އަޙްމަދު މޫސާފުޅު ވ. ފާޠިމަތު ޒާހިރާ

ނަތީޖާ: ދަށުކޯޓުގެ ޙުކުމް ބާޠިލު؛ 1 އަހަރުގެ ކުލި އުނިކޮށް 18 މަހަށް -/162,000ރ. ދެއްކުމަށް ނިންމި

ދަށު ކޯޓު: ސިވިލް ކޯޓު 991/Cv-C/2022

ކޯޓުން ނިންމަން ޖެހުނު ސުވާލު

ކުއްޔަށް ހިފި ފަރާތަށް 1 އަހަރު ކުލި ނުހިނގާ ގޮތަށް ތަން ދީފައިވޭތޯ ކަނޑައެޅުމުގައި، ތަން ވެރިފަރާތުން ފޮނުވި ސިޓީތައް ހެކީގެ ގޮތުގައި ވަޒަންކުރުމުގައި ދަށުކޯޓުން ޤާނޫނީ ގޯހެއް ހަދާފައިވޭތޯ؛ އަދި ކުލި ދެއްކިކަން ސާބިތުކުރުމަށް ހުށަހެޅި ހެކިތަކަށް ރިޢާޔަތް ނުކުރިކަމަށް ބުނާ ނުކުތާ.

ކަނޑައެޅި ޤާނޫނީ އުޞޫލުތައް

1. އިސްތިއުނާފުގައި ބަލަނީ ވާޤިޢާތައް ކަށަވަރުކުރުމުގައި ދަށު މަރުޙަލާގައި ހުށަހެޅުނު ހެކި ޤަރީނާ ވަޒަންކުރުމުގައި ޤާނޫނީގޮތުން ގޯހެއް ހެދިފައިވޭތޯއެވެ.
2. ސިޓީ ފަދަ ލިޔުމަކުން ޤާއިމުކުރެވޭ އެއްބަސްވުމެއް މާނަކުރުމުގައި ވަޒަންކުރަންޖެހޭނީ ސުޕްރީމް ކޯޓުގެ ޕްރިމިއަރ ޕްރޮޕަޓީ މެނޭޖަރސް ޕްރައިވެޓް ލިމިޓެޑް ވ. މުޙައްމަދު އިބްރާހީމްމަނިކު ޤަޟިއްޔާގައި ކަނޑައެޅިފައިވާ އުޞޫލުންނެވެ؛ ސިޓީތަކުގެ ޢިބާރާތްތައް އެކުއެކީ ބަލައި، ކޮން ފަރާތަކުން އެދިގެން ކޮންކަމެއްގެ މުޤާބިލުގައި ދިން ކަމެއްކަން ދެނެގަންނަންވާނެއެވެ.
3. އެއްވެސް ކުއްޔަކާ ނުލައި ތަނެއް ދިނުމަކީ ބިޒްނަސް ކޮމަން ސެންސްއިން ބަލާއިރު ހަމަޖެހޭ ކަމަކަށް ނުވެދާނެ ނަމަވެސް، ސިޓީތައް އެކުއެކީ ބަލާއިރު އެއް އަހަރު ދެވިފައިވަނީ ކުއްޔަށް ހިފި ފަރާތުގެ އަމިއްލަ ތަކެތީގައި ކޮށްފައިވާ މަސައްކަތުގެ މުޤާބިލުގައިކަން ބަޔާންކޮށްފައިވާތީ، އަދި ތަން ވެރިފަރާތުން ކުރީގެ މައްސަލައެއްގައި ކުލި ހޯދަން އެދިފައިވަނީ އެ އަހަރަށްފަހުން ފެށިގެން ކަމަށްވާތީ، އެ އަހަރުގެ ކުލި ދަށުކޯޓުން ގުނުމުން އުނިކުރަންޖެހެއެވެ.
4. ދަށުކޯޓަށް ހުށަހެޅި ހެކިތަކަކީ ކުރީގެ މައްސަލައެއްގައިވެސް ހުށަހަޅައި، ޗެކްތަކާއި ބިލްތަކަކީ ކޮން މުޢާމަލާތެއްގެ ފައިސާކަން ނޭނގޭކަމަށް ކަނޑައެޅިފައިވާ ހެކިތަކެއްކަމަށް ދަށުކޯޓުން ފާހަގަކޮށްފައިވާއިރު، ހެކިތަކަށް ރިޢާޔަތް ނުކުރިކަމަށް ބުނާ ނުކުތާގައި އުފައްދާ ޤާނޫނީ ބަހުސް ސުޕްރީމް ކޯޓުގެ އިބްރާހީމް ޖިހާދު ވ. ހައުސިންގ ޑިވެލޮޕްމެންޓް ކޯޕަރޭޝަން ޤަޟިއްޔާގައި ބަޔާންކުރާ މިންވަރަށް ސާފުނުވާތީ އެ ނުކުތާ ޤަބޫލެއް ނުކުރެވެއެވެ.

ބަލާފައިވާ ޤާނޫނުތައް

• ސުޕްރީމް ކޯޓު: ޕްރިމިއަރ ޕްރޮޕަޓީ މެނޭޖަރސް ޕްރައިވެޓް ލިމިޓެޑް ވ. މުޙައްމަދު އިބްރާހީމްމަނިކު [2022] SC 60
• ސުޕްރީމް ކޯޓު: އިބްރާހީމް ޖިހާދު ވ. ހައުސިންގ ޑިވެލޮޕްމެންޓް ކޯޕަރޭޝަން ލިމިޓެޑް (2019/SC-L/91 'މައްސަލަ ބަލައިގަތުމާމެދު ނިންމި ގޮތުގެ ރިޕޯޓު')
• ސިވިލް ކޯޓުގެ 1846/Cv-C/2020 (ދެފަރާތުގެ ކުރީގެ މައްސަލަ)