—

ޓެކްސް ދައްކަންޖެހޭ ފަރާތެއް ކަނޑައަޅައި ނުވަތަ ޓެކްސް ދައްކާ ފަރާތަކުން ޓެކްސްގެ ގޮތުގައި މީރާއަށް ދައްކަން ޢަދަދެއް ކަނޑައަޅައިފިނަމަ، ޓެކްސް ނެގުމާބެހޭ އިދާރީ ޤާނޫނުގެ 40 ވަނަ މާއްދާގައިވާ ގޮތުން، އެ ކަނޑައެޅުން ނިސްބަތްވާ ޓެކްސް ނެގޭ މުއްދަތާ ގުޅޭގޮތުން ޓެކްސް ބަޔާން ހުށަހަޅާފައިވާނަމަ އެ ބަޔާން އެ ކަނޑައެޅުމާ އެއްގޮތަށް އިޞްލާޙުވެގެން ދިޔައީކަމުގައި ބެލޭނެއެވެ؛ އަދި ޓެކްސް ބަޔާން ހުށަހަޅާފައިނުވާނަމަ، މީރާއިން ކަނޑައަޅާ ޢަދަދަކީ އެ މުއްދަތުގައި ޓެކްސް ދައްކާ ފަރާތުން ދައްކަންޖެހޭ ޓެކްސްގެ ޢަދަދުކަމުގައި ބެލޭނެއެވެ. (ޕެރ. 03 (ނ))

ޓެކްސްގެ ގޮތުގައި ލިބެންވާ ފައިސާ ހޯދުމަށް މަދަނީ ގޮތުން ކޯޓުގައި ދަޢުވާ އުފުލުމުގެ ބާރު ޓެކްސް ނެގުމާބެހޭ އިދާރީ ޤާނޫނުގެ 49 ވަނަ މާއްދާގެ (ހ) ގެ ދަށުން މީރާއަށް ލިބިގެންވާއިރު، ޓެކްސްގެ ގޮތުގައި ދައުލަތަށް ލިބެންޖެހޭ ފައިސާ ތިންވަނަ ފަރާތެއް މެދުވެރިކޮށް ހޯދުމާއި، ޓެކްސް ދައްކަންޖެހި ނުދައްކާ ފަރާތްތަކުގެ ބޭންކް އެކައުންޓްތައް ކަމާބެހޭ ފަރާތްތައް މެދުވެރިކޮށް ފްރީޒް ކުރުމުގެ ބާރު މީރާއަށް ލިބިގެންވާކަން ޓެކްސް ނެގުމާބެހޭ އިދާރީ ޤާނޫނުގެ 47 ވަނަ މާއްދާއިން އެނގެން އޮވެއެވެ. (ޕެރ. 03 (ނ))

ޓެކްސް ނެގުމާބެހޭ އިދާރީ ޤާނޫނުގެ 47 ވަނަ މާއްދާގެ (ހ) ގެ ދަށުން ނުވަތަ (ރ) ގެ ދަށުން ދައުލަތަށް ދައްކަންޖެހޭ ޓެކްސް ތިންވަނަ ފަރާތެއް މެދުވެރިކޮށް ހޯދުމަށް އެދި މީރާއިން ފޮނުވާ ނޯޓިސްއާއި، އެ ނޯޓިސްއާ ގުޅޭގޮތުން އަޅާ އިދާރީ ނުވަތަ އެނޫންވެސް ފިޔަވަޅެއްގެ ސަބަބުން އޭގެ އަސަރުކޮށްފާނެ ކޮންމެ ފަރާތަކަށްވެސް އެ ނޯޓިސް އިސްތިއުނާފުކުރުމަކީ އެފަރާތަކަށް ލިބިގެންވާ ޙައްޤެކެވެ. (ޕެރ. 03 (ރ))

މީރާއިން ނިންމި ނިންމުމަކާމެދު ނުވަތަ ކަނޑައެޅި ޢަދަދަކާމެދު އެ ނިންމުން ރައްދުވާ ފަރާތަކުން އިޢުތިރާޒުކުރާނަމަ، މީރާއިން އެ އެންގުން އެންގިތާ 30 ދުވަހުގެ ތެރޭގައި އިޢުތިރާޒުކުރާކަން ލިޔުމުން މީރާއަށް އަންގަންވާނެއެވެ. އެ އިޢުތިރާޒާ ގުޅިގެން މީރާއިން ނިންމި ނިންމުމާމެދުވެސް ހިތްހަމަނުޖެހޭނަމަ، އެކަމެއް އިސްތިއުނާފުކުރުމަށް މީރާއިން ގޮތް ނިންމިތާ 30 ދުވަހުގެ ތެރޭގައި ޓެކްސް އެޕީލް ޓްރައިބިއުނަލަށް ހުށަހެޅޭނެއެވެ. (ޕެރ. 03 (ރ))

މީރާގެ ނިންމުމާމެދު އިޢުތިރާޒުކޮށް އެ ނިންމުން ޓެކްސް އެޕީލް ޓްރައިބިއުނަލްގައި އިސްތިއުނާފުކުރުމުގެ ޙައްޤު އުފަންވަނީ، މީރާއިން ކަނޑައެޅި ޢަދަދު ޓެކްސް ދައްކަންޖެހިފައިވާ ފަރާތުން މީރާއަށް ދެއްކުމުންކަމާއި، އެ ޢަދަދު މީރާގެ ފަރާތުން ތިންވަނަ ފަރާތެއްގެ ބެލުމުގެ ދަށުގައި ހުރި ޓެކްސް ދައްކަންޖެހިފައިވާ ފަރާތުގެ ފައިސާއިން އުނިކޮށް ނެގުމުން ނޫންކަން ޓެކްސް ނެގުމާބެހޭ އިދާރީ ޤާނޫނުގެ 44 ވަނަ މާއްދާގެ ސާފު ޢިބާރާތުން އެނގެއެވެ. އެހެންކަމުން، އެ ނިންމުން އިސްތިއުނާފުކުރުމަށް ޤާނޫނުގައި ކަނޑައެޅިފައިވާ މުއްދަތުގައި ޓެކްސް އެޕީލް ޓްރައިބިއުނަލަށް ހުށަހެޅުމުގެ ކުރިން އެ ޢަދަދު ދެއްކުމަކީ، ޓެކްސް ދައްކާ ފަރާތުގެ މައްޗަށް ލާޒިމުކުރާ ކަމެކެވެ. (ޕެރ. 03 (ރ))

މީރާއިން ނިންމި ނިންމުމާމެދު 30 ދުވަހުގެ ތެރޭގައި ލިޔުމުން އިޢުތިރާޒުނުކޮށްފިނަމަ، ނުވަތަ އިޢުތިރާޒާ ގުޅިގެން މީރާއިން ނިންމި ނިންމުން 30 ދުވަހުގެ ތެރޭގައި ޓެކްސް އެޕީލް ޓްރައިބިއުނަލަށް ހުށަހަޅާފައި ނުވާނަމަ، އެކަމުގެ މައްޗަށް ތަރުތީބުވެގެންދާ ނަތީޖާއަކީ، އެ ނިންމުން ރައްދުވާ ފަރާތުން އެ ނިންމުން ޤަބޫލުކުރީކަމަށް ޤާނޫނީ ގޮތުން ބެލެވުމެވެ. ތަޤާދުމުގެ އުޞޫލުން އެ ނިންމުމަކީ ޤާނޫނީ ގޮތުން ބަނދެވިގެންދާ ނިހާއީ ނިންމުމަކަށް ވެގެންދާއިރު، އެ ނިންމުމާމެދު އެހެން މަރުޙަލާއެއްގައި މައުޟޫޢީ ގޮތުން ބަޙުޘްކުރެވި އިތުރު ބަދަލެއް ޝަރުޢީ ޤާނޫނީ ގޮތުން ނުގެނެވޭނެއެވެ. އަދި އެކަމެއް ރައްދުވާ ފަރާތުން އެ މައްޗަށް ޢަމަލުކުރުން ޤާނޫނީ ގޮތުން ލާޒިމުވެގެންދެއެވެ. (ޕެރ. 03 (ރ))

ޤާނޫނުގައި ކަނޑައެޅިފައިވާ މުއްދަތުތައް ފާއިތުވުމަށްފަހު، މީރާގެ ފަރާތުން ފައިސާ ހޯދުމުގެ ނުވަތަ ތަންފީޒީ މަރުޙަލާގައި މައުޟޫޢީ ގޮތުން ބަޙުޘް ކުރެވުމަކީ، ޓެކްސް ނެގުމާބެހޭ އިދާރީ ޤާނޫނުގެ 42 ވަނަ މާއްދާއާއި 44 ވަނަ މާއްދާގައި އިސްތިއުނާފުކުރުމަށް ދީފައިވާ 30 ދުވަހުގެ މުއްދަތުގެ ބޭނުމާއި މަޤްޞަދު ގެއްލި އެ މާއްދާތަކުގެ ޤާނޫނީ ބާރު ގެއްލިގެންދާނެ ކަމެކެވެ. އެހެންކަމުން، އެ މުއްދަތުގައި އިސްތިއުނާފުނުކުރެވި ނިހާއީވެފައިވާ މީރާގެ ނިންމުމާމެދު ޓެކްސް އެޕީލް ޓްރައިބިއުނަލްގައި މައުޟޫޢީ ގޮތުން ވާހަކަ ދެކެވި އެ ނިންމުމަށް ބަދަލު ގެނައުމަކީ ޤާނޫނީ ގޮތުން ބާޠިލު ނިންމުމެކެވެ. (ޕެރ. 03 (ރ)، (ބ))