—

HN1 ކުރިން އެއްވެސް ކުށެއް ކޮށްފައިނުވާ ފަރާތެއްވެސް ކުށުގެ ޢަމަލެއް ހިންގައި އަދި އެފަދަ ޢަމަލެއްގައި ބައިވެރިވެދާނެކަމީ ސަލާމަތްބުއްދިއަށްވެސް ޤަބޫލުކުރެވޭ ކަމެއްކަމަށްވާއިރު، މަސްތުވާތަކެތީގެ ވިޔަފާރިކުރާ ހުރިހާ ފަރާތްތަކަކީ، އެފަދަ ތަކެތި ބޭނުންކުރާ ފަރާތްތަކެއްނޫނެވެ. ތުހުމަތުކުރެވިފައިވާ މީހާގެ ކުށުގެ ރެކޯޑެއްނެތުމާއި، އެމީހެއްގެ ކުޑަކަމުދާ އެއްޗެހި މަސްތުވާ އެއްވެސް އެއްޗަކަށް ޕޮޒިޓިވްވެފައިނުވުމަކީ، މީހެއްގެ އަތުން ފެންނަ މަނާކުރެވިފައިވާ މަސްތުވާއެއްޗަކާމެދު އެމީހަކު ޒިންމާ އުފުލަންނުޖެހޭ ފަދަ ޤާނޫނީ ޙުއްޖަތެއްނޫނެވެ.)

HN2 މަނާކުރެވިފައިވާ މަސްތުވާއެއްޗެއް މީހެއްގެ އަތުގައި ހުރުމަކީ ކުށުގެ މަސްއޫލިއްޔަތު އުފުލުމަށް ކާފީ ޤާނޫނީ ޤަރީނާއެއްކަން ޤާނޫނު ނަންބަރު 77/17 (މަސްތުވާ ތަކެއްޗާބެހޭ ޤާނޫނު) ގެ 2 ވަނަ މާއްދާގެ (ށ) އާއި، އެޤާނޫނުގެ 4 ވަނަ މާއްދާގެ (ނ) ގެ ޞަރީޙަ ނައްޞުން ކަނޑައެޅިގެން އެނގެން އޮވެއެވެ. މަނާކުރެވިފައިވާ މަސްތުވާއެއްޗެއް މީހެއްގެ އަތުގައި ހުރުމަކީ، އިސްތިސްނާއެއްނެތި [މުޠްލަޤު މަސްއޫލިއްޔަތު] ޤާނޫނީގޮތުން އުފުލަންޖެހޭ ކުށެކެވެ.)

HN3 އެމީހެއްގެ ހިޔާޒަތުގެ ދަށުގައި ހުއްޓާ ފެންނަ މަސްތުވާތަކެތީގެ ޒިންމާ އެމީހަކު އުފުލަންޖެހެއެވެ. ޝަރުޢީ އަދި ޤާނޫނީ ހަމަތަކުގެ މަތީން އެފަދަ މަސްތުވާތަކެތީގެ ޒިންމާ އުފުލަންޖެހޭ ފަރާތެއް ނުދެއްކޭނަމަ އެތަކެއްޗާމެދު ޖަވާބުދާރީވެ، އެތަކެތީގެ ޒިންމާ އުފުލަންޖެހޭނީ އެތަކެތި އެމީހެއްގެ ހިޔާޒަތުގެ ދަށުގައި ހުއްޓާ ފެނުނު މީހާއެވެ.)

HN4 ޤާނޫނު ނަންބަރު 77/17 ގެ 2 ވަނަ މާއްދާގެ (ހ) ގައި މަނާކުރެވިފައިވާ މަސްތުވާ އެއްވެސް އެއްޗެއް ވިޔަފާރީގެ ބޭނުމަށް ގެންގުޅުމާއި، އަތުގައި ބެހެއްޓުމަކީ ކުށެއްކަމަށް ބަޔާންކޮށްފައިވާކަމާއި، މަނާކުރެވިފައިވާ މަސްތުވާއެއްޗެއް އެއްގުރާމަށްވުރެ ގިނައިން މީހެއްގެ އަތުގައި ހުރެއްޖެނަމަ ބެލޭނީ މަސްތުވާތަކެތީގެ ވިޔަފާރިކުރުމަށްޓަކައި އަތުގައި ބެހެއްޓީކަމަށް އެމާއްދާގެ (ށ) ގައި ބަޔާންކުރެވިފައިވާކަމާއި، އެކުށުގެ އަދަބަކީ ޢުމުރަށް ޖަލަށްލުންކަން 2 ވަނަ މާއްދާގެ (ރ) އިން އެނގެއެވެ.)

HN5 ތަޙްޤީޤު މަރުޙަލާގައި ތުހުމަތުކުރެވޭ ފަރާތުގެ އަތަށް މަސްތުވާތަކެތި ލިބުނު ގޮތެއް ބަޔާންކުރުމަކާ ނުލައި، އަދި އެކަން އެގޮތަށް ފާހަގަނުކުރި އެކަށީގެންވާ ސަބަބެއް ހާމަނުކޮށް، ޝަރީޢަތުގެ މަޖިލީހުގައި އެތަކެތި ލިބުނު ގޮތް ކިޔައިދީ އެތަކެތީގެ ޒިންމާ އުފުލާނެ މީހަކު ދެއްކުމަކީ، ހެކި އުފައްދައިގެން ޝަރީޢަތަށް ހުށަހެޅުމަށް މަގުފަހިވެގެންދާނެ ކަމެއްކަމަށްވުމުން، އެފަދަ ދިފާޢީ ހެކިންގެ ފަރާތުން ދައްކާފައިވާ ވާހަކަތަކަކީ ޝަރީޢަތުން ރިޢާޔަތްކޮށް އެމައްޗަށް އިޢްތިބާރެއް ދެވޭނެ ވާހަކަތަކެއް ކަމަށް ނުބެލެވެއެވެ.)

HN6 ލެބޯޓްރީ ތަޙްލީލް ރިޕޯޓުގެ ޞައްޙަކަމާމެދު ނުވަތަ އެރިޕޯޓް ތައްޔާރުކުރި ފަރާތަކާބެހޭ ގޮތުން ނުވަތަ އެތަކެތި ތަޙްލީލުކުރި ފަރާތުގެ ޢިލްމީ ޤާބިލްކަމާއި ތަޖްރިބާއާބެހޭ ގޮތުން އެއްވެސް ސުވާލެއް ދަށުކޯޓުގައި މައްސަލަ ހިނގަމުންދިޔައިރު އުފައްދާފައިނުވާނަމަ، އެކަންކަން ޝަރީޢަތަށް ހުށަހެޅުމުގެ ޙައްޤާއި ފުރުޞަތު އޮވެމެ، އެޙައްޤުގެ ބޭނުން ނުކޮށް ދޫކޮށްލާފައިވުމުން، ތަޙްލީލު ރިޕޯޓުގައި ހިމެނިފައިވާ މަޢުލޫމާތުގެ މައްޗަށް ބިނާކުރައްވާ ޙުކުމް ކުރެއްވުމަކީ ޝަރުޢީ ޤާނޫނީ ހަމަތަކާ ޚިލާފުކަމެއްކަމަށް ބެލެވެން ނެތެވެ.)

HN7 ދަޢުވާކުރެވިފައިވަނީ ހަމައެކަނި ތުހުމަތުކުރެވޭ ފަރާތުގެ މައްޗަށް ކަމަށްވާއިރު، ޙުކުމުގައި އޭނާގެ ނަމުގެ ބަދަލުގައި އެހެން ނަމެއް ލިޔެވިފައިވަނީ ލިޔުމުގެ ކުށަކުންކަން އެއްވެސް އޮޅުމެއްނެތި ސާފުކޮށް އެނގޭނަމަ، އެއީ މުޅި މައްސަލައިގެ ވާޤިޢާއަށް ބަދަލު އަންނާނެ ކަމެއް ނޫނެވެ. އަދި އެއީ ޙުކުމަށް ބަދަލު ގެންނަންޖެހޭ ޝަރުޢީ ޤާނޫނީ ސަބަބެއް ކަމަކަށް ނުބެލެވެއެވެ.)