—

މުވައްޒަފަކު ވަޒީފާއިން ވަކިކުރެވޭނީ އެކަށީގެންވާ ސަބަބެއް އޮވެގެން، ވަޒީފާއާބެހޭ ޤާނޫނުގައިވާ ގޮތުގެ މަތިންކަން ވަޒީފާއާބެހޭ ޤާނޫނުގެ 21 ވަނަ މާއްދާއާއި 28 ވަނަ މާއްދާއަށް ބަލާއިރު އެނގެން އޮވެއެވެ. (ޕެރ. ރ)

މުވައްޒަފަކު ވަޒީފާއިން ވަކިކޮށްފައިވަނީ އެކަށީގެންވާ ސަބަބެއް އޮވެގެންކަން ސާބިތުކޮށްދިނުމަކީ ވަޒީފާދޭ ފަރާތުގެ ޒިންމާއެއްކަން ވަޒީފާއާބެހޭ ޤާނޫނުގެ 27 ވަނަ މާއްދާއިން އެނގެން އޮވެއެވެ. (ޕެރ. ރ)

ވަޒީފާއާބެހޭ ޤާނޫނުގައިވެސް އަދި އެޤާނޫނުގެ ދަށުން ހެދިފައިވާ ޤަވާޢިދެއްގައިވެސް ރިޑަންޑަންސީއާ ގުޅޭގޮތުން ވަކި އުސޫލެއް ޤާއިމުކޮށްފައި ނުވިނަމަވެސް، ވިޔަފާރީގެ ނަފާ ހޯދުމަށް ހިންގޭ ކުންފުނިތައް ރީސްޓްރަކްޗަރ ކުރުމަށް ނުވަތަ ކުންފުނީގެ މާލީ ޙާލަތު ދަށްވުންފަދަ ކަމެއް މެދުވެރިވެގެން ކުންފުނީގެ މުވައްޒަފަކު ދޫކޮށްލަންޖެހިއްޖެނަމަ ނުވަތަ މަދުކުރަންޖެހިއްޖެނަމަ، އެފަދަ ޙާލަތުގައި މުވައްޒަފަކު ވަޒީފާއިން ވަކިކުރުމަކީ އެކަށީގެންވާ ސަބަބެއް ކަމުގައި ބެލެވިދާނެއެވެ؛ ނަމަވެސް ޙަޤީޤަތުގައިވެސް އެފަދަ ޙާލަތެއް މެދުވެރިވެފައިވޭތޯއާއި، އެކަން ކޮށްފައިވަނީ ހެޔޮނިޔަތުގައިތޯއާއި، ވަކި މުވައްޒަފަކު ކަނޑައެޅިގެން ބޭއިންސާފުން ވަޒީފާއިން ވަކިކުރުމަށްޓަކައި ކޮށްފައިވާކަމެއްތޯއާއި، ވަކިކުރާނެ މުވައްޒަފުން ކަނޑައެޅުނުގޮތާއި، މައުޟޫޢީ ޢަދުލުވެރިކަމާއި އިޖްރާއީ ޢަދުލުވެރިކަން ޤާއިމުކޮށްފައިވޭތޯ ބަލާ ކަށަވަރުވާން ޖެހޭނެއެވެ. (ޕެރ. ރ)

ދިވެހި ކޮންމެ ރައްޔިތަކަށްމެ ލިބިފައިވާ ވަޒީފާއަދާކުރުމާއި މަސައްކަތްކުރުމުގެ ޙައްޤު، ކޯޓުތަކުންނާއި ޓްރައިބިއުނަލްތަކުން މާނަކުރަންވާނީ އަދި ލިބިދޭންވާނީ ހުޅުވިގެންވާ ދީމިޤްރާޠީ މުޖްތަމަޢުތަކުން އެޙައްޤު ލިބިދިނުމުގައި ޤަބޫލުކުރާ އުޞޫލުތަކަށް ރިޢާޔަތްކުރެވި އެއުޞޫލުތައް ނެގެހެއްޓޭނޭގޮތެއްގެ މަތިންނެވެ؛ ރިޑަންޑަންސީގެ ޙާލަތު މެދުވެރިވެގެން ވަޒީފާއިން ވަކިކުރެވޭ މުވައްޒަފުންގެ ޙައްޤުތައް މާނަކުރުމުގައްޔާއި ލިބިދިނުމުގައިވެސް އެއުޞޫލުތަކަށް ރިޢާޔަތްކޮށް އެއުޞޫލުތައް ނަގަހައްޓަންވާނެއެވެ. (ޕެރ. ބ)

ރިޑަންޑަންސީގެ ޙާލަތު މެދުވެރިވެގެން ވަކިކުރާ މުވައްޒަފުންނާމެދު ޢަމަލުކުރާނޭ ވަކި ޚާއްޞަ އުޞޫލެއް ވަޒީފާއާބެހޭ ޤާނޫނުގައި ކަނޑައެޅިފައި ނުވިނަމަވެސް، އެ ޤާނޫނު ހިންގޭނެ ދާއިރާގެ ތެރޭގައި ހިމެނޭ ކޮންމެ މުވައްޒަފަކުވެސް ވަޒީފާއިން ވަކިކުރެވޭނީ، އެމުވައްޒަފަކު ވަޒީފާއިން ވަކިކުރުމަށް ނިންމި ނިންމުމުގައި މައުޟޫޢީ ޢަދުލުވެރިކަމާއި އިޖްރާއީ ޢަދުލުވެރިކަން ޤާއިމުކުރުމަށް ފަހުގައެވެ. (ޕެރ. ބ)

ޢާންމު އުސޫލެއްގެ ގޮތުން، ރިޑަންޑަންޓްވެގެން މުވައްޒަފަކު ވަޒީފާއިން ވަކިކުރާ ވަކިކުރުމުގައި މައުޟޫޢީ ޢަދުލުވެރިކަން ޤާއިމުކުރެވިފައިވާކަމަށް ބެލެވޭނީ، ކުންފުނި ރީސްޓްރަކްޗަރކޮށް މުވައްޒަފުން ރިޑަންޑަންޓްކުރުމަށް ނިންމި ނިންމުމަކީ ޙަޤީޤަތުގައިވެސް ކުންފުންޏަށް ކުރިމަތިވެފައިވާ އިޤްތިޞާދީ (economic) ސަބަބުތަކަށްޓަކައި، ކުންފުނިން ހެޔޮނިޔަތުގައި ނިންމާފައިވާ ނިންމުމެއްކަމަށް ވާނަމައެވެ. (ޕެރ. ޅ)

ރިޑަންޑަންސީގެ ޙާލަތުގައި މުވައްޒަފަކު ވަކިކުރުމުގައި އިޖްރާއީ ޢަދުލުވެރިކަން ޤާއިމުކުރެވިފައިވާކަމަށް ޢާންމު ޙާލަތްތަކުގައި ކަނޑައެޅޭނީ، (1) ކުންފުންޏަށް ދިމާވެފައިވާ އިޤްތިޞާދީ ޙާލަތުގެ ސަބަބުން މުވައްޒަފުންތަކެއް ރިޑަންޑަންޓްކޮށް ވަޒީފާއިން ވަކިކުރަންޖެހިފައިވާކަން ކުރިއާލާ އަންގާފައިވުމާއި، (2) ވަކިކުރުމުގައި ޢަމަލުކުރާނެ އިޖުރާއާތާއި އުޞޫލުތަކަކީ ކޮބައިކަން ކުރިއާލާ އަންގާފައިވުމާއި، (3) ވަޒީފާއާބެހޭ ޤާނޫނުގެ 22 ވަނަ މާއްދާގެ ދަށުން ދޭންޖެހޭ ނޯޓިސް ނުވަތަ 25 ވަނަ މާއްދާގެ ދަށުން ނޯޓިސްގެ ބަދަލުގައި ފައިސާ ދީފައިވުމާއި، (4) ޚާއްޞަ ޢިނާޔަތްތަކެއް ދިނުމަށް ކަނޑައަޅާފައިވާނަމަ، އެޢިނާޔަތް ލިބިދެވޭނެގޮތާއި މިންގަނޑުތައް ކުރިން ކަނޑައަޅައި މުވައްޒަފުންނަށް އެންގިފައިވާނަމައެވެ. (ޕެރ. ޅ، ކ)

ރިޑަންޑަންސީގެ ޙާލަތުތަކަކީ ކޮބައިކަން ޤާނޫނީ ނައްސުން އެނގެން ނެތްއިރު، ކޮންމެ މައްސަލައެއްގައިވެސް ހުށަހެޅިފައިވާ މަޢްލޫމާތުގެ އަލީގައި ޙަޤީޤަތުގައިވެސް މުވައްޒަފުންތަކެއް ރިޑަންޑަންޓް ކުރަންޖެހޭފަދަ ޙާލަތެއް މެދުވެރިވިތޯ ބަލަންޖެހޭނެއެވެ؛ ހިނގަމުންދާ ވިޔަފާރިއެއްގައި މަރާމާތުތަކެއްކުރަން ނުވަތަ އެހެން ބޭނުމަކަށްޓަކައި ޚިދުމަތް ވަގުތީގޮތުން މަޑުޖައްސާލާ ނުވަތަ ހުއްޓާލާ ކޮންމެ ޙާލަތަކީ މުވައްޒަފުން ރިޑަންޑަންޓްކުރަންޖެހޭ ނުވަތަ ހުއްދަވާ ޙާލަތުތަކެއްކަމަށް ބުރަވެވެން ނެތެވެ؛ އެފަދަ ޙާލަތުގައި މުވައްޒަފުންނާ މަޝްވަރާކޮށް، މުސާރަ ނުހިނގާ ނުވަތަ ދެބައިކުޅަ އެއްބައި ދޭ ޗުއްޓީ ފަދަ، ދެފަރާތުގެ މަޞްލަޙަތު ޙިމާޔަތްކުރެވޭނެ އެހެން ގޮތްތަކެއް ކަނޑައެޅިދާނެއެވެ. (ޕެރ. ކ)