ޢަލީ ޝިޔާން ވ. މިނިސްޓްރީ އޮފް ޑިފެންސް އެންޑް ނެޝަނަލް ސިކިއުރިޓީ

ސިފައިންގެ ޤާނޫނުގެ ދަށުން ހެދިފައިވާ ޤަވާޢިދުތަކަކީ ސިފައިންގައި ވަޒީފާ އަދާކުރާ ފަރާތްތަކަށް ފެންނާނެހެން ނޯޓިސް ބޯޑުގައި ބަހައްޓައިގެން ޢާއްމުކުރެވިފައިވާ ޤަވާޢިދުތަކެއްކަމުން، އެ ޤަވާޢިދުތައް ޝަރީޢަތުގެ ފަރާތުން ޙިއްޞާކުރުމަކާ ނުލައި މައްސަލަ ނިންމުމަކީ، މައްސަލައާ ގުޅިގެން ޝަރީޢަތަށް ހުށަހެޅޭ ހެއްކާއި ޤަރީނާއަށް ޖަވާބުދާރީވުމުގެ ފުރުޞަތު ލިބިދިނުމަކާ ނުލައި ޙުކުމްކުރީކަމަށް ބެލެވޭނެ ޝަރުޢީ ޤާނޫނީ ހަމައެއް ނެތެވެ. (ޕެރ. 3 (ށ))

ދަށުކޯޓުން ތުހުމަތުކުރެވުނު ޢަމަލު މަދަނީ މިންގަނޑުން ސާބިތުވާކަމަށް ކަނޑައަޅާފައިވަނީ ފަރާތާ ޙިއްޞާނުކުރެވޭ ލިޔުމެއްގެ މައްޗަށް ބިނާކޮށް ނޫންނަމަ، ޝަރީޢަތަށް ހުށަހެޅިފައިނުވާ ހެއްކާ ޤަރީނާ ބޭނުންކޮށްގެން، ނުވަތަ ޚަޞްމުންނަށް ހެއްކާއި ޤަރީނާއަށް ޖަވާބުދާރީވުމުގެ ފުރުޞަތު ލިބިދީފައިނުވާ ޤަރީނާ ބޭނުންކޮށްގެން ޙުކުމްކުރީކަމަށް ބަލާނެ ޝަރުޢީ ޤާނޫނީ ސަބަބެއް ނެތެވެ. (ޕެރ. 3 (ށ))

ސިފައިންގެ މީހަކު ސަސްޕެންޑުކޮށްފިނަމަ، ސަސްޕެންޝަނުގެ މުއްދަތުގައި އެމީހަކަށް މުސާރައާއި ޢިނާޔަތެއް ނުލިބޭނެއެވެ. އަދި ސަސްޕެންޑުކޮށްފައިވާ މީހާ ސިފައިންގެ ވަޒީފާއިން ވަކިކުރުމަށް މިނިސްޓަރު ނިންމަވައިފިނަމަ، ސަސްޕެންޝަނުގެ މުއްދަތުގައި ލިބެންވާ މުސާރައާއި، އެލަވަންސް އަދި ޢިނާޔަތެއް ނުލިބޭނެ ކަމުން، ސަސްޕެންޝަނުގެ މުއްދަތުގެ މުސާރައާއި އެލަވަންސް އާއި ޢިނާޔަތް ލިބިދިނުމަށް ކަނޑައަޅާފައިނުވަނީ ރަނގަޅަށް ނޫންކަމަށް ބެލެވެން ނެތެވެ. (ޕެރ. 3 (ނ))

ޤާނޫނުއަސާސީގެ އަސާސީ ޙައްޤުތަކާއި މިނިވަންކަމުގެ ބާބުގައި ބަޔާންކޮށްފައިވާ ކޮންމެ ޙައްޤަކީ ނުވަތަ މިނިވަންކަމަކީ، އެއްވެސް ޙައްދެއްނެތި މުޠްލަޤަށް ލިބި، ކަށަވަރު ކޮށްދީފައިވާ ޙައްޤުތަކެއް ނޫނެވެ. ޤާނޫނުއަސާސީއާ ތަޢާރުޟުނުވާ ގޮތެއްގެ މަތިން، ރައްޔިތުންގެ މަޖިލީހުން ފާސްކުރާ ޤާނޫނަކުން، ޤާނޫނުއަސާސީގައި ބަޔާންކޮށްފައިވާ ޙައްޤެއް ނުވަތަ މިނިވަންކަމެއްގެ ބަޔެއް ހިފެހެއްޓިދާނެއެވެ. (ޕެރ. 3 (ރ))

ސިފައިންގެ ވަޒީފާއަކީ، ޗެއިން އޮފް ކޮމާންޑް އަށް ތަބާވެ އެ އަސާސްގެ ދަށުން މަސައްކަތްކުރަންޖެހޭ، ދައުލަތުގެ އެހެން ވަޒީފާތަކާ ޚިލާފަށް އެމީހުން އަދާކުރަންޖެހޭ ޒިންމާތަކާއި ވާޖިބުތަކާއި އުފުލަންޖެހޭ މަސްއޫލިއްޔަތުތައް ތަފާތު ބައެއްކަމުން، ސިފައިންގައި ވަޒީފާ އަދާކުރާ ފަރާތްތަކުގެ މައްޗަށް ޚާއްޞަ ޤާނޫނީ އުޞޫލުތަކެއް ސިފައިންގެ ޤާނޫނާއި އެ ޤާނޫނުގެ ދަށުން ހެދިފައިވާ ޤަވާޢިދުތަކުގައި ކަނޑައެޅިފައިވެއެވެ. ޤާނޫނާއި ޤަވާޢިދަކީ ޢާންމުކޮށް ޝާއިޢުކުރަންޖެހޭ އެއްޗެއްކަމުގައި ވީނަމަވެސް، ސިފައިންގެ ޤާނޫނުގެ ދަށުން ހެދިފައިވާ ޤަވާޢިދުތަކަކީ ޢާންމުކޮށް ޝާއިޢުކޮށް ގެޒެޓްކުރެވޭ އެއްޗެއް ނޫނެވެ. އެކަން އެގޮތަށް ކަނޑައަޅާފައި އޮތުމުގެ ބޭނުމަކީ، ސިފައިން އެމައްޗަށް ތަބާވެ ޢަމަލުކުރަންޖެހޭ އުޞޫލުތަކީ، މުޖުތަމަޢުގެ ޢާންމު ކޮންމެ ފަރުދަކަށް އެނގުން ލާޒިމްނުވާ، ދައުލަތުގެ އިސްތިޤްލާލާއި ސިޔާދަތު ހިމެނޭ ސިއްރުތައް ރައްކާތެރިކުރުމެވެ. (ޕެރ. 3 (ރ))

އަސްކަރީ ތަޙްޤީޤެއްގައި ތަޙްޤީޤަށް ޖަވާބުދާރީވުމަށް ދިން ފުރުޞަތުގައި، ވަކީލެއްގެ ހާޒިރުގައި ނޫނީ ބަޔާން ނުދޭނެކަމަށް ބުނެ ބަޔާންދޭން އިންކާރުކުރުމާ ގުޅިގެން، މިލިޓަރީ ޕޮލިހުގެ ފަރާތުން އެ ފުރުޞަތު ދިނުމަކާ ނުލައި ތަޙްޤީޤު ފުރިހަމަކުރުމަކީ ޤާނޫނުއަސާސީގެ 53 ވަނަ މާއްދާގެ (ހ) އާ ޚިލާފަށްކަމުގައި ބެލެވެން ނެތެވެ. (ޕެރ. 3 (ރ))

ވަޒީފާ އަދާކުރާ ފަރާތްތަކުގެ ތެރެއިން ވަޒީފާއާ ގުޅިގެން ބަޔަކުގެ މައްޗަށް ތަޠްބީޤުކުރެވޭނެ ވަކި ޚާއްޞަ ޤާނޫނެއް އޮތްނަމަ، އެބަޔެއްގެ މައްޗަށް ތަޠްބީޤުކޮށް ޢަމަލުކުރެވޭނީ އެ ޤާނޫނެވެ. އެފަދަ ފަރާތެއްގެ މައްޗަށް ސުޕްރީމް ކޯޓުގެ ނަންބަރު 2012/SC-C/35 ޤަޟިއްޔާގައި އެކޯޓުން ޤާއިމުކުރައްވާފައިވާ އުޞޫލުތަކާއި މަބްދައުތައް ތަޠްބީޤް ނުކުރެވޭނެއެވެ. (ޕެރ. 3 (ބ))

ޖިނާއީ ކުށެއްގެ ތުހުމަތުގައި މީހަކު ވަޒީފާއިން ވަކިކުރާ ޙާލަތްތަކުގައި ބަލަންޖެހޭނީ މަދަނީ އަދި އިދާރީ ފިޔަވަޅެއް އެޅުމަށްޓަކައި ސާބިތުވާން އޮންނަ މިންގަނޑު ކަމަށްވާ، ހުށަހެޅިފައިވާ ހެއްކާއި ޤަރީނާތައް ވަޒަންކުރުމަށްފަހު ބޮޑަށް ބުރަވެވޭ ގޮތެއްގެ (Balance of Probabilities) މައްޗަށް ބިނާކޮށް އެ ފިޔަވަޅު އެޅުމެވެ. ޖިނާއީ ކުށެއްގެ ތުހުމަތުގައި މުވައްޒަފަކާމެދު އިދާރީގޮތުން ފިޔަވަޅެއް އަޅާއިރު، ތުހުމަތުކުރެވޭ ޖިނާއީ ކުށުގެ ޢަމަލު ޤާނޫނުއަސާސީގެ 51 ވަނަ މާއްދާގެ (އ) ގައި ބަޔާންކޮށްފައިވާ މިންގަނޑުން ސާބިތުވުން ކޮންމެހެން ލާޒިމެއް ނުވެއެވެ. (ޕެރ. 3 (ޅ))