021/01

ކޯޓުން ނިންމަން ޖެހުނު ސުވާލު

ވަގުތީ އަމުރު މުރާޖަޢާކޮށް ނިންމި ނިންމުން އިސްތިއުނާފުކުރުމުގައި، އެ ނިންމުން ޤާނޫނާ ޚިލާފުކަމަށް ނުބުނެ، އަޞްލު ވަގުތީ އަމުރަށް އިޢުތިރާޟްކުރާ ނުކުތާތަކުގެ މައްޗަށް އިސްތިއުނާފު ކާމިޔާބުވާނެތޯ.

ކަނޑައެޅި ޤާނޫނީ އުޞޫލުތައް

1. ދަށުކޯޓަކުން ނުވަތަ ޓްރައިބިއުނަލަކުން ނިންމާ ނިންމުމެއް އިސްތިއުނާފުކުރެވޭނީ، އެ ނިންމުން ބިނާކުރެވިފައިވަނީ ޤާނޫނާ ޚިލާފަށްކަމަށް ނުވަތަ ޤާނޫނު ތަޠްބީޤުކުރުމުގައި ނުވަތަ މާނަކުރުމުގައި ކުށެއް ހެދިފައިވާކަމަށް ޤަބޫލުކުރެވޭ ސަބަބުތައް ހުރުމާއި، ނިންމުމަށް އަސަރުކުރި އިޖުރާއަތަކީ ބާޠިލް އިޖުރާއަތެއް ކަމުގައިވުން، މި 2 ޙާލަތުގައެވެ. (ޕެރ. 11)
2. ޤާނޫނީ ގޯހެއް، ހެކިތަކަށް ނުވަތަ ވާހަކަތަކަށް ރިޢާޔަތްނުކުރުމެއް، ޙައްޤު ގެއްލުމެއް ނުވަތަ އިންސާފަށް ހުރަސް އެޅުމެއް ހިނގާފައިވާކަމަށް ބުނާނަމަ، އެކަމުން އުފެދޭ ޤާނޫނީ ބަހުސަކީ ކޮބައިކަން އިސްތިއުނާފީ ނުކުތާގައި އިސްތިއުނާފުކުރާ ފަރާތުން ސާފުކޮށް ބުނަންވާނެއެވެ. (ޕެރ. 12)
3. ވަގުތީ އަމުރު މުރާޖަޢާކޮށް ނިންމި ނިންމުމެއް އިސްތިއުނާފުކުރާއިރު، އެ ނިންމުން ޝަރުޢީ ނުވަތަ ޤާނޫނީ އުޞޫލުތަކާ ޚިލާފުކަމަށް ބުނާ ނުކުތާއެއް ނެތި، އިސްތިއުނާފުނުކުރާ އަޞްލު ވަގުތީ އަމުރު ޤާނޫނާ ޚިލާފުކަމަށް ބުނާ ނުކުތާތަކާއި އެ އަމުރު ބާޠިލުކުރުމަށް އެދުމުގެ މައްޗަށް، މުރާޖަޢާގެ ނިންމުމަށް ބަދަލެއް ނުގެނެވޭނެއެވެ. (ޕެރ. 10، 13-14)

ބަލާފައިވާ ޤާނޫނުތައް

• ޤާނޫނު ނަންބަރު 22/2010 (ދިވެހިރާއްޖޭގެ ކޯޓުތަކުގެ ޤާނޫނު) ގެ 43 ވަނަ މާއްދާ
• ސުޕްރީމް ކޯޓުގެ 2019/SC-L/87 (ޝަމްސުލްމުނާ ވ. ހައުސިންގ ޑިވެލޮޕްމަންޓް ކޯޕަރޭޝަން، މައްސަލަ ބަލައިގަތުމާމެދު ނިންމިގޮތް) ގެ 10 ވަނަ ނަންބަރު