—

ޖިނާއީ ޤާނޫނުތައް ރަޖްޢީކޮށް މާޟީއަށް ތަޠްބީޤުނުކުރުމުގެ މަބުދައަކީ ޖިނާއީ ޢަދުލުގެ ނިޒާމުގައި އިސްތިޤުރާރުވެ ތަފާތު ދީމުޤްރާޠީ ދައުލަތްތަކުގެ ދުސްތޫރުތަކުގައި ކަނޑައެޅިފައިވާ މަބްދައެކެވެ. (ޕެރ. 5 (ނ))

އަލަށް ފާސްވާ ޤާނޫނެއްގެ ޙުކުމެއް ނުވަތަ އުޞޫލެއް ވޭތުވެދިޔަ ޒަމާނުގެ މައްޗަށް ނުވަތަ ވޭތުވެދިޔަ ހާދިސާއެއްގެ މައްޗަށް ނުހިނގާނެއެވެ. އިސްތިސްނާ ގޮތެއްގައި ހިނގާނީ އަލަށް ފާސްވި ޤާނޫނުގައި އެގޮތަށް ކަނޑައެޅިގެން ބަޔާންކޮށްފައިވާނަމަ، ނުވަތަ އެހެން ޤާނޫނަކުންވިޔަސް އެފަދަ އިސްތިސްނާއަކަށް ތަންދޭނަމައެވެ. (ޕެރ. 5 (ނ))

މަދަނީ ޤާނޫނެއްގައި އެޤާނޫނު ރަޖުޢީކޮށް މާޟީގެ މައްޗަށް ތަޠްބީޤުކޮށް ހިންގިދާނެކަމަށް ކަނޑައެޅިގެން ސާފުކޮށް ބަޔާންކޮށްފައިވާނަމަ އެގޮތުގެ މަތީން އެޤާނޫނުގެ ޙުކުމް މާޟީއަށް ހިންގިދާނެއެވެ. އެކަމަކީ ޤާނޫނީ އުޞޫލުން ބޭރުން ކުރެވޭ ކަމެއްކަމުގައި ނުބެލެވޭނެއެވެ. (ޕެރ. 5 (ނ))

ދައުލަތުގެ މިލްކިއްޔާތުގެ ގޮތުގައި ހުރި ރަށްރަށާއި ބިންބިމުގެ ތެރެއިން ޓޫރިޒަމްގެ ބޭނުމަށް އެއްބަސްވުމެއްގެ ދަށުން ދޫކުރެވިފައިވާ ރަށްރަށާއި ބިންބިމަކީ، އެ ރަށްރަށާއި ބިންބިން އެއްބަސްވުމެއްގެ ދަށުން ދޫކުރެވިފައިވާ ފަރާތްތަކަށް މިލްކޮށްދީފައިވާ ރަށްރަށާއި ބިންބިމެއް ނޫނެވެ. އެފަދަ ރަށްރަށާއި ބިންބިމާ ގުޅޭ ގޮތުން ނެގުމަށް ހަމަޖެހިފައިވާ ފީއާ ގުޅޭ ޤާނޫނެއް ތަންފީޒުކުރުމަކީ ޤާނޫނުއަސާސީގެ 40 ވަނަ މާއްދާގެ (ށ) އާ ޚިލާފަށް ކުރެވޭ ކަމެއް ނޫނެވެ. (ޕެރ. 5 (ރ))

ޤާނޫނުއަސާސީގެ 75 ވަނަ މާއްދާގައި ބަޔާންކުރެވިފައި އެވަނީ ރައްޔިތުންގެ މަޖިލީހުގެ މެންބަރުން އެބައިމީހުންގެ މަސައްކަތުގައި ރިޢާޔަތްކުރަންޖެހޭނެ ކަންކަމެވެ. ޤާނޫނެއް ފާސްކުރުމުގައި މެންބަރުން ޤައުމީ ނުވަތަ ޖަމާޢީ މަޞްލަޙަތަށް އުނިކަން އަންނާނެ ބީދައަކުން ކޮށްފައިވާކަމެއް ނުވަތަ އެބައިމީހުންގެ ފަރުދީ އަމިއްލަ މަޞްލަޙަތަށް އިސްކަންދީގެން ކޮށްފައިވާކަމެއް ފެންނަން ނެތްނަމަ، އެ ޤާނޫނު ފާސްކުރުމުގައި 75 ވަނަ މާއްދާއާ ޚިލާފުވެފައިވާކަމަށް ނުބެލެވޭނެއެވެ. (ޕެރ. 5 (ބ))

[ވާހަކަ ނުދައްކާ މީހަކަށް ނުވަތަ ހަނުހުރި މީހަކަށް އެއްވެސް ވާހަކައެއް ނިސްބަތެއް ނުކުރެވޭނެއެވެ] (لا ينسب إلى ساكت قول) މިއީ ފިޤްހީ ޤާޢިދާއެއްގެ އެއްބައެވެ. އޭގެ އަނެއްބަޔަކީ [އެހެނެއްކަމަކު ޖަވާބުދާރީވެ ވާހަކަދައްކަންޖެހޭ ފަދަ މަޤާމެއްގައި ހަނުހުރުމަކީ އެކަމަކަށް ޤަބޫލުވުމެވެ] (ولكن السكوت في معرض الكلام بيان) އެވެ. މިދެބަޔަކީ އެކުއެކީގައި ބޭނުންކުރެވޭ ޤާޢިދާއެކެވެ. އެޤާޢިދާގެ ފުރަތަމަ ބައި ވަކިން ޙުއްޖަތެއްގެ ގޮތުގައި ބޭނުންކުރެވިދާނެ އުޞޫލެއް ނޫނެވެ. (ޕެރ. 5 (ޅ))

އެއްފަރާތުން ހުށަހަޅާ ހުށަހެޅުމެއް އެހުށަހެޅުން ރައްދުވާ ފަރާތުން ޤަބޫލުކުރީ ކަމުގައި ބެލެވޭ ތަފާތު ގޮތްތަކެއް ހުރެއެވެ. ސާފު ޢިބާރާތުން ހުށަހެޅުން ޤަބޫލުކުރިކަން ފާޅުކުރުމާއި، ކަމެއް ކުރުމުން ނުވަތަ ނުކޮށްދޫކޮށްލުމުން ހުށަހެޅުން ޤަބޫލުކުރީ ކަމުގައި ބެލެވޭ ޙާލަތްތައް ހުރެއެވެ. މިއިން އެއްވެސް ގޮތަކީ ޝަރުޢީ ޤާނޫނީ ގޮތުން އިލްތިޒާމެއް އުފެއްދުމަށް ހުއްދަ ނުކުރާ ގޮތެއް ނޫނެވެ. (ޕެރ. 5 (ޅ))