ހައުސިންގ ޑިވެލޮޕްމަންޓް ކޯޕަރޭޝަން ވ. ފުތިޙަ ޝާކިރު

ނަތީޖާ: ހައިކޯޓުގެ ޙުކުމް ބާޠިލު، ވަޒީފާއާބެހޭ ޓްރައިބިއުނަލުގެ ނިންމުން ޤާއިމް

ކޯޓުން ނިންމަން ޖެހުނު ސުވާލު

ވަޒީފާއާބެހޭ ޤާނޫނުގެ 28 ވަނަ މާއްދާގެ (ހ) ގައިވާ ތިން މަސް ދުވަހުގެ މުއްދަތު ގުނާނެ ގޮތަކީ ކޮބައިތޯއާއި، މުއްދަތުގެ އެންމެ ފަހު ދުވަހު ރަސްމީ ގަޑި ނިމުމަށްފަހު (14:11 ގައި) އީމެއިލް މެދުވެރިކޮށް ޓްރައިބިއުނަލަށް ހުށަހަޅާ މައްސަލައަކީ މުއްދަތުގެ ތެރޭގައި ހުށަހެޅި މައްސަލައެއްކަމުގައި ބެލެވޭނެތޯ.

ކަނޑައެޅި ޤާނޫނީ އުޞޫލުތައް

1. ވަޒީފާއާބެހޭ ޤާނޫނުގެ 28 ވަނަ މާއްދާގެ (ހ) ގައި މުއްދަތު ގުނުމުގައި ވަޒީފާއިން ވަކިކުރާ ތާރީޚާއި މުއްދަތު ހަމަވާ ތާރީޚް ހިމަނާނެކަން ސާފުނޫންކަމަށާއި، މާނަކުރުމުގެ ހަމަތައް ބަޔާންކުރުމުގެ ޤާނޫނުގެ 35 ވަނަ މާއްދާގެ (ހ) އާ އެއްގޮތަށް އެ ދެ ދުވަސް ނުގުނައި ތިން މަސް ގުނުމަކީ މައްސަލަ ހުށަހަޅާ ފަރާތަށް އެ ޙައްޤު އެންމެ ފުޅާ މިނުގައި ލިބިދޭ މާނަކުރުމެއް ކަމަށާއި، އެގޮތަށް މާނަކުރުން ޤާނޫނީ ގޮތުން ގޯސްވާ ސަބަބެއް ނެތް. (ޕެރ. 15)
2. ވަޒީފާއާބެހޭ ޤާނޫނުގައި "މަސް" މާނަކޮށްފައިނުވާއިރު، މާނަކުރުމުގެ ހަމަތައް ބަޔާންކުރުމުގެ ޤާނޫނުގެ 3 ވަނަ މާއްދާގެ (ހ) އާއި 11 ވަނަ މާއްދާގެ (ށ) އަށް ރިޢާޔަތްކޮށް ދިވެހިބަހުގެ ރަދީފަށް ބަލާއިރު، މުއްދަތު ގުނުމުގައި މަސް ދުވަސް ބަލާނީ އޭގެ އާންމު މާނަކަމުގައިވާ 30 ދުވަސް ކަމުގައެވެ؛ އެކި މަސްތަކުގެ ދުވަހުގެ ޢަދަދު ތަފާތުވާތީ، މައްސަލަ ހުށަހަޅާ ފަރާތްތަކަށް ހަމަހަމަކޮށް މުއްދަތު ލިބޭނީ މަސް 30 ދުވަހުގެ ގޮތުގައި ގުނުމުންނެވެ. (ޕެރ. 18–20)
3. މައްސަލަ ހުށަހެޅުމުގެ އެންމެ ފަހު ދުވަހަކީ ސަރުކާރު ބަންދު ދުވަހަކަށް ވާނަމަ، މާނަކުރުމުގެ ހަމަތައް ބަޔާންކުރުމުގެ ޤާނޫނުގެ 35 ވަނަ މާއްދާގެ (ށ) ގެ ދަށުން އެންމެ ފަހު ދުވަހަކަށް ވާނީ އޭގެ ފަހުން ވިދިގެން އަންނަ ރަސްމީ ބަންދު ނޫން ދުވަހެވެ. (ޕެރ. 21)
4. ވަޒީފާއާބެހޭ ޤާނޫނުން ވަކިކުރި ތާރީޚުން ފެށިގެން ވަކި މުއްދަތެއްގައި މައްސަލަ ހުށަހެޅުމުގެ ޙައްޤު ދީފައިވާއިރު، މާނަކުރުމުގެ ހަމަތައް ބަޔާންކުރުމުގެ ޤާނޫނުގެ 35 ވަނަ މާއްދާގެ (ރ) ގައި ވަގުތު ބަލާނީ ދިވެހިރާއްޖޭގެ ރަސްމީ ގަޑީގައި ކަމަށް އޮތުމުން، އެ މުއްދަތަކީ ރަސްމީ ގަޑީގައި އޮންނަ ފުރުޞަތެއް ކަމުގައި ބަލަންޖެހޭނެއެވެ. (ޕެރ. 29)
5. ޓްރައިބިއުނަލަށް ނުވަތަ މެޖިސްޓްރޭޓް ކޯޓަށް މައްސަލަ ހުށަހެޅުމުގެ އެންމެ ފަހު ވަގުތަކީ ރަސްމީ ގަޑީގެ ވަގުތު (08:00 ން 14:00) ކަމަށްވާއިރު، އީމެއިލް މެދުވެރިކޮށް ހުށަހަޅާނަމަ ދުވަސް ނިމޭ ވަގުތާ ހަމައަށް ފުރުޞަތު ލިބޭނެކަމަށް މާނަކުރުމަކީ 35 ވަނަ މާއްދާގެ (ރ) އާ ޚިލާފު މާނަކުރުމެކެވެ؛ ވަކި މީޑިއަމަކުން މައްސަލަ ހުށަހަޅަން ނިންމުމުގެ ސަބަބުން އެ ފަރާތަށް ވަގުތު ގިނަވާގޮތަށް މާނަކުރެވިދާނެކަމަށް ނުދެކެވެއެވެ. (ޕެރ. 30–31)
6. މުއްދަތުގެ އެންމެ ފަހު ދުވަހު ރަސްމީ ގަޑި ނިމުމަށްފަހު ހުށަހަޅާ މައްސަލައަކީ ވަޒީފާއާބެހޭ ޓްރައިބިއުނަލަށް ބެލުމުގެ އިޚްތިޞާޞް ލިބިގެންނުވާ މައްސަލައެއް ކަމަށް ޓްރައިބިއުނަލުން ނިންމުމަކީ ޤާނޫނީ އުޞޫލުތަކާ އެއްގޮތް ނިންމުމެކެވެ. (ޕެރ. 32)

ބަލާފައިވާ ޤާނޫނުތައް

• ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 28 ވަނަ މާއްދާގެ (ހ)
• ޤާނޫނު ނަންބަރު 4/2011 (މާނަކުރުމުގެ ހަމަތައް ބަޔާންކުރުމުގެ ޤާނޫނު) ގެ 3 ވަނަ މާއްދާގެ (ހ)
• ޤާނޫނު ނަންބަރު 4/2011 (މާނަކުރުމުގެ ހަމަތައް ބަޔާންކުރުމުގެ ޤާނޫނު) ގެ 11 ވަނަ މާއްދާގެ (ށ)
• ޤާނޫނު ނަންބަރު 4/2011 (މާނަކުރުމުގެ ހަމަތައް ބަޔާންކުރުމުގެ ޤާނޫނު) ގެ 35 ވަނަ މާއްދާގެ (ހ)، (ށ) އަދި (ރ)
• ވަޒީފާއާބެހޭ ޓްރައިބިއުނަލްގެ ގަވާއިދު (ގަވާއިދު ނަންބަރު 2022/R-14) ގެ 8 ވަނަ މާއްދާގެ (ހ)، 17 ވަނަ މާއްދާ އަދި 26 ވަނަ މާއްދާގެ (ނ)