ދައުލަތް (އެޓަނީ ޖެނެރަލްގެ އޮފީސް) ވ. އަޙްމަދު އަލްޠާފް

ވަޒީފާ އަދާކުރާ ފަރާތްތަކުގެ ތެރެއިން ވަޒީފާއާ ގުޅިގެން އެބައެއްގެ މައްޗަށް ތަޠްބީޤުކުރެވޭނެ ވަކި ޚާއްޞަ ޤާނޫނެއް އޮތްނަމަ، އެބަޔެއްގެ މައްޗަށް ތަޠްބީޤުކޮށް ޢަމަލުކުރެވޭނީ އެ ޤާނޫނެއްކަމާއި، އަދި އެފަދަ ފަރާތެއްގެ މައްޗަށް ސުޕްރީމް ކޯޓުގެ ނަންބަރު 2012/SC-C/35 ޤަޟިއްޔާގައި އެކޯޓުން ޤާއިމުކުރައްވާފައިވާ އުޞޫލުތައް ތަޠްބީޤްނުކުރެވޭނެއެވެ. (ޕެރ. 03 (ށ))

ސުޕްރީމް ކޯޓުގެ ނަންބަރު 2012/SC-C/35 ޤަޟިއްޔާއަކީ ދުސްތޫރީ މައްސަލައެއްގެ ގޮތުގައި އެކޯޓުން ބައްލަވާ ޙުކުމްކުރައްވާފައިވާ، ވަޒީފާއާބެހޭ ޤާނޫނުގެ ތަރަހައިގެ ތެރޭގައި ހިމެނޭ ފަރާތެއް ނޫން ފަރާތެއް ހުށަހަޅާފައިވާ މައްސަލައެއް ކަމަށްވާއިރު، ވަޒީފާއާބެހޭ ޤާނޫނުގެ ތަރަހައިގެ ތެރޭގައި ހިމެނޭ ފަރާތްތަކެއް އެކުލެވޭ، ވަޒީފާއާބެހޭ ޤާނޫނުގައި ކަނޑައަޅާފައިވާ ޢާންމު އުޞޫލާ އެއްގޮތްވާ ގޮތުގެމަތިން ޝަރުޢީ ނިޒާމުގެ ތެރެއަށް ވަދެފައިވާ މައްސަލައަކީ އެ ޤަޟިއްޔާއިން ނިންމަވާފައިވާ މައްސަލައާ ތަފާތު މައްސަލައެކެވެ. (ޕެރ. 03 (ށ))

ސިފައިންގެ ވަޒީފާއަކީ، ޗެއިން އޮފް ކޮމާންޑް އަށް ތަބާވެ އެ އަސާސްގެ ދަށުން މަސައްކަތްކުރަންޖެހޭ، ދައުލަތުގެ އެހެން ވަޒީފާތަކާ ޚިލާފަށް އެމީހުން އަދާކުރަންޖެހޭ ޒިންމާތަކާއި ވާޖިބުތަކާއި އުފުލަންޖެހޭ މަސްއޫލިއްޔަތުތައް ތަފާތު، ވަކި ޤާނޫނެއްގައި އެފަރާތްތަކުގެ ވަޒީފާގެ މަސްއޫލިއްޔަތާއި ޒިންމާތައް އަދި ވަޒީފާގެ ސުލޫކީ މިންގަނޑާއި އެހެނިހެން މުހިންމު އަސާސްތައް ކަނޑައެޅި ބަޔާންކުރެވިފައިވާ ވަޒީފާއެއްކަމާއި، ސިފައިންގެ ވަޒީފާއާ ގުޅޭގޮތުން އެފަރާތްތަކުގެ މައްޗަށް ތަޠްބީޤް ކުރެވެމުންދަނީ ސިފައިންގެ ޤާނޫނާއި އެ ޤާނޫނުގެ ދަށުން ހެދިފައިވާ ސިފައިންގެ ޢާންމު ޤަވާއިދުގައި ބަޔާންކުރެވިފައިވާ އުޞޫލުތައް ކަމުގައި އެނގެން އޮތުމުން، ސިފައިންގެ ވަޒީފާއިން ވަކިކުރުމާ ގުޅޭ މައްސަލައަކީ ސުޕްރީމް ކޯޓުގެ ނަންބަރު 2012/SC-C/35 ޤަޟިއްޔާއާ ތަފާތު މައްސަލައެކެވެ. (ޕެރ. 03 (ނ)، (ރ))

ޤާނޫނީ މާއްދާތަކަކީ ޤާނޫނުއަސާސީއާ ޚިލާފު މާއްދާއެއް ނުވަތަ މާއްދާތަކެއްކަމަށް މިހާތަނަށް ޝަރުޢީ އެއްވެސް ކޯޓަކުން ކަނޑައަޅާފައިނުވާއިރު، އެ މާއްދާތަކަކީ އޭގެ ޞައްޙަކަންމަތީ ޤާނޫނީ ބާރުވެރިކަމާއެކު ދެމިއޮތް މާއްދާތަކެކެވެ. (ޕެރ. 03 (ބ))

ތުހުމަތުން ބަރީއަވުމަށް ގެއްލުނު މުދަލުގެ އަގުގެ ބަދަލު ދިނުމަށް ތުހުމަތުކުރެވޭ މީހާ އެއްބަސްވުމަކީ، އޭނާގެ މައްޗަށް ތުހުމަތުކުރެވިފައިވާ ޢަމަލުގެ މައްޗަށް ބާރު ލިބިދޭ ޤަރީނާއެކެވެ. (ޕެރ. 03 (ބ)؛ ޙުކުމް)

ސިފައިންގެ ކޮމިޝަން އޮފިސަރަކަށްވެހުރެ އޭނާއަށްވުރެ އެތައް ރޭންކެއް ދަށް ސިފައިންގެ މީހެއް ގާތު އެފަދަ ކަމެއް ކޮށްދިނުމަށް އެދުމަކީ، ސިފައިންގެ ވެރިންގެ އިތުބާރާއި ޤަދަރާއި ޢިއްޒަތް ސިފައިންގެ ޖޫނިއަރ ރޭންކްތަކުގެ ސިފައިންގެ ކުރިމަތީގައި ވެއްޓި، ވެރިންކުރާ އަމުރުތަކަށް ޖޫނިއަރ ސިފައިން ކިޔަމަންތެރިކަން އަދާކުރުމަށް ފަސްޖެހުމަށް މަގުފަހިވެގެންދާނެ ކަމަކަށްވާތީ، ސިފައިންގެ ޤާނޫނުގެ 8 ވަނަ މާއްދާގެ (ރ) އާއި ސިފައިންގެ ޢާންމު ޤަވާއިދުގެ 2 ވަނަ ބާބުގެ (1) ވަނަ މާއްދާގެ (ބ) އާއި ޚިލާފު ޢަމަލެކެވެ؛ އަދި އެކަމާ ގުޅިގެން ސިފައިންގެ ޤާނޫނުގެ 31 ވަނަ މާއްދާގެ ދަށުން ވަޒީފާއިން ވަކިކުރުމަކީ ޤާނޫނާ ޚިލާފަށް ކުރެވުނު ކަމެއް ކަމަށް ނުބެލެވޭނެއެވެ. (ޕެރ. 03 (ބ)؛ ޙުކުމް)