މުޙައްމަދު ރަފީޤު ވ. ފިކްރީ އިބްރާހީމް

ނަތީޖާ: ދަށުކޯޓަށް އަލުން ބެލުމަށް ފޮނުވި

ކީވޯޑުތައް: ތުރާފިލުވުން، އިންވަކިކުރުން

ދަށު ކޯޓު: ގއ. ވިލިނގިލި މެޖިސްޓްރޭޓް ކޯޓު 180/P2C/2020

ކޯޓުން ނިންމަން ޖެހުނު ސުވާލު

ދެގޯތީގެ އިމުގައި ހުރި ފާރެއް ތަޅާލުމަށް އަންގައި މެޖިސްޓްރޭޓް ކޯޓުން ކުރި ތުރާފިލުވުމުގެ ޙުކުމުގައި، ފާރު ރޭނި ފަރާތް ކަށަވަރުކުރީ އެކަށީގެންވާ ހެކިން ތޯއާއި، ޝަފަހީ ހެކި ބަލައިނުގަތުމާއި ހިބައިން ދިންއިރުގެ ރަޖިސްޓްރީ ނުބެލުމުން ޙުކުމަށް އަސަރުކުރޭތޯ.

ކަނޑައެޅި ޤާނޫނީ އުޞޫލުތައް

1. ފޮޓޯއެއްގައި ފެންނަ ގިފިއްޔެއް ކޮން ގޯއްޗެއްގެ ގިފިއްޔެއްކަން ހުށަހެޅުނު ލިޔެކިޔުންތަކުން ކަށަވަރުނުވާނަމަ، އެ ޑޮކިއުމަންޓަށް ބިނާކޮށް ޚިލާފު އުފެދިފައިވާ ފާރަކީ ވަކި ގޯއްޗެއްގެ ފާރެއްކަމަށް ކަނޑައެޅުމަކީ، އެ ވާޤިޢާ އެކަށީގެންވާ މިންވަރަށް ކަށަވަރުނުވަނީސް ކުރެވުނު ނިންމުމެކެވެ.
2. ވާޤިޢާއެއް ކިތާބީ ހެކިން ސާބިތުވާތީ ޝަފަހީ ހެކި ބަލައިނުގަތުމަށް ދަށުކޯޓުން ނިންމާފައިވާއިރު، ހުށަހެޅުނު ކިތާބީ ހެކިން އެ ވާޤިޢާ ސާބިތުނުވާނަމަ، ޝަފަހީ ހެކި ޙާޟިރުނުކުރުމަށް ނިންމި ސަބަބު ބާކީނުވާތީ، މައްސަލަ އަލުން ބެލުމުގައި އެ ހެކި ޙާޟިރުކުރުމާ މެދު ގޮތެއް ނިންމަންޖެހެއެވެ.
3. ފަރާތަކުން އެދުމުން ހިބައިން ގޯތި ދިންއިރުގެ ރަޖިސްޓްރީ ބަލައި ކަށަވަރުކުރާނެކަމަށް ޝަރީޢަތުން ބަޔާންކޮށްފައިވާއިރު، އެކަން ބަލާފައިވާކަން ޝަރީޢަތް ނިމުނުގޮތުގެ ރިޕޯޓުން ނޭނގޭނަމަ، އެއީ މައްސަލަ އަލުން ބަލަންޖެހޭ ކަމެކެވެ.
4. އިސްތިއުނާފުގެ މަރުޙަލާގައި އައު ހެކީގެ ގޮތުގައި ހުށަހަޅާ ލިޔެކިޔުމުން (ގޯތީގެ ކުރީގެ އަދި ފަހުގެ ރަޖިސްޓްރީތަކުގެ މިންތަކުގެ ތަފާތު) ފެންނަ ތަފާތެއް ކަށަވަރުކުރެވޭނީ ދެފަރާތަށްވެސް ބަސްބުނުމުގެ ފުރުޞަތު ލިބުމަށް ފަހުގައި ކަމަށް ބުރަވެވޭތީ، ސުޕްރީމް ކޯޓުގެ ގަލްފް ކްރާފްޓް ޤަޟިއްޔާގެ އުޞޫލުތަކާ އެއްގޮތަށް އެ ލިޔެކިޔުމަށް ރިޢާޔަތްކުރުމާ މެދު ގޮތެއް ނިންމުމަށް މައްސަލަ ދަށުކޯޓަށް ތަޙްވީލުކުރަމެވެ.

ބަލާފައިވާ ޤާނޫނުތައް

• ސުޕްރީމް ކޯޓުގެ ގަލްފް ކްރާފްޓް މޯލްޑިވްސް ޕްރައިވެޓް ލިމިޓެޑް ވ. އަކުއާ ސަން މޯލްޑިވްސް ޕްރައިވެޓް ލިމިޓެޑް ([2021] SC 16)
• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ 284 ވަނަ މާއްދާ