ނަން ފޮރުވާފައި

މި ޤަޟިއްޔާގައި ފަރާތްތަކުގެ ނަން ފޮރުވާފައި.

ނަތީޖާ: އިސްތިއުނާފު ބާޠިލް، ދަށުކޯޓުގެ ނިންމުން ޤާއިމް

ދަށު ކޯޓު: ފެމިލީ ކޯޓު IQB/2019/269

ކޯޓުން ނިންމަން ޖެހުނު ސުވާލު

ކޯޓަށް މީހުން ޙާޟިރުކުރުމުގެ ގަވާއިދުގެ 29 ވަނަ މާއްދާގެ ދަށުން ބާޠިލުކުރި ނަސަބު ނަފީކުރުމުގެ ދަޢުވާއެއް (ލިޢާނަށް އެދި ހުށަހެޅި)، ދަޢުވާ ރައްދުވާ މަންމަ ނިޔާވުމަށްފަހު ޑީ.އެން.އޭ ޓެސްޓަށް އެދި އަލުން ހުށަހެޅުމުން، އެ ދަޢުވާ ބަލައިނުގަތުމަށް ފެމިލީ ކޯޓުގެ ރަޖިސްޓްރާރ ނިންމި ނިންމުން ޞައްޙަތޯ.

ކަނޑައެޅި ޤާނޫނީ އުޞޫލުތައް

1. ކުރިން ބާޠިލުކުރި ދަޢުވާއާއި އެއް މައުޟޫޢެއްގެ ދަޢުވާއެއް ނަމަވެސް، އެ މައުޟޫޢު ސާބިތުކުރަން ހުށަހަޅާ ގޮތް (މިސާލަކަށް ލިޢާނުގެ ބަދަލުގައި ޑީ.އެން.އޭ) މުޅިން ތަފާތުނަމަ، އެއީ ކުރިން ހިނގަހިނގާ އޮތް ޤަޟިއްޔާ އަލުން ހުށަހެޅުމެއް ނޫން، ތަފާތު އައު ދަޢުވާއެކެވެ. (ޕެރ. 11)
2. ކޯޓަށް މީހުން ޙާޟިރުކުރުމުގައި ޢަމަލުކުރާނޭ ގޮތުގެ ގަވާއިދުގެ 18 ވަނަ މާއްދާގެ (ހ) އާއި (ށ) އަށް ބިނާކޮށް 29 ވަނަ މާއްދާގެ (ހ) ގެ 1 ގެ ދަށުން ބާޠިލުކުރި ދަޢުވާއެއް 33 ވަނަ މާއްދާގެ ދަށުން އަލުން ހުށަހަޅާއިރު، އުނިއިތުރު ގެނެސްފިނަމަ އެއީ އައު ދަޢުވާއެއް ކަމުގައި ބަލައިގަނެވޭނީ، ބާޠިލުކުރި ދަޢުވާ ކުރިއަށް ގެންދާ ގޮތަށް ނޫނެވެ. (ޕެރ. 12)
3. ބާޠިލުކުރި ދަޢުވާއެއް 33 ވަނަ މާއްދާގެ ދަށުން އަލުން ހުށަހެޅުމަކީ ޝަރުޠަކާނުލައި އެ ދަޢުވާ ބަލައިގަންނަން ޖެހޭ ޤާނޫނީ ސަބަބެއް ނޫނެވެ. ޤާނޫނަށް ނުވަތަ ގަވާއިދަށް އައި ބަދަލަކާ ނުވަތަ ދަޢުވާގެ މައުޟޫޢަށް އައި ބަދަލަކާ ގުޅިގެން އެއީ ކޯޓުން އަލުން ބެލިދާނެ މައްސަލައެއް ނުވެދާނެއެވެ. (ޕެރ. 13)
4. ދަޢުވާ ރައްދުވާ ފަރާތް ނިޔާވެ، އެ ތުހުމަތަށް ޖަވާބުދެވޭނެ ގޮތެއް ނެތި ޙާލަތު ބަދަލުވެފައިވާއިރު، ކުރިން ދަޢުވާ ހުށަހަޅާ ބާޠިލުކޮށްފައި އޮތުމުގެ މައްޗަށް އެކަނި ބުރަވެ އެ ދަޢުވާ އަލުން ބަލައިގަތުމަކީ ކޯޓަށް ލާޒިމް ކަމެއް ނޫނެވެ. (ޕެރ. 14)
5. ޢާއިލާއާބެހޭ ގަވާއިދުގެ 82 ވަނަ މާއްދާގެ (ހ) ގައިވާ މުއްދަތުގައި ނަސަބު ނަފީކުރަން ހުށަނޭޅިއްޖެނަމަ، އޭގެ ފަހުން ނަސަބު ނަފީކުރުމުގެ މައްސަލައެއް ބަލައިދެވޭނީ ކުއްޖާ ވިހާފައިވަނީ ކާވެނިކުރިތާ 6 މަސް ދުވަހުގެ ކުރިން ނުވަތަ ވަރިކުރިތާ 1 އަހަރު ފަހުންކަން އެނގޭ ލިޔުންތަކާއެކު ހުށަހެޅުމުންނެވެ. (ޕެރ. 16)
6. ދަރިލައްވާ މުއްދަތުގެ ތެރޭގައި (ކާވެނިކުރިތާ ހިޖުރީ ގޮތުން 6 މަސް ފަހުން، ވަރިކުރިތާ ނުވަތަ ފިރިމީހާ މަރުވިތާ ހިޖުރީ ގޮތުން 1 އަހަރު ތެރޭ) ދަރި ވިހާފައިވުމަކީ އެ ފިރިމީހާއަށް ނަސަބު ސާބިތުވާނެ ޝަރުޢީ އަދި ޤާނޫނީ ހުއްޖަތެކެވެ. އެ ނަސަބު ނަފީކުރެވޭނީ ލިޢާންކޮށްގެންނެވެ. މި އުޞޫލަކީ ޒަމާނުއްސުރެ ދިވެހިރާއްޖޭގައި ޢަމަލުކުރަމުން އައިސް ޢާއިލާއާބެހޭ ޤާނޫނުގެ 52 ވަނަ މާއްދާގައި ތަދުވީނުކުރެވިފައިވާ، އިސްލާމީ ޝަރީޢަތަށް ބިނާކޮށްފައިވާ އުޞޫލެކެވެ. (ޕެރ. 17-19)

ބަލާފައިވާ ޤާނޫނުތައް

• ޤާނޫނު ނަންބަރު 4/2000 (ޢާއިލާއާބެހޭ ޤާނޫނު) ގެ 52 ވަނަ މާއްދާ (ހ)، (ށ)، (ނ)
• ޢާއިލާއާބެހޭ ގަވާއިދުގެ 82 ވަނަ މާއްދާގެ (ހ) އަދި (ށ)
• ކުރިން ޢަމަލުކުރި ޢާއިލާއާބެހޭ ގަވާއިދުގެ 81 ވަނަ މާއްދާގެ (ރ) ގެ (2)
• ކޯޓަށް މީހުން ޙާޟިރުކުރުމުގައި ޢަމަލުކުރާނޭ ގޮތުގެ ގަވާއިދުގެ 18 ވަނަ މާއްދާގެ (ހ) އަދި (ށ)، 29 ވަނަ މާއްދާގެ (ހ) ގެ 1، 33 ވަނަ މާއްދާ
• މަޙްކަމަތުއްޝަރުޢިއްޔާ (ހ) ގެ ނަންބަރު ހ 65/4 (11 މެއި 1965) އިޢުލާން (ދަރިލެއްވުމާބެހޭ ގޮތުން ޢަމަލުކުރާ ޤަވާއިދު)
• މަޙްކަމަތުއްޝަރުޢިއްޔާ (ބ) ގެ ނަންބަރު ބ. 67.19/70 (25 ޖުލައި 1967) ސިޓީ
• މިނިސްޓްރީ އޮފް ޖަސްޓިސްގެ ނަންބަރު 93/27-އެމް.ޖޭ ސަރކިއުލަރ (27 އޮކްޓޯބަރ 1993) / ޝަރީޢަތް ކުރުމާބެހޭ ގޮތުން ހެދިފައިވާ ޤަވާއިދު (5) ގެ 99 ވަނަ މާއްދާ
• ކީރިތި ޤުރުއާނުގެ އާޔަތްތައް (ކިރުތުނބުން ވީއްލުމުގެ މުއްދަތު ދެއަހަރު؛ މާބަނޑުވުމާއި ކިރުތުނބުން ވީއްލުމުގެ މުއްދަތު 30 މަސް)