ޢާއިޝަތު ޝާދިޔާ ވ. ޕްރޮސިކިއުޓަރ ޖެނެރަލް

ނަތީޖާ: ކްރިމިނަލް ކޯޓުގެ ބަންދުގެ އަމުރު ބާޠިލު؛ ގެއްލުމުގެ ބަދަލު ނަގައިދިނުމަށް އެދުން ބާޠިލު

ދަށު ކޯޓު: ކްރިމިނަލް ކޯޓު 145-J/MA/2024/1949

ކޯޓުން ނިންމަން ޖެހުނު ސުވާލު

ޞުލްޙަވެރިކަމާއެކު އެއްވެއުޅުމާ ގުޅޭ ތުހުމަތުގައި ބަންދުގެ މުއްދަތު 5 ދުވަހަށް އިތުރުކުރި ކްރިމިނަލް ކޯޓުގެ އަމުރު ޝަރީޢަތްކުރުމާބެހޭ ޖިނާއީ އިޖުރާއަތުގެ ގަވާއިދުގެ 13 ވަނަ މާއްދާގެ (ނ) އާ އެއްގޮތްތޯއާއި، ޤާނޫނާ ޚިލާފަށް ބަންދުކުރިކަމަށް ކަނޑައަޅާނަމަ އިސްތިއުނާފުގެ ތެރެއިން ގެއްލުމުގެ ބަދަލު ނަގައިދެވޭތޯ.

ކަނޑައެޅި ޤާނޫނީ އުޞޫލުތައް

1. އެއް ތުހުމަތާ ގުޅިގެން ކުރިން ނެރުނު ބަންދުގެ އަމުރެއްގެ އިސްތިއުނާފުގައި (2024/HC-B12/37) ނިންމާފައިވާ ހަމަ އެއް ނުކުތާތަކެއް ހުށަހަޅާފައިވާތީ، އެ ޤަޟިއްޔާގެ ނިންމުމަށް ތަބާވެ، ބަންދު 5 ދުވަހަށް އިތުރުކުރި އަމުރަކީ ޝަރީޢަތްކުރުމާބެހޭ ޖިނާއީ އިޖުރާއަތުގެ ގަވާއިދުގެ 13 ވަނަ މާއްދާގެ (ނ) އާ ޚިލާފު އަމުރެއް ކަމަށް ކަނޑައެޅިއެވެ (ޕެރ. 12-16).
2. ޤާނޫނާ ޚިލާފަށް ހައްޔަރުކުރުމުގެ ނުވަތަ ބަންދުކުރުމުގެ ބަދަލު ހޯދާނީ ޖިނާއީ އިޖުރާއަތުގެ ޤާނޫނުގެ 210 ވަނަ މާއްދާގައިވާ ގޮތުގެމަތިން، އެފަދަ މައްސަލަ ބެލުމުގެ އިޚްތިޞާޞް ލިބިގެންވާ ކޯޓަކަށް މަދަނީ މައްސަލައެއްގެ ގޮތުގައި ހުށަހަޅައިގެންނެވެ؛ ބަންދު ޤާނޫނާ ޚިލާފުކަމަށް ކަނޑައެޅުމުން ބަދަލު ނަގައިދިނުމަކީ އެ މައްސަލައިގެ ތެރެއިން ތަރުތީބުވެގެން އަންނަ ކަމެއް ނޫނެވެ (ޕެރ. 17-19).
3. ދިވެހިރާއްޖޭގެ ކޯޓުތަކުގެ ޤާނޫނުގެ 48 ވަނަ މާއްދާގެ (ހ) ގެ ބާރު ބޭނުންކޮށް، ޖިނާއީ އިޖުރާއަތުގެ ޤާނޫނުގައިވާ އިޖުރާއަތުން ބޭރުން، ބަންދުގެ އަމުރެއްގެ އިސްތިއުނާފުގެ މަރުޙަލާގައި ގެއްލުމުގެ ބަދަލު ނަގައިނުދެވޭނެއެވެ (ޕެރ. 20).
4. ބަދަލުގެ މިންވަރާއި ހިސާބުކުރި ގޮތާމެދު ޚަޞްމުންނަށް ބަސްބުނުމުގެ ފުރުޞަތު ނުދީ އިސްތިއުނާފުގެ މަރުޙަލާގައި ބަދަލު ކަނޑައެޅުމަކީ ޤާނޫނުއަސާސީގެ 56 ވަނަ މާއްދާއިން ލިބިދޭ އިސްތިއުނާފުގެ އެއް މަރުޙަލާ ގެއްލިގެންދާ ކަމެކެވެ (ޕެރ. 21-22).

ބަލާފައިވާ ޤާނޫނުތައް

• ގަވާއިދު ނަންބަރު 01-REG-SC-2021 (ޝަރީޢަތްކުރުމާބެހޭ ޖިނާއީ އިޖުރާއަތުގެ ގަވާއިދު) ގެ 13 ވަނަ މާއްދާގެ (ނ)
• ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 210 ވަނަ މާއްދާ
• ޤާނޫނު ނަންބަރު 2010/22 (ދިވެހިރާއްޖޭގެ ކޯޓުތަކުގެ ޤާނޫނު) ގެ 48 ވަނަ މާއްދާގެ (ހ)
• ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 58 ވަނަ މާއްދާ އަދި 56 ވަނަ މާއްދާ
• ޤާނޫނު ނަންބަރު 2013/1 (ޞުލްޙަވެރިކަމާއެކު އެއްވެއުޅުމުގެ މިނިވަންކަމުގެ ޤާނޫނު) (2024/HC-B12/37 ގެ ތެރެއިން)
• ހައިކޯޓު: ޢާއިޝަތު ޝާދިޔާ ވ. ޕްރޮސިކިއުޓަރ ޖެނެރަލްގެ އޮފީސް (2024/HC-B12/37) - ފަނޑިޔާރު ޙުޒައިފާ މުޙައްމަދުގެ ރައުޔު