—

ދަށު ކޯޓުގައި މައްސަލަ ބެލުމުގައި ތިން ފަނޑިޔާރުންގެ ޕެނަލްއަކުން ބައިވެރިވި އަޑުއެހުމުގައި މަޢުޟޫޢީގޮތުން މައްސަލަ ބަލާފައިނުވާނަމަ، އެ ޕެނަލްގައި ތިބި ފަނޑިޔާރުން އިސްތިއުނާފުގެ މަރުޙަލާގައި ހައިކޯޓުގެ ބެންޗުގައި ބައިވެރިވުމަކީ މައްސަލަ ހައިކޯޓުގައި ކުރިއަށް ގެންދިއުމަށް އޮތް ހުރަހެއްކަމަށް ނުފެނެއެވެ. (ޕެރ. 3(ހ))

ކްރިމިނަލް ކޯޓުގެ ނަންބަރު 2015/1 (މައްސަލަ ޙަވާލުކުރުމާއި، ނެގުމާއި، ތަޙްވީލުކުރުމާއި، މައްސަލައިން ތަނާޒުލްވުމާއި ޢަމަލުކުރާނެގޮތުގެ އުޞޫލު) ގައިވާ ގޮތުގެ މަތީން ކޯޓަށް ހުށަހެޅޭ މައްސަލަތަކުގެ ބެންޗް ކަނޑައެޅުމާއި، ހިނގަމުންދާ މައްސަލާގެ ބެންޗް އެކުލަވާލުމާއި މައްސަލަ ނެގުމަކީ އިސްގާޟީއަށް ލިބިގެންވާ ބާރުތަކުގެ ތެރޭގައި ހިމެނޭކަމެކެވެ. (ޕެރ. 3(ނ))

ދިފާޢުގެ ހެކިން ޙާޟިރުކުރުމަށް އެދުނު ނަމަވެސް، ހެކި ހުށަހަޅަން ބޭނުންވަނީ ކޮން ކަމެއް ސާބިތުކޮށްދިނުމަށްކަން ބުނެދީފައިނުވާނަމަ، އަދި އޭގެ ފަހުން ބޭއްވުނު އެއްވެސް ޝަރީޢަތުގެ މަޖިލީހެއްގައިވެސް ހެކި ހުށަހެޅުމަށް ބޭނުންވާކަމަށް ބުނެފައިނުވާނަމަ، ޤަޟިއްޔާ ނިންމާފައިވަނީ ސުޕްރީމް ކޯޓުގެ ނަންބަރު 2011/SC-A/36 ޤަޟިއްޔާއާ ޚިލާފަށްކަމަށް ބެލެވެން ނެތެވެ. (ޕެރ. 3(ނ))

ޤާނޫނު ނަންބަރު 10/90 (ދިވެހިރާއްޖޭގަ ޓެރަރިޒަމް މަނާކުރުމުގެ ޤާނޫނު) ގެ 2 ވަނަ މާއްދާގެ (ކ) ގައި، ރައްޔިތުންގެ ތެރޭގައި ބިރުވެރިކަން އުފެދޭފަދަ ކަމެއް ކުރުން، ނުވަތަ ކުރަން އުޅުން ނުވަތަ މީހެއްގެ ފުރާނައަށް ނުވަތަ ހަށިގަނޑަށް ނުވަތަ މުދަލަށް ގެއްލުންދީފާނެ ކަމުގެ އިންޒާރު ދުލުން ނުވަތަ ލިޔުމަކުން ވިޔަސް ދިނުމަކީ ބުނެވުނު ޤާނޫނުގެ ބޭނުމަށްޓަކައި ޓެރަރިޒަމްގެ ކުށެކެވެ. (ޕެރ. 3(ޅ))

(ޙާދިސާ ހިނގިއިރު) ޢަމަލުކުރެވެމުން ދިޔަ ޤާނޫނުލްޢުޤޫބާތުގެ ދަށުން ކުށެއްގައި ބައިވެރިވީކަމަށް ބެލެވޭ ކަންތައްތަކުގެ ތެރޭގައި، އެއްވެސް މާނައެއްގައި ކުށެއްކުރުމަށް ނަސޭހަތްތެރިވުން، ފާޑުކިޔައިދިނުން ނުވަތަ މިއިން ކަމަކަށް ސީދާ ނުވަތަ ނުސީދާ ގޮތަކަށް އިޝާރާތްކުރުން ހިމެނެއެވެ. (ޤާނޫނުލްޢުޤޫބާތުގެ 12 ވަނަ މާއްދާގެ (ހ)) (ޕެރ. 3(ޅ))

ޓެރަރިޒަމްގެ ޢަމަލަކަށް ހިތްވަރު ދިނުމުގެ ކުށަކީ ޤާނޫނު ނަންބަރު 32/2015 (ޓެރަރިޒަމް މަނާކުރުމުގެ ޤާނޫނު) ގެ 8 ވަނަ މާއްދާގައި ތަޖްރީމްކުރެވިފައިވާ ކުށެއްކަމަށްވެ، އެ ކުށަށް އިސްތިއުނާފުކުރެވޭ ޤަޟިއްޔާގައި ޙަވާލާ ދީފައިވީނަމަވެސް، ކުށް ސާބިތުވާކަމަށް ކަނޑައަޅާފައިވަނީ (ޢަމަލު ހިންގިއިރު ޢަމަލުކުރަމުން ދިޔަ) ޤާނޫނު ނަންބަރު 10/90 ގެ ދަށުންކަމަށްވާނަމަ، ޙުކުމްކޮށްފައިވަނީ ޤާނޫނުއަސާސީގެ 59 ވަނަ މާއްދާގެ (ހ) އާ ޚިލާފަށްކަމަށް ބެލެވެން ނެތެވެ. (ޕެރ. 3(ޅ))

ޤާނޫނު ނަންބަރު 1/2013 (ޞުލްޙަވެރިކަމާއެކު އެއްވެއުޅުމުގެ މިނިވަންކަމުގެ ޤާނޫނު) ގެ 52 ވަނަ މާއްދާގެ (ހ) ގައިވާ ގޮތުން، އެއްވުމެއްގައި ހިނގާ ހަމަނުޖެހުމާ ނުވަތަ އަނިޔާވެރި ޢަމަލަކާ ނުވަތަ މުދަލަށް ނުވަތަ މީހަކަށް ގެއްލުން ދިނުމާ ގުޅޭގޮތުން އެއްވުން އިންތިޒާމްކުރާ ފަރާތުން ޒިންމާ އުފުލަންޖެހޭނީ، އެކަން ހުއްޓުވުމަށްޓަކައި އަޅަންޖެހޭ އެކަށީގެންވާ ފިޔަވަޅުތައް އެ މީހުން އަޅާފައިނުވާ ޙާލަތުގައި، ނުވަތަ އަނިޔާވެރި ޢަމަލު ހިންގުމަށް ނުވަތަ މުދަލަށް ގެއްލުންދިނުމަށް އެ އެއްވުމުގައި ފާޅުގައި ގޮވަމުންދާއިރުވެސް އެކަން ހުއްޓުވުމަށް އެއްވުން އިންތިޒާމްކުރާ ފަރާތުން ކުރި މަސައްކަތެއް ފާހަގަ ނުވާނަމައެވެ. އެހެންކަމުން، މުޒާހަރާ އިންތިޒާމްކުރުމުގައި އިސްކޮށް ޙަރަކާތްތެރިވި ފަރާތެއް މުޒާހަރާގެ ބައިވެރިންނަށް އަނިޔާވެރިކަމަށް ހިތްވަރު ލިބޭގޮތަށް ވާހަކަދައްކާފައިވެ، ބައިވެރިން އަނިޔާވެރި ޢަމަލުތަކެއް ހިންގާފައިވާއިރު، އެކަން ހުއްޓުވުމަށް އެކަށީގެންވާ ފަދަ މަސައްކަތްތަކެއް އެ ފަރާތުން ކޮށްފައިވާކަން އެނގެން ނެތްނަމަ، އެ ފަރާތްވެސް ޒިންމާ އުފުލަންޖެހޭނެއެވެ. (ޕެރ. 3(ޅ))