—

ދަޢުވާކޮށްފައިވާ މާއްދާ ނޫން މާއްދާއަކާ ޙަވާލާދީ ޙުކުމްކޮށްފައިވަނީ، މަސްތުވާތަކެއްޗާބެހޭ ޤާނޫނަށް ދެވަނަ އިޞްލާޙް ގެނައުމުގެ ޤާނޫނު (ޤާނޫނު ނަންބަރު 37/2015) ގެ 12 ވަނަ މާއްދާގައިވާ ގޮތުގެމަތިން، އެޤާނޫނަށް އިތުރުކުރި ނުވަތަ އުނިކުރި މާއްދާތަކާ ގުޅިގެން އެ ޤާނޫނުގެ މާއްދާތަކުގެ ނަންބަރުތައް ތަރުތީބުކުރުމުން ކަމުގައިވާނަމަ، އެއީ ދަޢުވާއާ ޚިލާފު މާއްދާއަކަށް ޙަވާލާދިނުމެއް ނޫނެވެ. (ޕެރ. 03(ށ))

"ޑައިމޯފިނުން މުޢާމަލާތުކުރުން" ކަމަށް މަސްތުވާތަކެއްޗާބެހޭ ޤާނޫނުގެ 188 ވަނަ މާއްދާގެ (ޏ) ގައި ބަޔާންކޮށްފައިވަނީ، ޑައިމޯފިން ވިއްކުމާއި، ދިނުމާއި، ވިޔަފާރިކުރުމަށްޓަކައި އެއްތަނުން އަނެއް ތަނަށް ގެންދިއުމާއި، ގެންގޮސް ދިނުމާއި، ރައްދުކޮށްދިނުމާއި، އެއިން ކަމެއް ކޮށްދިނުމަށް ހުށަހެޅުމާއި، އެއްބަސްވުން ހިމެނޭ ގޮތުންނެވެ. (ޕެރ. 03(ށ))

ސައިކަލަކީ އެއްތަނުން އަނެއް ތަނަށް މީހުންނާއި ތަކެތި ގެންދިއުމަށް ބޭނުންކުރާ އުޅަނދެއް ކަމުގައިވާއިރު، ސައިކަލެއްގެ މަޑިދަށުން މަސްތުވާތަކެތި ފެނުމަކީ، އެތަކެތި އެއްތަނުން އަނެއް ތަނަށް ގެންދިއުމުގެ ގޮތުން ނުވަތަ ގެންގޮސް ދިނުމުގެ ގޮތުން ކޮށްފައިވާ ކަމެއްކަމުގައި ބެލުމުގެ ފުރުޞަތު ބޮޑު ކަމެކެވެ. (ޕެރ. 03(ށ))

މީހެއްގެ ކުޑަކަމުދާ އެއްޗެހީގައި މަސްތުވާއެއްޗެއްގެ އަސަރުހުރިކަމަށް ދައްކައިފިނަމަ، އެހެންގޮތަކަށް ސާބިތު ނުވާހާހިނދަކު އެމީހަކީ މަސްތުވާއެއްޗެހި ބޭނުންކުރާ މީހެއް ކަމުގައި ބެލެވޭނެކަމަށް މަސްތުވާތަކެއްޗާބެހޭ ޤާނޫނުގެ 146 ވަނަ މާއްދާގައި ބަޔާންކޮށްފައިވެއެވެ. (ޕެރ. 03(ނ))

އެމީހެއްގެ ހިޔާޒަތުގެ ދަށުގައި ހުއްޓާ ފެންނަ މަސްތުވާތަކެތީގެ ޒިންމާ އެމީހަކު އުފުލަންޖެހޭނެއެވެ. ޝަރުޢީ އަދި ޤާނޫނީ ހަމަތަކުގެ މަތީން އެފަދަ މަސްތުވާތަކެތީގެ ޒިންމާ އުފުލަންޖެހޭ ފަރާތެއް ނުދެއްކޭނަމަ އެތަކެއްޗާމެދު ޖަވާބުދާރީވެ، އެތަކެތީގެ ޒިންމާ އުފުލަންޖެހޭނީ އެތަކެތި އެމީހެއްގެ ހިޔާޒަތުގެ ދަށުގައި ހުއްޓާ ފެނުނު މީހާއެވެ. (ޕެރ. 03(ރ))

މަސްތުވާތަކެއްޗާބެހޭ ޤާނޫނުގެ 141 ވަނަ މާއްދާގައި މީހާގެ އަތުގައި މަސްތުވާ އެއްޗެއް ހުރިކަމަށް ބެލެވޭނެ ހާލަތްތައް (މީހެއްގެ ކޮންޓްރޯލްގެ ދަށުގައި ހުންނަ ތަނެއްގައި ނުވަތަ އެއްޗެއްގައި މަސްތުވާއެއްޗެއް ހުރުން ހިމެނޭ ގޮތަށް) ބަޔާންކޮށްފައިވާއިރު، އެހާލަތްތަކުގައި އެގޮތަށް ބެލެވޭނީ އެހެން ގޮތަކަށް ސާބިތުނުވާހާ ހިނދަކުއެވެ. (ޕެރ. 03(ރ))

މީހަކު ކުށެއް ކޮށްފައިވާކަން އެކަށީގެންވާ މިންވަރުގެ ޝައްކެއް ނެތް މިންވަރަށް ޝަރީޢަތަށް ސާބިތުނުކުރެވޭނަމަ އެމީހަކީ ކުށެއް ނެތް މީހަކެއްކަމުގައި ބެލުމުގެ ޤާއިދާއަށް ބަލާއިރު، ވަށައިފާރު ރާނާފައިނުވާ ގެއެއްގައި ކޮންމެ މީހަކަށްވެސް އެއްޗެއް ލެވިދާނެ ގޮތަށް ބަހައްޓާފައިވާ ސައިކަލެއްގެ މަޑިދަށުން މަސްތުވާތަކެތި ފެނުނު ފެނުމުގެ މައްޗަށް ހަމައެކަނި ބަލައި، (ފެނުނު ވަގުތުން ފެށިގެން އިންކާރުކޮށް، ފިންގަރޕްރިންޓް ތަޙްލީލުކޮށްފައިނުވާއިރު) އެތަކެއްޗަކީ ސައިކަލުގެ ވެރިފަރާތުގެ ތަކެތި ކަމަށް ނުނިންމޭނެއެވެ. (ޕެރ. 03(ރ))

ކުޑަކަމުދާ ތަކެތި މަސްތުވާތަކެއްޗަށް ޕޮޒިޓިވް ވެފައިވީނަމަވެސް، އެއަށް ބާރު ލިއްބައިދޭ އިތުރު ހެއްކެއް ނުވަތަ ޤަރީނާއެއް ދައުލަތުން ހުށަހަޅާފައިނުވާނަމަ، ސައިކަލުން ތަކެތި ފެނުމާއި ކުޑަކަމުދާ ތަކެތި ޕޮޒިޓިވްވުމުގެ ދެ ޤަރީނާގެ މައްޗަށް ބިނާކޮށް، ޑައިމޯފިނުން މުޢާމަލާތް ކުރުމުގެ ކުށް ޤާނޫނުއަސާސީގެ 51 ވަނަ މާއްދާގެ (އ) ގައިވާ މިންގަނޑުން ސާބިތެއް ނުވެއެވެ. (ޕެރ. 03(ރ))