—

ގަންނަ ފަރާތުން ފޮނުވާ ޕާޗޭސް އޯޑަރއަކީ ހުށަހެޅުމަށްޓަކައި ދެވޭ ދަޢުވަތެއް ކަމާއި، އެ ޕާޗޭސް އޯޑަރގައިވާ ގޮތުގެމަތިން މުދާ ފޮނުވުމަކީ އެ މުދާ ވިއްކުމަށް ހުށަހަޅާ ހުށަހެޅުމެއް ކަމާއި، މުދާ ފޮނުވުމުން އެމުދަލާ ޙަވާލުވުމަކީ އެކޮންޓްރެކްޓުގެ ޤަބޫލުކުރުން ކަމުން، ދެފަރާތުގެ ދެމެދުގައި ގަނެވިއްކުމުގެ އެއްބަސްވުން އުފެދިގެންދަނީ ފޮނުވާ މުދަލާ ގަންނަ ފަރާތުން ޙަވާލުވާ ވަގުތުގައެވެ. (ޕެރ. 3 (ށ))

މުދާ ހަވާލުކުރުމަށްފަހު ފައިސާ ދެއްކުމަށް އަންގައި ފޮނުވާ އިންވޮއިސްގައި ޖޫރިމަނާ ކުރެވޭނެ ކަމަށް ބަޔާންކޮށްފައިވާ ޝަރުޠަށް އިންވޮއިސް ލިބުނު ފަރާތުން އިންކާރުކޮށްފައިވާ ޙާލަތުގައި، އެނޫން ގޮތަކަށް ދެފަރާތުން އެކަމާގުޅޭ ގޮތުން ޢަމަލުކޮށްފައިވާކަން ސާބިތުވާން ނެތް ހިނދު، އެޝަރުޠަށް ޢަމަލުކުރުން ޝަރީޢަތުން ލާޒިމްކޮށްފިނަމަ، އެކަން ވެގެން ދާނީ އެފަރާތުން ކޮންޓްރެކްޓް ވީއިރު އެއްބަސްވެފައިވާ ޝަރުޠުތަކާއި ކަންތައްތަކުގެ ބޭރުން އަދި އެފަރާތުގެ ރުހުމާއި އިޚްތިޔާރުގެ ބޭރުން ކުރެވޭ ކަމަކަށެވެ. (ޕެރ. 3 (ނ))

ޝަރުޠު ޖަޒާއީ އަކީ، ކޮންޓްރެކްޓެއްގެ ދަށުން އެކޮންޓްރެކްޓުގެ ބައިވެރިއެއްގެ މައްޗަށް އަދާކުރުން ލާޒިމްވެގެންވާ އިލްތިޒާމެއް އަދާނުކުރުމުގެ ސަބަބުން ނުވަތަ އެ އިލްތިޒާމެއް އަދާކުރުމަށް ކަނޑައެޅިފައިވާ މުއްދަތުގައި އަދާނުކޮށް ލަސްކުރުމުގެ ސަބަބުން ކޮންޓްރެކްޓުގެ އަނެއް ބައިވެރިޔާއަށް ޙައްޤުވާ ގެއްލުމުގެ ބަދަލުގެ މިންވަރު ކުރިއާލައި ކަނޑައަޅައި، ބަދަލު ޙައްޤުވާ ފަރާތަށް އެ ބަދަލު ދިނުމަށް ކޮންޓްރެކްޓުގެ ބައިވެރިންގެ މެދުގައި ވެވޭ އެއްބަސްވުމަށް ނުވަތަ ކުރެވޭ ޝަރުޠަށް ބޭނުންކުރެވޭ އިސްތިލާޙެކެވެ. (ޕެރ. 3 (ރ))

ކޮންޓްރެކްޓެއްގެ ދަށުން އުފެދޭ އިލްތިޒާމެއް އަދާނުކުރުމުގެ ސަބަބުން ނުވަތަ އަދާކުރުން ލަސްވުމުގެ ސަބަބުން ލިބޭ ގެއްލުމުގެ ބަދަލުގެ މިންވަރު ވަޒަންކޮށް އެ ބަދަލު ނެގުމާމެދު އެއްބަސްވުމުގެ ބާރާއި އިޚްތިޔާރު ކޮންޓްރެކްޓްގެ ބައިވެރިންނަށް ލިބިގެންވީ ނަމަވެސް، އެބާރާއި އިޚްތިޔާރަކީ އެއްވެސް ޝަރުޢީ އަދި ޤާނޫނީ ޤައިދެއް ނެތި މުތުލަޤު ގޮތަކަށް ބޭނުންކުރެވޭނެ ބާރަކާއި އިޚްތިޔާރެއް ނޫނެވެ. ދިވެހިރާއްޖޭގެ ޤާނޫނީ ނިޒާމުގައި ކޮންޓްރެކްޓުގައި ހިމެނުން ހުއްދަކުރާ ޝަރުތުތައް ވާންޖެހޭނީ އިސްލާމީ ޝަރީޢަތުގަޔާއި ޤާނޫނުގައި ކަނޑައެޅި ބަޔާންވެގެންވާ ޤަޠުޢީ އަޙްކާމްތަކާއި ޚިލާފުނުވާ ޝަރުތުތަކަކަށެވެ. (ޕެރ. 3 (ރ))

ކޮންޓްރެކްޓުގެ ބައިވެރިއަކު އިލްތިޒާމެއް އަދާނުކުރުމުން ނުވަތަ އަދާނުކޮށް ލަސްކުރުމުން އަނެއް ބައިވެރިޔާއަށް ޙައްޤުވާ ގެއްލުމުގެ ބަދަލު ކަނޑައެޅުމުގައި ރިޢާޔަތްކުރަންޖެހޭނީ ޤާނޫނު ނަންބަރު 4/91 (ކޮންޓްރެކްޓާބެހޭ ޤާނޫނު) ގެ 23 ވަނަ މާއްދާގައި ބަޔާންވެގެން އޮންނަ ގޮތުގެ މައްޗަށެވެ. އެގޮތުން ކޮންޓްރެކްޓާއި ޚިލާފުވުމުގެ ސަބަބުން ލިބޭ ސީދާ ނުވަތަ ޙަޤީޤީ ގެއްލުމާއި، ލިބިދާނެކަމަށް ކޮންޓްރެކްޓުގެ ބައިވެރިންނަށް ފެންނަ ނުވަތަ އިންތިޒާރުކުރެވޭ ގެއްލުން ސާބިތުވެއްޖެ ނަމަ، ޝަރުތު ޖަޒާއީއެއްގެ ދަށުން ކަނޑައެޅޭ ބަދަލުގެ މިންވަރަކީ އެފަދަ ގެއްލުމަކާއި އެކަށީގެންވާ މުނާސިބު ބަދަލަކަށް ވާންޖެހޭނެއެވެ. (ޕެރ. 3 (ރ))

ޝަރުތު ޖަޒާއީގެ ދަށުން ނެގޭ ބަދަލަކީ ތަޢައްސުފުކޮށް ނެގޭ، ލިބިދާނެކަމަށް ބެލެވޭ ޙަޤީޤީ ގެއްލުމަކާ ނުވަތަ ފާއިތުވެދާނެ މަސްލަޙަތަކާ ނުވަތަ ފާއިދާއަކާ ނުބައްދަލު އެކަށީގެންވާ މިންވަރަށްވުރެ މާބޮޑު ބަދަލަކަށްވާނަމަ، އެއީ ސައްޙަ އަސާސެއްގެ މައްޗަށް ބިނާކޮށް ނެގޭ ބަދަލެއްކަމުގައި އިސްލާމީ ނަޒަރަކުން ނުބެލެވޭނެއެވެ. އެފަދަ ބަދަލުތައް ނެގުމަށް ޝަރުތު ކުރުމަކީ މީހުންގެ މުދާ އެބައި މީހުންގެ ރުހުމަކާއި ނުލައި ނުޙައްޤުން އަތުލުމެވެ. (ޕެރ. 3 (ރ))

ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 143 ވަނަ މާއްދާގެ (ރ) އާއި ދިވެހިރާއްޖޭގެ ކޯޓުތަކުގެ ޤާނޫނުގެ 20 ވަނަ މާއްދާގެ (ހ) އަށް ރިޢާޔަތްކޮށް، ޝަރުޠު ޖަޒާއީގެ މައުޟޫޢުގައި މައްސަލަތައް ނިންމުމުގައި ހައިކޯޓުން ޢަމަލުކުރަންޖެހޭނީ ސުޕްރީމް ކޯޓުން އެމައުޟޫޢުގައި ފަހުން ނިންމަވާފައިވާ ނިންމުމަށެވެ. (ޕެރ. 3 (ރ))

ފޮނުވާ ބިލްތަކަށް ފައިސާ ދައްކަންޖެހޭނެ މުއްދަތާއި އެމުއްދަތުގައި ފައިސާ ނުދައްކައިފިނަމަ ޖޫރިމަނާ ނެގޭނެކަމަށް ދެފަރާތުން ލިޔުމުން އެއްބަސްވެފައިވާ ޙާލަތާ ޚިލާފަށް، އެފަދަ އެއްބަސްވުމެއް ލިޔުމުން ވެވިފައިނުވާ އަދި ޝަރުޠު ޖަޒާއީއާ ބެހޭ ގޮތުން ދެފަރާތުން އެއްބަސްވެފައިވާކަން އެނގެން ނެތް ޙާލަތެއްގައި، އިންވޮއިސްގައިވާ ޝަރުޠު ޖަޒާއީ ގެ ގޮތުގައި ހޯދުމަށް އެދޭ ފައިސާ ދެއްކުމަށް ޝަރީޢަތުން އަންގަންޖެހޭ ފަދަ ޝަރުޢީ އަދި ޤާނޫނީ ސަބަބެއް ނެތެވެ. (ޕެރ. 3 (ބ))