ައްބާސް ވާފިރު ވ. 1.އަޙްމަދު ޝިޔާމް

ޖިނާއީ މައްސަލަތަކުގައްޔާއި މަދަނީ މައްސަލަތަކުގައި އިއްވާ ޙުކުމްތަކާއި ނެރޭ ކޯޓު އަމުރުތައް އިސްތިއުނާފަށް ހުށަހެޅުމުގެ ޙައްޤަކީ، އެ މައްސަލައެއްގެ މަސްލަޙަތެއް އޮތް ކޮންމެ ފަރާތަކަށް އަދި އެ ޙުކުމުގެ ސަބަބުން ސީދާގޮތެއްގައި އަސަރުފޯރާފާނެ ކޮންމެ މީހަކަށްމެ ލިބިގެންވާ ޙައްޤެކެވެ. (ޕެރ. 3(ހ))

ޙުކުމުގެ އަސަރު ސީދާގޮތެއްގައި ސިޔާސީ ޕާޓީއެއްގެ އެންމެހައި މެންބަރުންގެ މައްޗަށް ކުރާ ފަދައަކުން އޮތް ޙުކުމެއްގައި، އެ ޕާޓީގެ މެންބަރަކީ އެ މައްސަލަ އިސްތިއުނާފުކުރުމުގެ މަސްލަޙަތެއް އޮތް ފަރާތެއް ކަމުގައި ބެލެވެން އޮންނަކަމެވެ. (ޕެރ. 3(ހ))

ސިޔާސީ ޕާޓީތަކުގެ މަސްއޫލިއްޔަތުތަކުގެ ތެރޭގައި ދީމުޤްރާތީ ހަމަތަކުގެ މަތިން ޕާޓީ ހިންގުމާއި، ޕާޓީގެ އެންމެހައި ކަންކަން ފާޅުކަން ބޮޑުކޮށް ދެފުށް ފެންނަ ގޮތަށް ބެހެއްޓުން ސިޔާސީ ޕާޓީގެ ޤާނޫނުގެ 6 ވަނަ މާއްދާގެ (ހ) އަދި (ށ) އިން ލާޒިމްކުރެއެވެ؛ އަދި ސިޔާސީ ޕާޓީއަކުން ކޮށްގެން ނުވާނެ ކަންތައްތަކުގެ ތެރޭގައި ޕާޓީގެ އަސާސީ ޤަވާޢިދާ ޚިލާފުވުން ހިމެނިގެންވެއެވެ. (ޕެރ. 3(ނ))

ސިޔާސީ ޕާޓީއަކުން އަދި އެ ޕާޓީގެ މެންބަރުންވެސް ޢަމަލުކުރަންޖެހޭނީ ސިޔާސީ ޕާޓީތަކުގެ ޤާނޫނާއި، އެޤާނޫނުގެ ދަށުން ހެދިފައިވާ ޤަވާޢިދުތަކާއި، އެ ޤާނޫނާއި ޤަވާޢިދާ އެއްގޮތްވާގޮތުގެ މަތީން ޕާޓީން ކަނޑައަޅައި އެކުލަވާލާފައިވާ ޤަވާޢިދުތަކާއި އުސޫލުތަކުގެ ތަރަހައިގެ ތެރޭގައެވެ؛ ޕާޓީގެ ޤަވާޢިދުތަކާ ޚިލާފަށް ސިޔާސީ ޕާޓީއަކުން ނުވަތަ ޕާޓީގެ ގުނަވަނަކުން ޢަމަލުކުރާނަމަ އެކަން ހުއްޓުވުމަށް އެދި ކަމުގެ މަސްލަޙަތު އޮތް ފަރާތަކުން ޕާޓީއާ ދެކޮޅަށް ޝަރުޢީ ކޯޓަށް މައްސަލަ ހުށަހެޅުމަކީ ސިޔާސީ ޕާޓީތަކުގެ ޤާނޫނާއި އެ ޤާނޫނުން ބާރުލިބިގެން ހަދާފައިވާ ޤަވާޢިދުތަކާއި ޕާޓީގެ އަސާސީ ޤަވާޢިދު މަނާކޮށްފައިވާ ކަމެއް ނޫނެވެ. (ޕެރ. 3(ނ))

ޕާޓީގެ ރައީސްއެއް ހުރެމެ ޕާޓީގެ ޤަވާޢިދުތަކާ އެއްގޮތަށް އެ ޤަވާޢިދުތަކުން ލާޒިމްކުރާ ކައުންސިލްގެ ބައްދަލުވުމެއް ބޭއްވުމަށް ޢުޛުރުވެރިވަމުން ދިޔުމަކީ ޕާޓީގެ ހިންގުމަށާއި، ސިޔާސީ ޕާޓީއެއްގެ ޙައިސިއްޔަތުން ސިޔާސީ ވެށީގައި އެ ޕާޓީން ޙަރަކާތްތެރިވުމަށް އޮތް ހުރަހެކެވެ؛ ޕާޓީގެ ކަންކަން ކުރިއަށް ގެންދެވޭނެ އިތުރު ގޮތެއް ނެތިގެން އެ ކަމުގެ ފަރުވާއެއް ހޯދުމަށް ޕާޓީގެ މެންބަރުން ޝަރީޢަތަށް މައްސަލަ ހުށަހަޅައިފިނަމަ، އެ ޕާޓީ އެ ޕާޓީގެ ޤަވާޢިދާ އެއްގޮތަށް ހިންގޭނެ މަގެއް ތަނަވަސްކޮށްދީ އެ ކަމަށް ފަރުވާއެއް ދިނުމަކީ ޝަރީޢަތުގެ ފަރާތުން ކުރަންޖެހޭނެކަމެއް ކަމާއި، އެއީ އެއްވެސް ޙާލެއްގައި ޕާޓީގެ ހިންގުމުގެ ތެރެއަށް ޝަރީޢަތުން ވަނީކަމުގައި ނުބެލެވޭނެއެވެ. (ޕެރ. 3(ޅ))

ޤާނޫނެއްގައި ނުވަތަ ޤަވާޢިދެއްގައި ވަކިކަމެއް ބަޔާންވެގެން ނެތުމަކީ އިންސާފުވެރި ޙައްލެއް ހޯދުމަށް އެދި ހުށަހަޅާ ފަރާތަކަށް ދޭންޖެހޭ ޙައްޤެއް ނުދިނުމަށް އޮތް ޙުއްޖަތެއް ނޫނެވެ. (ޕެރ. 3(ކ))

ޤާނޫނެއްގައި ނުވަތަ ޤަވާޢިދެއްގައި އެކަމެއްކުރުމަށް ވަކިގޮތެއް ކަނޑައަޅާފައިނެތް ކަންކަމުގައި އެކަމެއްގެ ފަރުވާއެއް ޝަރީޢަތުން ދިނުމުގައި، މައްސަލައިގެ ވަށައިގެންވާ ކަންކަމުގެ މައްޗަށާއި ކަން ހިނގާފައިވާ ގޮތުގެ މައްޗަށް ބަލައި، މައްސަލަ ހުށަހެޅި ފަރާތަށް އަވަސް އަދި އިންސާފުވެރި ޙައްލެއް ދިނުމަށްޓަކައި ޤާނޫނުތަކާއި ޤަވާޢިދުތަކާ ޚިލާފުނުވާނެ ގޮތުގެ މަތިން އިންސާފު ޤާއިމުކުރުމަށްޓަކައި ނެރެންޖެހޭ އަމުރުތައް ނެރުމާއި ޙުކުމްތައް ކުރުމަކީ ކޯޓުތަކަށް ވިރާސީގޮތުން ލިބި އޮތް ބާރެކެވެ. (ޕެރ. 3(ކ))

ޕާޓީގެ ރައީސާއި ނައިބު ރައީސް އެ ފަރާތްތަކުގެ މަސްއޫލިއްޔަތުތައް އަދާކުރުމަށް ޢުޛުރުވެރިވެފައިވާ ޚާއްސަ ޙާލަތެއްގައި، ޕާޓީގެ ހިންގުން އަސާސީ ޤަވާޢިދާއި ހިންގާ ޤަވާޢިދާ އެއްގޮތަށް ހިންގުން ކަށަވަރުކުރުމަށްޓަކައި، ކައުންސިލް ބައްދަލުވުމެއް ބާއްވައި އޭގެ ރިޔާސަތު ބަލަހައްޓައި ޕާޓީގެ ކައުންސިލުން ޕާޓީގެ ހިންގުމާ މެދު ގޮތެއް ކަނޑައަޅަންދެން ވަގުތީގޮތުން އެ ކަންކަން ޕާޓީގެ ދެން ހުރި އެންމެ އިސްފަރާތާ (މުސްތަޝާރާ) ޙަވާލުކުރުމަކީ ޕާޓީގެ މެންބަރުންގެ މަސްލަޙަތާއި ޕާޓީގެ މަސްލަޙަތުގައި އޮތް އެންމެ ރަނގަޅު ފަރުވާއެވެ. (ޕެރ. 3(އ))