ޓްރެވަލް ލޭންޑް މޯލްޑިވްސް ޕްރައިވެޓް ލިމިޓެޑް ވ. މޯލްޑިވްސް އިންލެންޑް ރެވެނިއު އޮތޯރިޓީ

އޮޑިޓް ނޯޓިސްއަކީ އޭގެ ޒާތުގައި ޓެކްސް ދައްކާފަރާތްތަކުން ދައުލަތަށް ދައްކަންޖެހޭ ޓެކްސް ދައްކާފައިވަނީ ރަނގަޅަށްތޯ ބަލައި އެސެސްމެންޓެއް ހެދުމުގެ ބޭނުމުގައި ފޮނުވޭ އެއްޗެއް ކަމަށްވާއިރު، އޮޑިޓް ނޯޓިސް ފޮނުވި ފޮނުވުމަށް ޗެލެންޖްކޮށް އެ މައްސަލަތައް އެމަރުޙަލާގެ ތެރޭގައި ބެލިގެންދާނަމަ، އެކަމަކީ ޤާނޫނު ނަންބަރު 3/2010 (ޓެކްސް ނެގުމާބެހޭ އިދާރީ ޤާނޫނު) ގައި މީރާއަށް ލިބިދީފައިވާ ތަޙްޤީޤްކުރުމާއި އޮޑިޓްކުރުމުގެ ބާރު ހަނިވެ، އެ ބާރުގެ ބޭނުން ޙާސިލުކުރުމަށް އޮތް ހުރަހެއް ކަމުގައިވާނެއެވެ. (ޕެރ. 3(ށ))

މީރާގެ މުވައްޒަފުންނާއި ގުޅޭގޮތުން އެއިދާރާއިން ނިންމާ ނިންމުންތަކާއި އެފަދަ އިދާރީ އެހެނިހެން ނިންމުންތައް ފިޔަވާ، ޓެކްސް ނެގުމާބެހޭ އިދާރީ ޤާނޫނުގައި ކަނޑައެޅިފައިވާ ކަންކަމާއި ގުޅިގެން މީރާއިން ނިންމާ ނިންމުންތަކުގެ މައްޗަށް ޤާނޫނާއި ޤަވާޢިދުތަކުގައި ބަޔާންކުރެވިގެންވާ ހަމަތަކާއި އުސޫލުތަކާއި އެއްގޮތަށް ޗެލެންޖު ކުރެވޭނީ ޓެކްސް އެޕީލް ޓްރައިބިއުނަލްގައެވެ. (ޕެރ. 3(ށ))

ޓެކްސް ނެގުމާބެހޭ އިދާރީ ޤާނޫނުގެ 44 ވަނަ މާއްދާގައި ބަޔާންކުރާ އިސްތިއުނާފުކުރުމުގެ ޙައްޤު އުފަންވާނީ، މީރާއިން ފޮނުވި އޮޑިޓް ނޯޓިސް އަކާ ގުޅިގެން މީރާއިން ޢަދަދެއް ކަނޑައެޅުމަށްފަހު އެކަން ޓެކްސް ދައްކާ ފަރާތަށް އެންގުމުން، އެކަމަށް ޤާނޫނާއި ޤަވާޢިދުގައިވާ އިޖުރާއާތުތަކާއި އެއްގޮތަށް އިޢުތިރާޒްކޮށް، އެހުށަހެޅުމާއި ގުޅިގެން މީރާއިން ނިންމި ނިންމުމާއި މެދު ހިތްހަމަ ނުޖެހޭނަމަ އެނިންމުން ނިންމާތާ 30 ދުވަހުގެ ތެރޭގައެވެ؛ މިގޮތަށް އިޢުތިރާޒުކުރާއިރު މީރާއިން ފޮނުވި އޮޑިޓް ނޯޓިސް އަށްވެސް އެމަރުޙަލާގައި އިޢުތިރާޒުކުރުމުގެ ޙައްޤު ލިބިގެންވެއެވެ. (ޕެރ. 3(ށ))

މީރާއިން ނިންމާ ނިންމުމެއް ނުވަތަ ފޮނުވާފައިވާ އޮޑިޓް ނޯޓިސްއެއް އިސްތިއުނާފު ކުރެވޭނީ މީރާއިން ކުރާ އޮޑިޓަކަށްފަހު، ޢަދަދެއް ކަނޑައެޅުމުން ޓެކްސް ނެގުމާއިބެހޭ އިދާރީ ޤާނޫނާއި އެޤާނޫނުގެ ބާރުލިބިގެން ހެދިފައިވާ ޤަވާޢިދުތަކުގައި ބުނާ އިޖުރާއާތުތައް ފުރިހަމަކުރުމަށްފަހު ޓެކްސް އެޕީލް ޓްރައިބިއުނަލްގައެވެ؛ އޮޑިޓް ނޯޓިސްއާ ގުޅިގެން އަދި އެއްވެސް ޢަދަދެއް ކަނޑައަޅާފައިނުވާ ޙާލަތަކީ 44 ވަނަ މާއްދާގައި ބުނާ އިސްތިއުނާފުކުރުމުގެ ޙައްޤު އުފަންވެފައިވާ މަރުޙަލާއެއް ނޫނެވެ. (ޕެރ. 3(ނ))

އޮޑިޓް ނޯޓިސްއާ ގުޅިގެން ޢަދަދެއް ކަނޑައަޅާފައިނުވާ ޙާލަތުގައި ޗެލެންޖުކުރުމުގެ ފުރުޞަތު މިހިނދަށް ލިބިނެތް ނަމަވެސް، މީރާގެ ނިންމުމަށް ޗެލެންޖުކުރުމުގެ ފުރުޞަތު އެކުއެކީގައި ގެއްލިގެން ނުދެއެވެ؛ ޢަދަދެއް ކަނޑައަޅާ ހިސާބުން، ޤާނޫނުގެ 42 ވަނަ މާއްދާގައިވާ ގޮތުގެ މަތިން އިޢުތިރާޒުކޮށް، އިޖުރާއާތުތައް ފުރިހަމަކުރުމަށްފަހު ޓެކްސް އެޕީލް ޓްރައިބިއުނަލަށް ޝަކުވާ ހުށަހެޅުމުގެ ފުރުޞަތު އަދި އެޙާލަތުގައި އޮޑިޓް ނޯޓިސް އަށްވެސް ޗެލެންޖްކުރުމުގެ ފުރުޞަތު ލިބި އޮންނާނެއެވެ. (ޕެރ. 3(ނ))

ހައިކޯޓުގެ 2013/HC-A/203 ޤަޟިއްޔާގައި ޤާއިމުކުރައްވާފައިވާ އުސޫލުތަކަށް ރިޢާޔަތްކޮށް، މީރާގެ އޮޑިޓް ނޯޓިސްއަކަށް ޗެލެންޖްކޮށް ހުށަހެޅި މައްސަލަ ސިވިލް ކޯޓުން ބެލުމުގެ އިޚްތިޞާސް ނެތްކަމަށް ކަނޑައެޅުމަކީ ޝަރުޢީ އަދި ޤާނޫނީ އަސްލަކާއި ޚިލާފު ކަމެއް ނޫނެވެ. (ޕެރ. 3، ނިންމުން)