ދައުލަތް (އެޓަރނީ ޖެނެރަލްގެ އޮފީސް) ވ. މުޙައްމަދު ފަޔާޟް

ޖިނާއީ ކުށެއްގެ ތުހުމަތުގައި މީހަކު ވަޒީފާއިން ވަކިކުރާ ޙާލަތްތަކުގައި ބަލަންޖެހޭނީ، މަދަނީ އަދި އިދާރީ ފިޔަވަޅެއް އެޅުމަށްޓަކައި ސާބިތުވާން އޮންނަ މިންގަނޑު ކަމަށްވާ، ހުށަހެޅިފައިވާ ހެއްކާއި ޤަރީނާތައް ވަޒަންކުރުމަށްފަހު ބޮޑަށް ބުރަވެވޭ ގޮތެއްގެ މައްޗަށް ބިނާކޮށް އެފިޔަވަޅެއް އެޅުމެވެ. ބެލެންސް އޮފް ޕްރޮބަބިލިޓީޒް ނުވަތަ ޕްރީޕޮންޑަރެންސް އޮފް ދި އެވިޑެންސް ގެ މި މަފްހޫމަކީ، ކުރިއަރާފައިވާ ދީމުޤްރާޠީ މުޖުތަމަޢުތަކުގެ އިތުރުން ދިވެހިރާއްޖޭގައިވެސް މިފަދަ މައްސަލަތަކުގައި ޢަމަލުކުރަމުން އަންނަ އުޞޫލެވެ. (ޕެރ. 03، އަޣްލަބިއްޔަތު ރައުޔު (ށ))

ޖިނާއީ ކުށެއްގެ ތުހުމަތުގައި މުވައްޒަފަކާމެދު އިދާރީގޮތުން ފިޔަވަޅެއް އަޅާއިރު، އެފަދަ ފަރާތަކާމެދު ތުހުމަތުކުރެވޭ ޖިނާއީ ކުށުގެ ޢަމަލު ޤާނޫނުއަސާސީގެ 51 ވަނަ މާއްދާގެ (އ) ގައި ބަޔާންކޮށްފައިވާ މިންގަނޑުން ސާބިތުވުން ކޮންމެހެން ލާޒިމެއް ނުވެއެވެ. (ޕެރ. 03، އަޣްލަބިއްޔަތު ރައުޔު (ށ))

ފުލުހުންގެ ވަޒީފާއަކީ، ޗެއިން އޮފް ކޮމާންޑް އަށް ތަބާވެ އެ އަސާސްގެ ދަށުން މަސައްކަތްކުރަންޖެހޭ، ދައުލަތުގެ އެހެން ވަޒީފާތަކާ ޚިލާފަށް އެމީހުން އަދާކުރަންޖެހޭ ޒިންމާތަކާއި ވާޖިބުތަކާއި އުފުލަންޖެހޭ މަސްއޫލިއްޔަތުތައް ތަފާތު ބައެކެވެ. އެފަރާތްތަކުގެ ވަޒީފާގެ މަސްއޫލިއްޔަތާއި ޒިންމާތައް އަދި ވަޒީފާގެ ސުލޫކީ މިންގަނޑާއި އެހެނިހެން މުހިންމު އަސާސްތައް، ފުލުހުންގެ ޤާނޫނާއި އެ ޤާނޫނުގެ ދަށުން ހެދިފައިވާ ވަޒީފާއާބެހޭ ޤަވާޢިދާއި ޑިސިޕްލިނަރީ އަދި އިދާރީ ކުށްތަކާއި އެކުށްތަކަށް އަދަބުދިނުމާބެހޭ ޤަވާޢިދާއި ދިވެހި ފުލުހުންގެ ކޯޑް އޮފް ކޮންޑަކްޓްގައި ބަޔާންކުރެވިފައިވެއެވެ. (ޕެރ. 03، އަޣްލަބިއްޔަތު ރައުޔު (ނ))

ފުލުހެއްގެ މައްޗަށް ތުހުމަތުކުރެވޭ ޖިނާއީ ކުށެއްގެ ޢަމަލު، ފުލުހުންގެ ވަޒީފާއާބެހޭ ޤަވާޢިދުގެ 24 ވަނަ މާއްދާގެ (ށ) ގައި ބަޔާންކުރެވިފައިވާ ގޮތަށް ފުލުހުންގެ ތަޙްޤީޤަށް ސާބިތުކުރުމުގައި ގެންގުޅޭ މިންގަނޑަކީ، ހުށަހެޅިފައިވާ ހެއްކާއި ޤަރީނާތައް ވަޒަންކުރުމަށްފަހު ބޮޑަށް ބުރަވެވޭ ގޮތެއްގެ މައްޗަށް ބިނާކޮށް އެފިޔަވަޅެއް އެޅުމެވެ. ފުލުހެއްގެ މައްޗަށް ޖިނާއީ ކުށެއްގެ ތުހުމަތުގައި ވަޒީފާއިން ވަކިކުރެވޭ ޙާލަތްތަކުގައިވެސް ބަލަންޖެހޭނީ ބެލެންސް އޮފް ޕްރޮބަބިލިޓީޒް ގެ އުޞޫލުންނެވެ. (ޕެރ. 03، އަޣްލަބިއްޔަތު ރައުޔު (ނ))

ޤާނޫނީ މާއްދާތަކަކީ ޤާނޫނުއަސާސީއާ ޚިލާފު މާއްދާއެއް ނުވަތަ މާއްދާތަކެއްކަމަށް މިހާތަނަށް ޝަރުޢީ އެއްވެސް ކޯޓަކުން ކަނޑައަޅާފައިނުވާއިރު، އެ މާއްދާތަކަކީ އޭގެ ޤާނޫނީ ބާރުވެރިކަންމަތީ ދެމިއޮތް މާއްދާތަކެކެވެ. (ޕެރ. 03، އަޣްލަބިއްޔަތު ރައުޔު (ރ))

ތަޙުޤީޤުކުރި ފަރާތުން ހުށަހަޅާފައިވާ ހެއްކާއި ޤަރީނާތަކުގެ މައްޗަށް ރިޢާޔަތްކޮށް ބެލުމުން، ތުހުމަތުކުރެވޭ ފުލުހަކު ތަޙުޤީޤުގައި ކަނޑައެޅިގެން އޮޅުވާލައި ދޮގު މަޢުލޫމާތު ދީފައިވާތީ، އޭނާ އެ ޢަމަލުގައި ބައިވެރިވެފައިވާކަމަށް ޑިސިޕްލިނަރީ ބޯޑަށް ޤަބޫލުކުރެވި، އެކަމަކީ ފުލުހުންގެ ކޯޑް އޮފް ކޮންޑަކްޓާއި ކޯޑް އޮފް އެތިކްސްއާ ޚިލާފު ކަމެއްކަމަށްވާތީ، ޑިސިޕްލިނަރީ އަދި އިދާރީ ކުށްތަކާއި އެކުށްތަކަށް އަދަބުދިނުމާބެހޭ ޤަވާޢިދުގެ 07 ވަނަ މާއްދާގެ (ހ) ގެ (1) ވަނަ ނަންބަރާ ޙަވާލާދީ ފުލުހުންގެ ވަޒީފާއާބެހޭ ޤަވާޢިދުގެ 24 ވަނަ މާއްދާގެ (ށ) ގެ ދަށުން ވަޒީފާއިން ވަކިކުރުމަކީ ޤާނޫނާ ޚިލާފު ވަކިކުރުމެއް ނޫނެވެ. (ޕެރ. 03، އަޣްލަބިއްޔަތު ރައުޔު (ރ)؛ ޙުކުމް)