—

ކޯޓު އަމުރުގެ ދަށުން ބަލާފާސްކުރުމަށް ކަނޑައެޅޭތަނެއް އަމުރުގައި ކަނޑައަޅާފައިވާ މުއްދަތުގައި ބަލާފާސްކުރަންވާނެއެވެ؛ އަދި ކޯޓު އަމުރެއްގެ ދަށުން ތަނެއް ބަލާފާސްކުރުމަށް ފުލުހަކު ދާއިރު އެ ތަނެއްގެ ވެރިފަރާތް އެ ތަނެއްގައި ޙާޟިރުވެހުރިނަމަ، ބަލާފާސްކުރުމުގެ އަމުރުގެ ކޮޕީއެއް އެ ތަނުގެ ވެރިފަރާތަށް ދޭންވާނެއެވެ. ކޯޓު އަމުރުގެ ބާރު ހިނގާ މުއްދަތުގައި، އަމުރު ދައްކައިގެން ކުރި ބަލާފާސްކުރުމުގެ ތެރޭގައި ފެނިފައިވާ ހެއްކަކީ ޤާނޫނުއަސާސީގެ 47 ވަނަ މާއްދާގެ (ށ) އާއި 52 ވަނަ މާއްދާއާ ޚިލާފަށް ހޯދާފައިވާ ހެކިކަމަށް ބެލެވެން ނެތެވެ. (ޕެރ. 3(ނ))

ޕެޑްލަރެއް ނޫން (މަސްތުވާތަކެއްޗަށް ދެވިހިފާފައިނުވާ) މީހެއްގެ އަތުގައި ޓްރެފިކްކުރި މީހެއްކަމަށް ބެލެވޭ މިންވަރަށްވުރެ ގިނައިން ޑައިމޯފިން ފެނިއްޖެނަމަ، މަސްތުވާތަކެއްޗާބެހޭ ޤާނޫނަށް ރިޢާޔަތްކޮށް، އޭނާއަކީ މަސްތުވާތަކެތި ޓްރެފިކްކުރާ މީހެއްކަމަށް ބެލެވެން އޮންނަކަމެވެ؛ އަދި މީހެއްގެ ކޮންޓްރޯލް ދަށުގައި ހުންނަ ތަނެއްގައި ނުވަތަ އެއްޗެއްގައި މަސްތުވާއެއްޗެއް ހުރުމަކީ އެ އެއްޗެއް އޭނާގެ އަތުގައި ހުރީކަމުގައި ބެލެވޭނެ ޙާލަތެކެވެ. (ޕެރ. 3(ރ))

މަސްތުވާއެއްޗެއް މީހެއްގެ އަތުގައި ހުރުމަކީ، އިސްތިސްނާއެއްނެތި މުޠުލަޤު މަސްއޫލިއްޔަތު ޤާނޫނީ ގޮތުން އުފުލަންޖެހޭ ކުށެކެވެ؛ މަނާކުރެވިފައިވާ މަސްތުވާއެއްޗެއް މީހެއްގެ އަތުގައި ހުރުމަކީ ކުށުގެ މަސްއޫލިއްޔަތު އުފުލުމަށް ފުދޭ ކާފީ "ޤާނޫނީ ޤަރީނާ" އެކެވެ. (ޕެރ. 3(ޅ))

ކޮންމެ މީހަކީވެސް އެމީހެއްގެ ހިޔާޒަތުގެ ދަށުގައި ހުންނަ ތަކެއްޗާމެދު ޒިންމާ އުފުލަންޖެހޭ މީހަކަށްވާއިރު، އެ ތަކެއްޗާމެދު ޒިންމާ އުފުލަންޖެހޭ ފަރާތެއް ނުދެއްކޭހާ ހިނދަކު ޝަރީޢަތާއި ޤާނޫނުގެ ކުރިމަތީގައި ޒިންމާ އުފުލަންޖެހޭ ފަރާތަކީ އެމީހެއްގެ ހިޔާޒަތުގެ ދަށުގައި އެއެއްޗެއް ހުރި މީހާއެވެ؛ އަދި އެ މީހެއްގެ ހިޔާޒަތުގެ ދަށުން ފެނިފައިވާ މަސްތުވާތަކެއްޗާމެދު ޝަރުޢީ އަދި ޤާނޫނީ ހަމަތަކުގެ މަތިން ޒިންމާ އުފުލަންޖެހޭ އެހެން ފަރާތެއް ދެއްކިއްޖެނަމަ، އެ މީހަކީ އެ ކުށުގެ ޒިންމާއިން ބަރީޢަވެގެންވާ މީހެކެވެ. (ޕެރ. 3(ޅ))

މީހެއްގެ އަތުން ނުވަތަ މީހެއްގެ ހިޔާޒަތުގެ ދަށުން މަސްތުވާތަކެތި ފެނިފައިވާ ޙާލަތުގައި، އެ ތަކެއްޗަކީ އެމީހެއްގެ އެއްޗެއް ނޫންކަމަށް ނުވަތަ އެ ތަކެއްޗަކީ މިވެނި މީހެއްގެ ތަކެތިކަމަށް ހަމައެކަނި ބުނެލާ ބުނުމަކުން އެ ތަކެއްޗާމެދު އުފުލަންޖެހޭ ޒިންމާއިން ބަރީޢަ ނުވެވޭނެއެވެ؛ ނަމަވެސް، މައްސަލައިގެ ޙާލަތާއި، ވަގުތާއި އަދި އެކަމުގައި ވަށައިގެންވާ ކަންކަމުގެ މައްޗަށް ރިޢާޔަތްކުރަންޖެހޭނެއެވެ. (ޕެރ. 3(ޅ))

އެހެން މީހަކު މަސްތުވާތަކެއްޗާމެދު ޝަރީޢަތުގައި ޒިންމާ ނަގާފައިވިޔަސް، އޭނާގެ ބަހަށް ބާރު ލިއްބައިދޭ އެއްވެސް ހެއްކެއް އަދި ޤަރީނާއެއް ހުށަހެޅިފައިނުވާނަމަ، އަދި އޭނާގެ ހެކިބަހުގައި ފުށުއެރުންތައް ހުރިނަމަ، މައްސަލައިގެ ހާދިސާ ހިނގި ވަގުތާއި، ޙާލަތާއި، ވަށައިގެންވާ އެހެނިހެން ކަންކަމަށް ރިޢާޔަތްކޮށް، ހަމައެކަނި އެ މީހާ ބުނެލާ ބުނެލުމެއްގެ މައްޗަށް ރިޢާޔަތްކޮށް ދަޢުވާލިބޭ ފަރާތުގެ ޒިންމާއިން ބަރީޢަ ނުވެވޭނެއެވެ. (ޕެރ. 3(ޅ))

ދަޢުވާލިބޭ ފަރާތް ތަޅުލައިގެން ގެންގުޅޭ، އެހެން މީހަކު ބޭނުންނުކުރާ، އޭނާގެ މުޙިއްމު ލިޔެކިޔުންތަކާއި ފައިސާ ރައްކާކުރާ ވަތްގަނޑަކުން މަސްތުވާތަކެތި ފެނުމަކީ އެއްވެސް އިސްތިސްނާއެއްނެތި މުޠްލަޤު މަސްޢޫލިއްޔަތު އުފުލަންޖެހޭ ކުށެކެވެ؛ މިއީ ބަންދުކޮށްގެން ނުގެންގުޅޭ، އެހެން މީހުން ވަދެ ނިކުމެ ހަދާ ކޮޓަރިއެއްގައި އަލަމާރިއެއްގެ މަތީގައި ހުރި އުރައަކުން މަސްތުވާތަކެތި ފެނުނު ޙާލަތާ ތަފާތު ޙާލަތެކެވެ. (ޕެރ. 3(ޅ))