ސުލްޠާނާ އަޙްމަދު ވ. މުޙައްމަދު ޝަރީފް އަދި މުޙައްމަދު ސަޢީދު

ނަތީޖާ: އިސްތިއުނާފު ބާޠިލް، ދަށުކޯޓުގެ ނިންމުން ޤާއިމް

ދަށު ކޯޓު: ސިވިލް ކޯޓު 144-B8/VN/2024/01

ކޯޓުން ނިންމަން ޖެހުނު ސުވާލު

ކުލީގެ އެއްބަސްވުން ނިމި ތަޅުދަނޑިތައް ޙަވާލުކުރުމަށްފަހު، އެޕާޓްމަންޓްތައް ހުސްކޮށް ވެރިފަރާތާ ޙަވާލުކުރުމަށް ސްޓޭޓަސް ކުއޯ ދެމެހެއްޓުމުގެ ނަމުގައި އެދުނު ވަގުތީ އަމުރު ނުނެރުމަށް ސިވިލް ކޯޓުން ނިންމުމުގައި، ސުޕްރީމް ކޯޓުގެ 2023/SC-A/28 ގެ އުޞޫލުތަކާއި ބެލެންސް އޮފް ކޮންވީނިއަންސް ޓެސްޓާ ޚިލާފުވެފައިވޭތޯ.

ކަނޑައެޅި ޤާނޫނީ އުޞޫލުތައް

1. ވަގުތީ އަމުރަށް އެދޭ ފަރާތަށް ވަގުތީ ފަރުވާއެއް ދީ ޙިމާޔަތްކޮށް ދަމަހައްޓަންޖެހޭ ޙައްޤެއް އޮތްތޯ ކޯޓުން ބަލަންޖެހެއެވެ. (ޕެރ. 31)
2. ސްޓޭޓަސް ކުއޯ ދެމެހެއްޓުމުގެ އުޞޫލު (2023/SC-A/28) ބޭނުންކޮށްގެން ދެފަރާތުގެ ދެމެދު އެއްބަސްވުން ހެދުމުގެ ކުރިން އޮތް ޙާލަތަށް ރުޖޫޢުކޮށްދިނުމަށް އެދުމަކީ، އެ އުޞޫލު ތަޠުބީޤުކުރަންޖެހޭ ޤާނޫނީ ހަމައެއް ނޫނެވެ. (ޕެރ. 33)
3. އެއްބަސްވުން ނިމި ތަޅުދަނޑިތައް ވެރިފަރާތާ ޙަވާލުކޮށްފައިވާކަން ލިޔެކިޔުމުން މަތިމަތިން ފެންނަ ހާލަތުގައި، ދަޢުވާ ރައްދުވާ ފަރާތުގެ ބެލުމުގެ ދަށުގައި ތަން އޮތްކަމަށް ހެއްކެއް ނުވަތަ ޤަރީނާއެއް ނެތި، އެ ފަރާތަށް ތަން ހުސްކޮށް ޙަވާލުކުރުމަށް ވަގުތީ އަމުރެއް ނުނެރެވޭނެއެވެ. (ޕެރ. 30، 32)
4. ބެލެންސް އޮފް ކޮންވީނިއަންސްގެ ދަށުން ވަގުތީ އަމުރެއް ނެރެވިދާނީ، އަމުރު ނުނެރެފިނަމަ ލިބޭ ގެއްލުން އަމުރު ނެރެފިނަމަ ލިބޭ ގެއްލުމަށްވުރެ ބޮޑުނަމައެވެ؛ ވަގުތީ އަމުރު ނެރެންޖެހޭ ޙާލަތެއް އޮތްކަމާއި އިޢާދަ ނުކުރެވޭނެ ގެއްލުމެއް އޮތްކަން އަމުރަށް އެދޭ ފަރާތުން ދައްކުވައިދޭންޖެހެއެވެ. (ޕެރ. 34-35)
5. މައްސަލައިގެ ފަރާތެއް ނޫން، ތަނުގައި އުޅޭކަމަށް ބުނާ މީހުންގެ ބަސް އެހުމަކާ ނުލައި ނުވަތަ ބަސް ބުނުމުގެ ފުރުޞަތު ނުދީ އެ މީހުން ތަނުން ނެރުމަށް ނެރޭ ވަގުތީ އަމުރަކީ ޠަބީޢީ އިންޞާފުގެ ހަމަތަކާ ޚިލާފު އަމުރެކެވެ. (ޕެރ. 34)

ބަލާފައިވާ ޤާނޫނުތައް

• ސުޕްރީމް ކޯޓުގެ 2023/SC-A/28 (އެޓަރނީ ޖެނެރަލްގެ އޮފީސް (ދައުލަތް) ވ. މާލެ ހައި ޕްރައިވެޓް ލިމިޓެޑް)