ފުތިޙަ ޝާކިރު

ނަތީޖާ: ރަޖިސްޓްރާރގެ ނިންމުމާއި މުރާޖަޢާގެ ނިންމުން ބާޠިލު؛ ފޯމު ބަލައިގަތުމަށް އަމުރު

ދަށު ކޯޓު: ވަޒީފާއާބެހޭ ޓްރައިބިއުނަލް 3918/2023

ކޯޓުން ނިންމަން ޖެހުނު ސުވާލު

ޝަކުވާ ހުށަހަޅަން އޮތް ފަހު ދުވަސް ރަސްމީ ބަންދު ދުވަހަކާ ދިމާވެ، ވިދިގެން އައި ރަސްމީ ދުވަހު ރަސްމީ ގަޑި ފާއިތުވުމަށްފަހު އީމެއިލުން ހުށަހެޅި މައްސަލައަކީ ވަޒީފާއާބެހޭ ޤާނޫނުގެ 28 (ހ) ގެ މުއްދަތުގެ ތެރޭގައި ހުށަހެޅި މައްސަލައެއް ކަމަށް ބެލެވޭނެތޯ؟

ކަނޑައެޅި ޤާނޫނީ އުޞޫލުތައް

1. ވަޒީފާއާބެހޭ ޤާނޫނުގެ 28 (ހ) ގެ ދަށުން، އެކަށީގެންވާ ސަބަބެއްނެތި ވަކިކުރި ކަމަށް ބުނެ ޓްރައިބިއުނަލަށް ޝަކުވާ ހުށަހެޅޭނެ މުހުލަތަކީ ވަކިކުރި ތާރީޚުން ފެށިގެން ތިންމަސް ދުވަހެވެ؛ މުއްދަތު ގުނަންވާނީ މާނަކުރުމުގެ ހަމަތައް ބަޔާންކުރުމުގެ ޤާނޫނުގެ 35 (ހ) ގެ ހަމަތަކާ އެއްގޮތަށެވެ. (ޕެރ. 13-14)
2. ވަކިކަމެއް ކުރަން އޮތް އެންމެފަހު ތާރީޚު ރަސްމީ ބަންދު ދުވަހަކާ ދިމާވެއްޖެނަމަ، 35 (ށ) ގެ ދަށުން ވިދިގެން އަންނަ ރަސްމީ ބަންދުނޫން ދުވަހު އެކަން ކުރެވިދާނެއެވެ. (ޕެރ. 15)
3. މާނަކުރުމުގެ ހަމަތައް ބަޔާންކުރުމުގެ ޤާނޫނުގެ 3 ވަނަ މާއްދާގެ ދަށުން ބަސްތަކުގެ އާންމު މާނައަށް އިސްކަންދޭން ޖެހޭތީ، 'ދުވަސް' ގެ އާންމު މާނައަކީ 24 ގަޑިއިރުގެ ވަގުތެވެ؛ އެހެންކަމުން 35 (ށ) ގެ ދަށުން ލިބޭ ފުރުސަތު އުޞޫލެއްގެ ގޮތުން އެ ދުވަހުގެ ރޭގަނޑު 12 ޖެހުމާ ހަމައަށް ދެމިދެއެވެ؛ ނަމަވެސް ކޮންމެ ކަމެއްގައި ފުރުސަތު ނިމޭ ވަގުތު ކަނޑައެޅޭނީ އެކަމުގެ ޒާތާއި ވަސީލަތާއި ކަމާބެހޭ އިދާރާގެ އުޞޫލުތަކަށް ބަލައިގެންނެވެ. (ޕެރ. 19-22)
4. ޓްރައިބިއުނަލުގެ ގަވާއިދުގެ 17 (ށ) ގައިވާ ގޮތަށް ފޯމު ހުށަހެޅޭ 4 ގޮތުގެ ތެރެއިން ސީދާ ޓްރައިބިއުނަލަށް ހުށަހަޅާނަމަ ހުޅުވާފައިވާ ގަޑީގައި ހުށަހަޅަންޖެހޭނެ ނަމަވެސް، މެޖިސްޓްރޭޓް ކޯޓު، ރަޖިސްޓަރޑް ޕޯސްޓް ނުވަތަ އީމެއިލް މެދުވެރިކޮށް ހުށަހެޅުމަކީ ޓްރައިބިއުނަލް ހުޅުވާފައިވާ ގަޑިއާ ގުޅުމެއް އޮތް ކަމެއް ނޫނެވެ؛ އީމެއިލުން ކުރެވޭ ކަމެއް ދުވަސް ނިމުމުގެ ފަހު ސިކުންތާ ހަމައަށް ކުރެވިދާނެއެވެ. (ޕެރ. 24-27)
5. އިދާރީ ބޭނުމަށް ލިޔުމެއް އެންޓްރީކުރާ ތާރީޚަކީ، މައްސަލަ މުއްދަތުގެ ތެރޭގައި ހުށަހެޅިތޯ ބެލުމުގައި ހުށަހެޅި ތާރީޚު ނޫނެވެ؛ ރަޖިސްޓަރޑް ޕޯސްޓުންނަމަ ޕޯސްޓްކުރި ތާރީޚު، މެޖިސްޓްރޭޓް ކޯޓުންނަމަ އެ ކޯޓާ ހަވާލުކުރި ތާރީޚު، އީމެއިލުންނަމަ އީމެއިލްކުރި ތާރީޚު ހުށަހެޅި ތާރީޚު ކަމުގައި ބަލަންޖެހޭނެއެވެ. (ޕެރ. 28)
6. އެހެންކަމުން ފަހު ދުވަހު ރަސްމީ ގަޑި ފާއިތުވުމަށްފަހު، އެ ދުވަސް ފާއިތުވުމުގެ ކުރިން، ގަވާއިދުގައިވާ ވަސީލަތަކުން ހުށަހެޅި ފޯމަކީ އެ ދުވަހު ހުށަހެޅި ފޯމެކެވެ. (ޕެރ. 29)

ބަލާފައިވާ ޤާނޫނުތައް

• ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 28 ވަނަ މާއްދާގެ (ހ)
• ޤާނޫނު ނަންބަރު 4/2011 (މާނަކުރުމުގެ ހަމަތައް ބަޔާންކުރުމުގެ ޤާނޫނު) ގެ 3 ވަނަ މާއްދާގެ (ހ) އާއި (ނ)، 35 ވަނަ މާއްދާގެ (ހ) އާއި (ށ)
• ގަވާއިދު ނަންބަރު R-14/2022 (ވަޒީފާއާބެހޭ ޓްރައިބިއުނަލްގެ ގަވާއިދު) ގެ 8 ވަނަ މާއްދާގެ (ހ)، 17 ވަނަ މާއްދާގެ (ހ) އާއި (ށ)، 26 ވަނަ މާއްދާގެ (ނ)
• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ 284 ވަނަ މާއްދާގެ (ހ)، (ށ)، (ނ)