ެއެންޓި ކޮރަޕްޝަން ކޮމިޝަން ވ. ނަން ސިއްރުކުރެވިފައި

ނަތީޖާ: އިސްތިއުނާފު ބާޠިލް، ވަޒީފާއާބެހޭ ޓްރައިބިއުނަލްގެ ނިންމުން ޤާއިމް

ކީވޯޑުތައް: މަދަނީ، ވަޒީފާއާބެހޭ

ދަށު ކޯޓު: ވަޒީފާއާބެހޭ ޓްރައިބިއުނަލް 242/VTR/2020

ކޯޓުން ނިންމަން ޖެހުނު ސުވާލު

ވަޒީފާއާބެހޭ ޓްރައިބިއުނަލުން ނިންމުމެއް ނިންމުމުގައި ދިވެހިރާއްޖޭގެ ފަނޑިޔާރުންގެ ޤާނޫނުގެ 5(ށ) އާ ޚިލާފުވިކަމަށް ބުނެ އިސްތިއުނާފީ ނުކުތާއެއް ހުށަހެޅޭތޯއާއި، މުވައްޒަފު އަޚްލާޤީ މިންގަނޑާ ޚިލާފުވިކަން ސާބިތުނުވިކަމަށް ނިންމިއިރު ވަޒީފާއާބެހޭ ޤާނޫނުގެ 19(ނ) ގެ ކަންކަމަށް ޓްރައިބިއުނަލުން ރިޢާޔަތްކުރަންޖެހޭތޯ.

ޚުލާޞާ

ވާޤިޢާ: އެންޓި-ކޮރަޕްޝަން ކޮމިޝަނުގެ އިންޓެލިޖެންސް ޔުނިޓުގެ މުވައްޒަފަކު ތައްޔާރުކުރަމުންދިޔަ ޗާޓެއް ފޭސްބުކް ޕޭޖެއްގައި ލީކުވުމާ ގުޅިގެން، ސިއްރު ހިފެހެއްޓުމުގެ އެއްބަސްވުމާއި ކޮމިޝަނުގެ ގަވާއިދާ ޚިލާފުވިކަމަށް ބުނެ، މުވައްޒަފު އިންވެސްޓިގޭޝަން ޔުނިޓަށް ބަދަލުކޮށް އެކްސެސްތައް ކަނޑާލުމުގެ އިޞްލާޙީ ފިޔަވަޅު އެޅިއެވެ.

ދަށު ކޯޓުގެ ނިންމުން: ވަޒީފާއާބެހޭ ޓްރައިބިއުނަލުން ފިޔަވަޅަކީ އެކަށީގެންވާ ހަމައަކުން އެޅި ފިޔަވަޅެއް ކަމަށް ބުރަނުވެވޭތީ ވަޒީފާއާބެހޭ ޤާނޫނާއި ކޮމިޝަނުގެ ގަވާއިދާ ޚިލާފު ބާޠިލު ފިޔަވަޅެއް ކަމަށް ކަނޑައަޅައި، އެކަމާ ގުޅޭ ލިޔުންތައް ޕާސަނަލް ރެކޯޑުން އުނިކުރުމަށް އަމުރުކުރިއެވެ.

ޚަޞްމުންގެ ހުށަހެޅުންތައް: ކޮމިޝަނުން ބުނީ ޓްރައިބިއުނަލުން ފިޔަވަޅުގައި ޙަވާލާދިން އެއްބަސްވުން ނޫން އެހެން އެއްބަސްވުމަކަށް ބަލައި، ހެކިތަކަށް ރިޢާޔަތްނުކޮށް ފަނޑިޔާރުންގެ ޤާނޫނުގެ 5(ށ) އާ ޚިލާފަށް ނިންމި ކަމަށާއި، 19(ނ) ގެ ކަންކަމަށް ރިޢާޔަތްނުކުރި ކަމަށެވެ. މުވައްޒަފު ބުނީ ހުރިހާ ހެއްކަށް ރިޢާޔަތްކޮށްފައިވާ ކަމަށާއި، އަޚްލާޤީ މިންގަނޑާ ޚިލާފުވިކަން ސާބިތުނުވާތީ 19(ނ) ނުގުޅޭ ކަމަށެވެ.

ކޯޓުގެ ސަބަބުތައް: ޓްރައިބިއުނަލްގެ މެންބަރުން ފަނޑިޔާރުންގެ ޤާނޫނުގެ ދަށަށް ނުވަންނާތީ ފުރަތަމަ ނުކުތާއަކީ ކަމާ ނުގުޅޭ ނައްޞަކަށް ބިނާކުރި ނުކުތާއެއް ކަމަށާއި، މިންގަނޑާ ޚިލާފުވިކަން ސާބިތުނުވިކަމަށް ޓްރައިބިއުނަލުން ނިންމިއިރު 19(ނ) އަށް ރިޢާޔަތްކުރަންޖެހޭ ޙާލަތެއް ނެތުމާއި އެކަމުގައި ޤާނޫނީ ގޯހެއް އިސްތިއުނާފުކުރި ފަރާތަށް ދައްކާނުލެވުނުތީ، ޓްރައިބިއުނަލްގެ ނިންމުމަށް ބަދަލު ގެންނަން ސަބަބެއް ނެތްކަމަށް ކޯޓުން ނިންމިއެވެ.

ކަނޑައެޅި ޤާނޫނީ އުޞޫލުތައް

1. ދިވެހިރާއްޖޭގެ ފަނޑިޔާރުންގެ ޤާނޫނަކީ ފަނޑިޔާރުންގެ މަސްއޫލިއްޔަތުތަކާއި ބާރުތަކާއި ސުލޫކީ މިންގަނޑުތައް ބަޔާންކުރާ ޤާނޫނެއް ކަމަށާއި، އެ ޤާނޫނުގެ 3 ވަނަ މާއްދާގައިވާ ފަނޑިޔާރުންގެ މާނައިގައި ވަޒީފާއާބެހޭ ޓްރައިބިއުނަލްގެ މެންބަރުން ނުހިމެނޭތީ، ޓްރައިބިއުނަލުން ނިންމުމެއް ނިންމުމުގައި ފަނޑިޔާރުންގެ ޤާނޫނާ ޚިލާފުވިކަމަށް ބުނެ އިސްތިއުނާފީ ނުކުތާއެއް ނުހުށަހެޅޭނެއެވެ. (ޕެރ. 22)
2. ހުށަހެޅި ހެއްކާއި ޤަރީނާއަށް ނުބަލާ ނިންމިކަމަށް ޤަބޫލުކުރެވޭނަމަ އެކަން ބަޔާންކުރެވިދާނެ ކަމަށާއި، އެފަދަ ނުކުތާއެއް ހުށަހެޅުމުގައި ކޮންމެހެން ޤާނޫނަކަށް ޙަވާލާނުދިން ނަމަވެސް، ކަމާ ގުޅުމެއް ނެތް ބައެއްގެ ވާހަކަ ބަޔާންކުރާ ޤާނޫނީ ނައްޞަކަށް ޙަވާލާދިނުމަކީ ކުރެވޭނެ ކަމެއް ނޫނެވެ. (ޕެރ. 22)
3. ކަމާ ނުގުޅޭ ޤާނޫނީ ނައްޞަކަށް ބިނާކޮށް ހުށަހަޅާ ނުކުތާއަކީ އިސްތިއުނާފީ އޮޅިގަނޑު ގިރާކުރެވޭ ނުކުތާއެއް ނޫންކަމަށްވާތީ، އެއީ ހައިކޯޓުން ބަލައި ގޮތް ކަނޑައަޅަންޖެހޭ ނުކުތާއެއް ނޫނެވެ. (ޕެރ. 23)
4. ވަޒީފާއާބެހޭ ޤާނޫނުގެ 19 ވަނަ މާއްދާގެ (ހ) އިން މަސައްކަތުގެ އަޚްލާޤީ މިންގަނޑަށް ތަބާނުވާ މުވައްޒަފަކާ މެދު ފިޔަވަޅު އެޅުމުގެ ބާރު ވަޒީފާދޭ ފަރާތަށް ދީފައިވާއިރު، އެޅިދާނެ ފިޔަވަޅުތައް (ށ) ގައި ބަޔާންކޮށް، (ނ) ގައި ބަޔާންކުރަނީ އެޅި ފިޔަވަޅަކީ އެކަށީގެންވާ ފިޔަވަޅެއްތޯ ބެލުމުގައި ރިޢާޔަތްކުރަންޖެހޭ ކަންކަމެވެ. (ޕެރ. 25)
5. މުވައްޒަފު ކުރި ޢަމަލަކީ 19 ވަނަ މާއްދާގެ (ހ) ގެ މިންގަނޑުތަކާ ޚިލާފު ޢަމަލެއްކަން ވަޒީފާދޭ ފަރާތަށް ސާބިތުކޮށްދެވިފައި ނުވާކަމަށް ޓްރައިބިއުނަލުން ކަނޑައަޅާފައިވާ ޙާލަތުގައި، ފިޔަވަޅުގެ އެކަށީގެންވުމާ ބެހޭ 19 ވަނަ މާއްދާގެ (ނ) އަށް ރިޢާޔަތްކުރަންޖެހޭ ޙާލަތެއް ނުއުފެދެއެވެ. (ޕެރ. 26-27)

ބަލާފައިވާ ޤާނޫނުތައް

• ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 19 ވަނަ މާއްދާގެ (ހ)، (ށ) އަދި (ނ)
• ޤާނޫނު ނަންބަރު 13/2010 (ދިވެހިރާއްޖޭގެ ފަނޑިޔާރުންގެ ޤާނޫނު) ގެ 1 ވަނަ މާއްދާގެ (ށ)
• ޤާނޫނު ނަންބަރު 13/2010 (ދިވެހިރާއްޖޭގެ ފަނޑިޔާރުންގެ ޤާނޫނު) ގެ 3 ވަނަ މާއްދާ
• ޤާނޫނު ނަންބަރު 13/2010 (ދިވެހިރާއްޖޭގެ ފަނޑިޔާރުންގެ ޤާނޫނު) ގެ 5 ވަނަ މާއްދާގެ (ށ)
• 2019/HC-A/243 (މުޙައްމަދު ޙަސަން ވ. ސިވިލް ސަރވިސް ކޮމިޝަން)
• ސުޕްރީމް ކޯޓު: އިބްރާހީމް ޖިހާދު ވ. ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑް
• ސުޕްރީމް ކޯޓު: ޖުޑީޝަލް ސަރވިސް ކޮމިޝަން ވ. މުޙައްމަދު މާލިކު
• ސިވިލް ކޯޓު: އަޙްމަދު ނާފިޢު ވ. މޯލްޑިވްސް ޕޮލިސް ސަރވިސް