ހެވީލޯޑް މޯލްޑިވްސް ޕްރައިވެޓް ވ. ބޭންކް އޮފް މޯލްޑިވްސް

ނަތީޖާ: ރަހުނު ވިއްކާލުމުގެ ހުއްދަ ބާޠިލު، ގަވާއިދާ އެއްގޮތަށް ތަންފީޛީ މައްސަލަ ކުރިއަށް ގެންދިއުމަށް ސިވިލް ކޯޓަށް އެންގި

ދަށު ކޯޓު: ސިވިލް ކޯޓު 3399/Cv-C/2020

ކޯޓުން ނިންމަން ޖެހުނު ސުވާލު

ޝަރުޢީ އަގުކޮމިޓީން ރަހުނު މުދާ އަގުކުރުމަކާ ނުލައި، ރަހުނު ހިފި ފަރާތުން ހުށަހެޅި އަގަށް ބަލައި، ގިނަ ރަށެއްގެ ރަހުނުން ވިއްކާނެ ތަރުތީބެއް ކަނޑައެޅުމެއް ނެތި ސިވިލް ކޯޓުން ރަހުނު ވިއްކާލުމުގެ ހުއްދަ ދިނުމަކީ ސިވިލް ކޯޓުގެ މަދަނީ އިޖުރާއަތުގެ ގަވާއިދުގެ 160 އާއި 162 ވަނަ މާއްދާއާ އެއްގޮތް ކަމެއްތޯ.

ކަނޑައެޅި ޤާނޫނީ އުޞޫލުތައް

1. ސިވިލް ކޯޓުގެ މަދަނީ އިޖުރާއަތުގެ ގަވާއިދުގެ 162 ވަނަ މާއްދާގެ (ޅ) އާއި 160 ވަނަ މާއްދާ އެކުގައި ކިޔުމުން، ރަހުނު ވިއްކާލުމުގެ ހުއްދަ ދިނުމުގެ ކުރިން ރަހުނު މުދަލުގެ އެއިރުގެ އަގު 160 ވަނަ މާއްދާގައިވާ ގޮތުގެ މަތިން ކަނޑައަޅަން ޖެހެއެވެ؛ ދެފަރާތް އަގަށް ނުވަތަ ތިންވަނަ ފަރާތަކަށް އެއްބަސްނުވާނަމަ ޝަރުޢީ އަގުކޮމިޓީ މެދުވެރިކޮށް އަގު ހޯދަން ޖެހެއެވެ. (ޕެރ. 18-19)
2. އެއް މުޢާމަލާތަކާ ގުޅިގެން އެއް މުދަލަށްވުރެ ގިނަ މުދާ ރަހުނުކުރެވިފައިވާނަމަ، ވިއްކުމުގެ ހުއްދަ ދޭނެ މުދަލާއި ވިއްކުމުގައި އިސްކަންދޭނެ ތަރުތީބު ކަނޑައަޅަން ޖެހޭނެ ކަމަށާއި، ފުރަތަމަ ވިއްކުމަށް ހުއްދަ ދޭންވާނީ ދަރަނި އަދާކުރެވޭނެ މިންވަރުގެ އަގު ހުރިކަމަށް ޤަބޫލުކުރެވޭ މިންވަރަށްވާ މުދަލެވެ. (ޕެރ. 20-21)
3. ޝަރުޢީ އަގުކޮމިޓީގެ އަގުކުރުން ލަސްވީ ރަހުނު ބެހެއްޓި ފަރާތުގެ އިހުމާލަކުން ކަމަށް ބަޔާންނުކޮށް، ރަހުނު ހިފި ފަރާތުގެ އަގަށް ބަލައި، ވިއްކާނެ ތަރުތީބެއް ކަނޑައެޅުމެއް ނެތި ރަހުނު ވިއްކުމުގެ ހުއްދަ ދިނުމަކީ 162 ވަނަ މާއްދާގެ (ޅ) އާއި (ބ) އާ ޚިލާފު ނިންމުމެކެވެ. (ޕެރ. 26)
4. ޚަޞްމުންގެ އިހުމާލެއް ނެތި ޝަރުޢީ އަގުކޮމިޓީން އަގުކުރުމުގައި ލަސްވާނަމަ، ކޯޓުން ކުރަންޖެހޭނީ އެ މަސައްކަތް އަވަސްކުރުވުމަށް ފިޔަވަޅު އެޅުމެވެ؛ އިޖުރާއަތު ފުރިހަމަނުކޮށް ރަހުނު ވިއްކާލުމުގެ ހުއްދަ ދިނުމަކީ ރަނގަޅު ގޮތެއް ނޫނެވެ. (ޕެރ. 27)

ބަލާފައިވާ ޤާނޫނުތައް

• ގަވާއިދު ނަންބަރު 2022/R-105 (ސިވިލް ކޯޓުގެ މަދަނީ އިޖުރާއަތުގެ ގަވާއިދު) ގެ 160 ވަނަ މާއްދާގެ (ހ) (4)، (6) އަދި (ށ)
• ގަވާއިދު ނަންބަރު 2022/R-105 (ސިވިލް ކޯޓުގެ މަދަނީ އިޖުރާއަތުގެ ގަވާއިދު) ގެ 162 ވަނަ މާއްދާގެ (ބ) އަދި (ޅ)