ކޭސޯން ކޮންސްޓްރަކްޝަން ކޮމްޕެނީ ޕވޓ ލޓޑ ވ. ޖަވާޒް ކޮންސްޓްރަކްޝަން ކޮމްޕެނީ ޕވޓ ލޓޑ

ޝަރީޢަތަށް ހުށަހެޅޭ މައްސަލައެއްގައި އަގު ކަނޑައެޅުމުގައި ދެ ފަރާތަށް އެއްބަސްވެވޭ އަގެއް އޮތްތޯ ބެލުމާއި، އެފަދަ އަގެއް ނެތްނަމަ އަދި ތިންވަނަ ފަރާތެއް އައްޔަންކޮށް އަގުކުރުމަށް މައްސަލައިގައި ހިމެނޭ ފަރާތަކުން ހުށަހެޅުމުން އެކަމަށް ދެފަރާތުން އެއްބަސްނުވާ ޙާލަތުގައި، އެމައްސަލައެއްގައި އަގު ކަނޑައެޅުމުގައި ޢަމަލުކުރަނީ ޝަރުޢީ އަގު ކޮމިޓީން އެތަން ބެލުމަށްފަހު އަގު ކަނޑައެޅުމެވެ. (ޕެރ. 03 ހ)

ޝަރުޢީ އަގު ކޮމެޓީން އެތަނުގައި ކޮށްފައިވާ މަސައްކަތްތައް ބަލައި އަގުކޮށް އޭގެ ރިޕޯޓު ހުށަހެޅުމަށްފަހު އަލުން އެތަން އެހެންފަރާތެއް މެދުވެރިކޮށް އަގު ކަނޑައެޅުމަށް ޙަވާލުކުރުމަކީ އެމައްސަލަ ބައްލަވާ ފަނޑިޔާރަކަށް ލިބިދީފައިވާ ތަޤްދީރީ ބާރުގެ ތެރޭގައި ހިމެނޭ ކަމެކެވެ. އެހެންފަރާތެއް މެދުވެރިކޮށް އެތަން އިތުރަށް އަގު ނުކުރުމަށް ޝަރީޢަތުން ނިންމެވި ނިންމެވުމަކީ، ޝަރުޢީ އަގު ކުރުމާބެހޭ ޤަވާޢިދާ ޚިލާފު ކަމެއްކަމަށް ބެލެވެން ނެތެވެ. (ޕެރ. 03 ހ)

ކޮންޓްރެކްޓަކީ ދެމީހެއްގެ ދެމެދުގައި ނުވަތަ އެއަށްވުރެ ގިނަ ބައެއްގެ މެދުގައި އެއްބަސްވެވޭ އެއްބަސްވުމެއްކަމަށާއި، އެއެއްބަސްވުމަކީ ޤާނޫނު ޤަބޫލުކުރާ ނުވަތަ ޤާނޫނު ބާރުދޭ އެއްބަސްވުމަކަށް ވާންވާނެ ކަމަށާއި، ކޮންޓްރެކްޓެއްގައި އެއްބަސްވާ މީހުން ރުހި ޤަބޫލުވާންވާނީ އެއްވެސް މަޖްބޫރު ކަމެއްނެތި އަމިއްލަ އިޚްތިޔާރުގައި ކަމަށާއި އަދި އެމީހުންނަކީ ކޮންޓްރެކްޓް ކުރުމަށް ޤާނޫނު ޤަބޫލުކުރާ ފަދަ މީހުން ކަމުގައި ވާންވާނެއެވެ. (ޕެރ. 03 ށ)

ކޮންޓްރެކްޓަކީ ވަކި ގޮތަކަށް އޮތުން ލާޒިމް އެއްޗެއް ނޫނެވެ. އެކަކު އަނެކަކަށް ހުށަހަޅާ ހުށަހެޅުން އެހުށަހެޅުން ރައްދުވީ ފަރާތުން ޤަބޫލުކުރުމުން ކޮންޓްރެކްޓެއް ކުރެވޭނެއެވެ. އަނގަބަހުން ވެވޭ އެއްބަސްވުންތަކަކީ ޤާނޫނީ ގޮތުން ޤަބޫލުކުރެވޭ އެއްބަސްވުންތަކެކެވެ. (ޕެރ. 03 ށ)

ޝަރުޢީ އަގު ކޮމެޓީގެ ބަދަލުގައި، އަގުކުރާ ނުވަތަ އިންސްޕެކްޓްކުރާ ނުވަތަ އެސެސްކުރާ ޕްރޮފެޝަނަލް އެހެންފަރާތެއްގެ ވެލުއޭޝަނަކަށް ރިޢާޔަތްކުރަންޖެހޭކަމަށް މައްސަލަ ބަލާ ފަނޑިޔާރަށް ބުރަވެވިއްޖެނަމަ، އެފަދަ ވެލުއޭޝަން ރިޕޯޓަކަށް ރިޢާޔަތްކުރުމުގެ އިޚްތިޔާރު އެމައްސަލަ ބަލާ ފަނޑިޔާރަކަށް ލިބިގެންވެއެވެ. (ޕެރ. 03 ނ)

ޚުސޫމަތްތެރި މައްސަލަތަކާ ގުޅިގެން ތަންތަނާއި ތަކެތި އަގުކުރުމުގައި، އެތަނެއް ނުވަތަ އެއެއްޗެއް އަގުކުރާއިރު، ހުރި ޙާލަތަށް ބަލައި އެތަނެއް ނުވަތަ އެއެއްޗެއްގެ އަގު ކަނޑައެޅުމެވެ. އެއެއްޗެއް ނުވަތަ އެތަނެއް ހެދުމަށް ޚަރަދުވިކަމަށް ދަޢުވާކުރާ ފަރާތަކުން ނުވަތަ ދަޢުވާލިބޭ ފަރާތަކުން ބުނާ މިންވަރު އެތަނަކަށް ޚަރަދުވެފައިވޭތޯ ބެލުން ނޫނެވެ. (ޕެރ. 03 ނ)

މައްސަލަ ޝަރީޢަތް ހިންގަމުން ދިޔައިރު އެތަންތަނުގެ އަގު ކުރުމުގެ ފުރުޞަތު ލިބިފައި އޮތް ނަމަވެސް އެފުރުޞަތުގައި އެތަން އަގުކޮށް އަގު ކުރިގޮތުގެ ރިޕޯޓެއް ހުށަހަޅާފައިނުވާތީ، ޝަރުޢީ އަގު ކޮމެޓީން ކަނޑައަޅާފައިވާ ގޮތުގެމަތިން އަގު ކަނޑައަޅައި ނިންމަވާފައިވާ ނިންމެވުމަކީ ޝަރީޢަތުން އަގު ކުރުމަށް ކަނޑައަޅާފައިވާ ޤަވާޢިދާއި އުޞޫލުތަކާ ޚިލާފަށް ނިންމަވާފައިވާ ނިންމުމެއް ނޫނެވެ. (ޕެރ. 03 ނ)