—

ޓެކްސްއާ ގުޅޭގޮތުން މީރާއިން ނިންމި ނިންމުމަކާމެދު ނުވަތަ ކަނޑައެޅި ޢަދަދަކާމެދު އެ ނިންމުން ރައްދުވާ ފަރާތަކުން އިޢުތިރާޒުކުރާނަމަ، މީރާއިން އެ އެންގުން އެންގިތާ 30 ދުވަހުގެ ތެރޭގައި އިޢުތިރާޒުކުރާކަން، އިޢުތިރާޒުކުރާ ސަބަބު ތަފްޞީލާއެކު ލިޔުމުން މީރާއަށް އަންގަންވާނެއެވެ. އިޢުތިރާޒާ ގުޅިގެން މީރާއިން ނިންމާ ނިންމުމާމެދުވެސް ހިތްހަމަނުޖެހޭނަމަ، ޢަމަލު ކުރުމަށް ކަނޑައެޅިފައިވާ އިޖުރާއަތަކީ އެ ނިންމުމެއް ނިންމާތާ 30 ދުވަހުގެ ތެރޭގައި ޓެކްސް އެޕީލް ޓްރައިބިއުނަލަށް އެކަމެއް އިސްތިއުނާފުކުރުމަށް ހުށަހެޅުމެވެ. (ޕެރ. 03 (ނ))

މީރާގެ ނިންމުމާމެދު އިޢުތިރާޒުކޮށް އެ ނިންމުން ޓެކްސް އެޕީލް ޓްރައިބިއުނަލްގައި އިސްތިއުނާފުކުރި ކަމުގައިވީނަމަވެސް، ޓެކްސްއާ ގުޅޭގޮތުން މީރާއިން ކަނޑައަޅާފައިވާ ޢަދަދު މީރާއަށް ދެއްކުމަކީ، ޓެކްސް ނެގުމާބެހޭ އިދާރީ ޤާނޫނުގެ 44 ވަނަ މާއްދާގެ ދަށުން ޓެކްސް ދައްކާ ފަރާތުގެ މައްޗަށް ލާޒިމުކުރާ ކަމެކެވެ. (ޕެރ. 03 (ނ))

ޓެކްސްގެ ގޮތުގައި ލިބެންވާ ފައިސާ ހޯދުމަށް މަދަނީގޮތުން ކޯޓުގައި ދަޢުވާ އުފުލުމަކީ މީރާއަށް ޤާނޫނީ ގޮތުން ލިބިދީފައިވާ ބާރެކެވެ. އެއްވެސް ޓެކްސްއެއް، ޖޫރިމަނާއެއް ނުވަތަ އެހެންވެސް ޢަދަދެއް ނުދައްކައި އޮވެއްޖެނަމަ ސަރުކާރަށް ދައްކަންޖެހޭ މަދަނީ ދަރަންޏެއްގެ ގޮތުގައި އެ ފައިސާއެއް ހޯދޭނެއެވެ. ކޮމިޝަނަރ ޖެނެރަލް އޮފް ޓެކްސޭޝަން ސޮއިކޮށްފައިވާ، ދައްކަންޖެހޭ ޢަދަދުގެ ތަފްޞީލު ހިމެނޭ ލިޔުމަކީ، އެ ފައިސާ ހޯދުމަށް ދަޢުވާކުރެވޭ ޝަރީޢަތުގެ މަރުޙަލާތަކުގައި ދައްކަންޖެހޭ ޢަދަދު ޘާބިތުކުރުމަށް އޮތް ހެއްކެއް ކަމުގައްޔާއި، ކޯޓުން ނިޔާ ކަނޑައެޅުމަށް ލިބޭ އެކަށީގެންވާ ބާރެއްކަމުގައި ފުދޭނެއެވެ. (ޕެރ. 03 (ނ))

ޓެކްސް އެޕީލް ޓްރައިބިއުނަލުން މައްސަލަ ނިންމާފައިވަނީ ޝަރުޢީ ޤާނޫނީ އުޞޫލުތަކާ ޚިލާފަށް ނުވަތަ ޓްރައިބިއުނަލަށް ލިބިގެންނުވާ ބާރެއް ބޭނުންކޮށްގެން ކަމުގައި ވަނީނަމަ، އެފަދަ ނިންމުމެއް 30 ދުވަހުގެ ތެރޭގައި ހައިކޯޓަށް އިސްތިއުނާފުކުރެވިދާނެއެވެ. އެގޮތުގެ މަތިން އިސްތިއުނާފު ކުރުމަށް ހައިކޯޓަށް ހުށަހެޅޭ މައްސަލަތައް ފިޔަވައި، ޓެކްސް އެޕީލް ޓްރައިބިއުނަލްގެ ނިންމުންތަކަކީ އެމައްޗަށް ޢަމަލުކުރަންޖެހޭ އެންމެ ފަހުގެ ނިންމުންތަކެވެ. (ޕެރ. 03 (ރ))

ޓެކްސްއާ ގުޅޭގޮތުން މީރާއިން ނިންމާ ނިންމުންތަކާއި، ޓެކްސް މައްސަލަތަކާ ގުޅިގެން ޓެކްސް އެޕީލް ޓްރައިބިއުނަލުން ނިންމާ ނިންމުންތައް ތަންފީޒުކުރުމަށްޓަކައި ސިވިލް ކޯޓަށް ހުށަހެޅުމުން، އެ ނިންމުންތައް ތަންފީޒުކުރުމުގެ ބަދަލުގައި އެމައްސަލަތަކުގެ މުޅި މައުޟޫޢާމެދު ވާހަކަދެކެވި ގޮތްތަކެއް ކަނޑައެޅިގެން ދިޔުމަކީ، ޓެކްސް ނެގުމާބެހޭ އިދާރީ ޤާނޫނުގެ ރޫޙާއި މީރާގެ ޒިންމާތަކާއި މަސްއޫލިއްޔަތުތަކާ މެދު ސުވާލު އުފެދޭ، އަދި ޓެކްސް އެޕީލް ޓްރައިބިއުނަލްގެ މަޤްޞަދާއި ބޭނުން ނެތިދާނެ ކަމެކެވެ. (ޕެރ. 03 (ބ))

ވަޒީފާއާގުޅޭ މައްސަލަތަކެކޭ އެއްފަދައިން ޓެކްސްގެ މައްސަލަތަކަކީވެސް ވަކި ޚާއްޞަ ބާވަތެއްގެ މައްސަލަތަކެއް ކަމުން، ސުޕްރީމް ކޯޓުގެ ނަންބަރު 2/2010 (21 މާރޗު 2010) ޢާއްމު ސިޓީއަށް ޤިޔާސްކޮށް، މީރާ އާއި ޓެކްސް އެޕީލް ޓްރައިބިއުނަލްގެ ނިންމުންތައް ޤާނޫނުގައިވާ ގޮތުގެ މަތިން ތަންފީޒުކުރުމަށް ދަށުކޯޓަށް ހުށަހެޅުމުން، އެ ނިންމުންތައް ތަންފީޒުކުރުމުގެ ގޮތުން އަޅަންޖެހޭ ފިޔަވަޅުތައް އެޅުން ފިޔަވައި، އެ ނިންމުމަކާ ގުޅިގެން އިތުރު ޝަރީޢަތުގެ މަޖިލިސްތަކެއް ބޭއްވުމަކީ ޤާނޫނީ ގޮތުން ހަމަޖެހޭ ކަމެއް ނޫނެވެ. (ޕެރ. 03 (ބ))

މީރާގެ އިޢުތިރާޒު ބެލުމުގެ ނިންމުން ޤާނޫނާ އެއްގޮތްވާ ގޮތުގެ މަތީން ޓެކްސް އެޕީލް ޓްރައިބިއުނަލުގައި އިސްތިއުނާފު ކޮށްފައިނުވާނަމަ، މީރާގެ އެ ނިންމުމަކީ ޓެކްސް ދައްކާ ފަރާތަށްވެސް ޤަބޫލުކުރެވޭ ނިންމުމެއްކަމަށް ޤާނޫނީ ގޮތުން ބެލެވޭއިރު، އިސްތިއުނާފުކުރުމަށް ކަނޑައެޅިފައިވާ މުއްދަތު ހަމަވެފައިވާއިރު ތަޤާދުމުގެ އުޞޫލުން އެ ނިންމުމަކީ ނިހާއީ ނިންމުމެއް ކަމުގައި ބެލެވޭނެއެވެ. އެހެންކަމުން އެ ނިންމުމަކީ ތަންފީޒުކުރުމުގެ ބާރު ޤާނޫނީ ގޮތުން ލިބިފައިވާ ނިންމުމެއްކަމާއި، އެ ނިންމުމާ އެއްގޮތަށް ޢަމަލުކުރުމާމެދު އިޢުތިރާޒުކުރުމަކީ ޓެކްސް ދައްކާ ފަރާތަށް އޮތް ޙައްޤެއް ނޫންކަމަށް ޤާނޫނީ ގޮތުން ބަލަންޖެހެއެވެ. (ޕެރ. 03 (ޅ))