ވާއްޓޭ އިންވެސްޓްމެންޓް ވ. މިނިސްޓްރީ އޮފް އެޑިއުކޭޝަން

ނަތީޖާ: ހުށަހެޅިފައިވާ ގޮތަށް ޤަޟިއްޔާ ކުރިއަށް ނުގެންދެވޭ؛ ޙުސައިން ވާރިޝްގެ ނަމުގައި ފޯމު އިޞްލާޙުކޮށް 10 ދުވަހުގެ ތެރޭގައި އަލުން ހުށަހެޅުމުގެ ފުރުޞަތު ދިން

ދަށު ކޯޓު: ސިވިލް ކޯޓު 3462/Cv-C/2019

ކޯޓުން ނިންމަން ޖެހުނު ސުވާލު

އަމިއްލަ ފަރުދުންގެ ވިޔަފާރީގެ ޤާނޫނުގެ ދަށުން ރަޖިސްޓްރީކޮށްފައިވާ އަމިއްލަ ވިޔަފާރިއެއްގެ (ވާއްޓޭ އިންވެސްޓްމަންޓް) ނަމުގައި އިސްތިއުނާފުކުރުމުގެ ހައިސިއްޔަތު ލިބިގެންވޭތޯ، އަދި ޚަޞްމުން ހިމަނާފައިވާ ގޮތުން މި ޤަޟިއްޔާ ކުރިއަށް ގެންދެވޭނެތޯ.

ކަނޑައެޅި ޤާނޫނީ އުޞޫލުތައް

1. ކޯޓުތަކުން ދަޢުވާ ބަލައިގަތުމުގައި، ދަޢުވާކުރާ ފަރާތަކީ ދަޢުވާކުރުމުގެ މަޞްލަޙަތު އޮތުމުގެ އިތުރުން ދަޢުވާކުރުމުގެ ޤާނޫނީ ހައިސިއްޔަތު ހަމަ ޙަޤީޤަތުގައިވެސް ލިބިފައިވާ ފަރާތެއްތޯ ބަލަންޖެހޭނެއެވެ؛ މިއީ އިސްތިއުނާފީ މަރުޙަލާގެ ކޯޓުތަކުންވެސް ރިޢާޔަތްކުރަންޖެހޭ ކަމެކެވެ. (ޕެރ. 7)
2. ދަޢުވާކުރުމުގެ ހައިސިއްޔަތު ލިބިފައިނުވާ ފަރާތަކުން ކުރާ ދަޢުވާއަކީ ޤާނޫނީ ގޮތުން ކުރެވޭނެ ދަޢުވާއެއް ނޫން ކަމުގައި ކަނޑައެޅިގެންދާނެއެވެ. (ޕެރ. 8)
3. ދަޢުވާކޮށް ދަޢުވާ ރައްދުކުރެވޭނީ ޠަބީޢީ ޝަޚްޞަކަށް ނުވަތަ އަމިއްލަ ޙައްޤުތަކާއި ވާޖިބުތައް ޤާނޫނަކުން ލިބިދީފައިވާ ޤާނޫނީ ޝަޚްޞަކަށެވެ؛ އަމިއްލަ ފަރުދުންގެ ވިޔަފާރީގެ ޤާނޫނުގެ ދަށުން ރަޖިސްޓްރީކޮށްފައިވާ އަމިއްލަ ވިޔަފާރިއަކީ (sole proprietorship) ޤާނޫނީ ޝަޚްޞެއް ނޫނެވެ. (ޕެރ. 11-12، 16)
4. ދަޢުވާ ފޯމު ނުވަތަ އިސްތިއުނާފު ފޯމުގައި ޚަޞްމުންގެ މަޢުލޫމާތު ލިޔާއިރު ބުރަކެޓުން ބޭރުގައި ލިޔަނީ ޚަޞްމެއްގެ އަސްލު ނަމާއި ބުރަކެޓުގެ ތެރޭގައި ލިޔަނީ އިތުރު ތަފްޞީލެވެ؛ އެހެންކަމުން ޤާނޫނީ ޝަޚްޞަކަށް ނުވާ ވިޔަފާރީގެ ނަން ބުރަކެޓުން ބޭރުގައި ލިޔެގެން ހުށަހަޅާ އިސްތިއުނާފު، ޒިންމާ ނަގަންޖެހޭ ފަރާތާމެދު ސުވާލު ނުއުފެދޭ ގޮތަށް ޚަޞްމުން ހިމަނާފައި ނުވާތީ ކުރިއަށް ނުގެންދެވޭނެއެވެ. (ޕެރ. 13-16)

ބަލާފައިވާ ޤާނޫނުތައް

• އަމިއްލަ ފަރުދުންގެ ވިޔަފާރީގެ ޤާނޫނު
• ދިވެހިރާއްޖޭގެ ސުޕްރީމް ކޯޓުގެ ނަންބަރު 2009/SC-A/24 ޤަޟިއްޔާ (ހިއުމަން ރައިޓްސް ކޮމިޝަން އޮފް ދަ މޯލްޑިވްސް ވ. މޯލްޑިވްސް ޕޮލިސް ސަރވިސް)
• ދިވެހިރާއްޖޭގެ ސުޕްރީމް ކޯޓުގެ [2021] SC 23 (އާދަމް ނަސީރު ވ. މޯލްޑިވްސް އިންލަންޑް ރެވެނިއު އޮތޯރިޓީ) ގެ 21 ވަނަ ޕެރެގްރާފް