މޯލްޑިވްސް އިމިގްރޭޝަން

ނަތީޖާ: ދަށުކޯޓުގެ އަމުރު ބާޠިލު

ދަށު ކޯޓު: ސިވިލް ކޯޓު 144-B5-CR-4/CA/2020/3028

ކޯޓުން ނިންމަން ޖެހުނު ސުވާލު

ރަހުނެއް ނުހިމެނޭ ސާބިތު ދަރަނީގެ މުޢާމަލާތްތަކުގައި ޢަމަލުކުރަންވީ ގޮތުގެ ޤަވާޢިދުގެ ދަށުން (ޕާސްޕޯޓް ހިފެހެއްޓުމުގެ ބާރު)، ދަރަނިވެރިއެއްގެ ޕާސްޕޯޓް ކެންސަލްކުރުމަށް އަމުރުކުރުމުގެ ބާރު ސިވިލް ކޯޓަށް ލިބިދޭތޯ (ސުޕްރީމް ކޯޓުން 2022/SC-A/96 އިން މައުޟޫޢީ ގޮތުން ބެލުމަށް ތަޙުވީލުކުރި މައްސަލަ).

ކަނޑައެޅި ޤާނޫނީ އުޞޫލުތައް

1. މާނަކުރުމުގެ ހަމަތައް ބަޔާންކުރުމުގެ ޤާނޫނުގެ 2 ވަނަ މާއްދާގެ (ނ) ގެ ދަށުން، ބަހަކުން، ޢިބާރާތަކުން ނުވަތަ ޖުމްލައަކުން ވަކި މާނައެއް ދޭހަވާނަމަ، އެ މާނަ ފުޅާކުރުމަކީ ނުވަތަ އޭގައި ނުހިމެނޭ ކަންތައްތައް ހިމެނުމަކީ ރަނގަޅު ގޮތެއް ނޫނެވެ؛ ޤާނޫނު ނުވަތަ ގަވާއިދުގައި ޞަރީޙަ ނައްޞުން ނުހިމެނޭ ކަމެއް އިތުރުކުރުމަކީ ކޯޓަށް ލިބިދީފައިވާ ބާރު ފުޅާކުރުމެވެ.
2. ޕާސްޕޯޓް ހިފެހެއްޓުމާއި ޕާސްޕޯޓް ކެންސަލްކުރުމަކީ ތަފާތު ދެ ފިޔަވަޅެވެ؛ ސާބިތު ދަރަނި ނުދައްކާ ކުންފުނީގެ ޑިރެކްޓަރުން ރާއްޖެއިން ބޭރަށް ނުދެވޭނެ ގޮތަށް ޕާސްޕޯޓް ހިފެހެއްޓުމުގެ ބާރު ދޭ ގަވާއިދުގެ މާއްދާއިން ޕާސްޕޯޓް ކެންސަލްކުރުމުގެ ބާރު ކޯޓަށް ނުލިބެއެވެ.
3. ސާބިތު ދަރަނީގެ މުޢާމަލާތަކާ ގުޅިގެން ޕާސްޕޯޓް ކެންސަލްކުރުމުގެ އިޚްތިޔާރު ކޯޓުތަކަށް ލިބިދޭ ޤާނޫނީ ނައްޞެއް ނެތި ނެރޭ ޕާސްޕޯޓް ކެންސަލްކުރުމުގެ އަމުރަކީ ގަވާއިދުން ކޯޓަށް ލިބިދޭ ބާރުގެ ބޭރުން ނެރޭ، ބާޠިލުކުރަންޖެހޭ އަމުރެކެވެ.

ބަލާފައިވާ ޤާނޫނުތައް

• ރަހުނެއް ނުހިމެނޭ ސާބިތު ދަރަނީގެ މުޢާމަލާތްތަކުގައި ޢަމަލުކުރަންވީ ގޮތުގެ ޤަވާޢިދުގެ 32 ވަނަ މާއްދާގެ (ބ)
• ޤާނޫނު ނަންބަރު 4/2011 (މާނަކުރުމުގެ ހަމަތައް ބަޔާންކުރުމުގެ ޤާނޫނު) ގެ 2 ވަނަ މާއްދާގެ (ނ)
• ދިވެހިރާއްޖޭގެ ސުޕްރީމް ކޯޓުގެ 2022/SC-A/96 (ތަޙުވީލުކުރި ޙުކުމް)
• ހައިކޯޓުގެ 2021/HC-A/16 (ސުޕްރީމް ކޯޓުން ބާޠިލުކުރި ކުރީގެ ޙުކުމް)