ކެޕިޓަލް ޓްރެވަލް ޓުއަރސް ޕްރައިވެޓް ލިމިޓެޑް ވ. މުޙްސިނާ އާދަމްފުޅު

ނަތީޖާ: އަލުން ބެލުމަށް ފޮނުވި

ކީވޯޑުތައް: ވަޒީފާއާބެހޭ، ތަހުވީލުކުރުން

ދަށު ކޯޓު: ވަޒީފާއާބެހޭ ޓްރައިބިއުނަލް 199/VTR/2020

ކޯޓުން ނިންމަން ޖެހުނު ސުވާލު

ވަޒީފާދޭ ފަރާތުން ޓްރައިބިއުނަލުގައި ހުށަހެޅި (މުވައްޒަފު ގެންދިޔަ ފޯނާއި ސިމްކާޑުގެ އަގު އުނިކުރުމާއި ނޯޓިސް ނުދީ ވަޒީފާ ދޫކުރުމުގެ ގެއްލުމުގެ ބަދަލު) އެދުންތަކާމެދު ޓްރައިބިއުނަލުން ގޮތެއް ނުނިންމާ ހުރުމުން، އެ ކަންކަމާމެދު ހައިކޯޓުން އިސްތިއުނާފީ މަރުޙަލާގައި ގޮތެއް ކަނޑައެޅޭނެތޯ.

ޚުލާޞާ

ވާޤިޢާ: ކުންފުނީގެ މުވައްޒަފަކު މެނޭޖްމަންޓާ ޚިޔާލު ތަފާތުވުމުން ނޯޓިސް ނުދީ އިސްތިޢުފާދީ، ކުންފުނީގެ މޯބައިލް ފޯނާއި ސިމްކާޑާއެކު ދިޔައެވެ. އޭނާ ބަދަލާއި ނުލިބިވާ އަހަރީ ޗުއްޓީގެ ފައިސާއަށް ޓްރައިބިއުނަލަށް ދިޔައެވެ.

ދަށު ކޯޓުގެ ނިންމުން: ޓްރައިބިއުނަލުން ބަދަލު ނުދީ، ފަހު އަހަރުގެ ބޭނުންނުކުރާ 30 ދުވަހުގެ ޗުއްޓީއަށް 17,500 ރުފިޔާ ދިނުމަށް ނިންމިއެވެ.

ޚަޞްމުންގެ ހުށަހެޅުންތައް: ކުންފުނި ބުނީ ފޯނާއި ސިމްކާޑުގެ އަގާއި ނޯޓިސް ނުދީ ދިއުމުގެ ގެއްލުމާމެދު ޓްރައިބިއުނަލުން ގޮތެއް ނުނިންމާ ފައިސާ ދިނީ އިންޞާފާ ޚިލާފަށް ކަމަށެވެ. މުވައްޒަފު ބުނީ ފޯނަކީ ހަދިޔާއެއް ކަމަށާއި ޗުއްޓީގެ ފައިސާ ދިނުމުން ފޯނު ދޭނެކަމަށެވެ.

ކޯޓުގެ ސަބަބުތައް: އެ އެދުންތައް ޓްރައިބިއުނަލުގައި ހުށަހެޅި ނަމަވެސް ޓްރައިބިއުނަލުން ގޮތެއް ނުނިންމާތީ، އެއީ ޓްރައިބިއުނަލުން ނިންމަންޖެހޭ ކަންކަމެވެ؛ އިސްތިއުނާފީ މަރުޙަލާގައި ހައިކޯޓުން ނުނިންމޭނެއެވެ.

ކަނޑައެޅި ޤާނޫނީ އުޞޫލުތައް

1. ހައިކޯޓުން މައްސަލަތައް ބަލަނީ ދަށުކޯޓުގައި ހުށަހެޅި ހެކިތަކާއި ދިފާޢުތައް އަސާސްކޮށް ކަމާއި، ދަށުކޯޓުގައި ނުބެލި ކަންކަން ހުރިކަން ފާހަގަކުރެވި އަލުން ބެލުމުގެ މަޞްލަޙަތު ބޮޑުނަމަ، ބަލަންޖެހޭ ޤާނޫނީ އުޞޫލުތައް ކަނޑައަޅައި މައްސަލަ ދަށުކޯޓަށް ނުވަތަ ޓްރައިބިއުނަލަށް ތަޙުވީލުކުރެވިދާނެއެވެ. (ޕެރ. 13-14)
2. ތަޙުވީލުކުރާ މައްސަލައެއް ދަށުކޯޓުން ބަލަންވާނީ ހައިކޯޓުން ޙުކުމްކުރި ނުކުތާގެ ތަރަހައިގެ ތެރެއިން ކަމާއި، މައްސަލައިގެ ބައެއް ތަޙުވީލުކުރެވިއްޖެނަމަ ތަޙުވީލުނުކުރާ ބައިގެ ޙުކުމް ދެމިއޮންނާނެއެވެ. (ޕެރ. 14)
3. ފުރަތަމަ މަރުޙަލާގެ ކޯޓުން ފައިޞަލާކުރަންވާނީ ޚަޞްމުން ހުށަހަޅާ ވާޤިޢާތަކަށް ބިނާކޮށް ފައިޞަލާކުރުމަށް އެދިފައިވާ ކަންތައްތަކެވެ. (ޕެރ. 15)
4. ފަރާތެއް ޓްރައިބިއުނަލުގައި ހުށަހަޅައި ވާހަކަ ދެކެވުނު ނަމަވެސް ޓްރައިބިއުނަލުން ގޮތެއް ނުނިންމާ ހުރި އެދުންތަކަކީ ޓްރައިބިއުނަލުން ގޮތެއް ކަނޑައަޅަންޖެހޭ ކަންކަން ކަމުން، އިސްތިއުނާފީ މަރުޙަލާގައި ހައިކޯޓުން އެކަންކަމާމެދު ފުރަތަމަ ފަހަރަށް ގޮތެއް ނުކަނޑައެޅޭނެއެވެ. (ޕެރ. 16-17)

ބަލާފައިވާ ޤާނޫނުތައް

• ޤާނޫނު ނަންބަރު 22/2010 (ދިވެހިރާއްޖޭގެ ކޯޓުތަކުގެ ޤާނޫނު) ގެ 46 ވަނަ މާއްދާ (ހ)، (ށ)
• ޤާނޫނު ނަންބަރު 22/2010 ގެ 32 ވަނަ މާއްދާ (ހ)، (ނ) އަދި 47 ވަނަ މާއްދާ (ހ)، (ށ) (ފުޓްނޯޓުގައި)
• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ 268 ވަނަ މާއްދާ އަދި 284 ވަނަ މާއްދާ (ހ)، (ށ)، (ނ)، (ރ)
• ސުޕްރީމް ކޯޓުގެ ޕްރެކްޓިސް ޑައިރެކްޝަން SCPD-11/2021
• 2013/SC-A/44
• 2022/SC-A/54