—

ޤާނޫނު ނަންބަރު 2010/22 (ދިވެހިރާއްޖޭގެ ކޯޓުތަކުގެ ޤާނޫނު) ގެ 18 ވަނަ މާއްދާގެ (ށ) ގައިވާ ގޮތުގެ މަތިން އަލުން ބެލުމަށް ހައިކޯޓަށް ތަޙްވީލުކުރާ މައްސަލަ މައުޟޫޢީގޮތުން ބަލަންވާނީ، އެ މައްސަލައެއްގައި ސުޕްރީމްކޯޓުން ކަނޑައެޅި ޤާނޫނީ ނުކުތާގެ ތަރަހައިގެ ތެރޭގައެވެ. (ޕެރ. (ރ))

ޤާނޫނު ނަންބަރު 4/91 (ކޮންޓްރެކްޓާބެހޭ ޤާނޫނު) ގެ 11 ވަނަ މާއްދާގެ (ހ) އާއި، 17 ވަނަ މާއްދާއާއި، 21 ވަނަ މާއްދާގެ (ހ) އާއި، 22 ވަނަ މާއްދާގެ (ހ) އަށް ބަލާއިރު، އެއްބަސްވުން ބާތިލުކުރެވޭނެކަމަށް އެއްބަސްވުމުގައި ބުނެފައިވާނަމަ އެގޮތަކަށް، ނުވަތަ އެއްބަސްވުމުގެ ބައިވެރިންގެ ބާރު ނުފޯރާ ޙާދިސާއެއް މެދުވެރިވެގެން، ނުވަތަ އެއްބަސްވުން ނިމުމަކަށް ގެނައުމަށް ބައިވެރިން އެއްބަސްވެގެން، ނުވަތަ އެއްބަސްވުން ޣައިރު ޤާނޫނީވެގެން، ނުވަތަ އެއްބަސްވުމުގެ މުއްދަތު ހަމަވެގެން، ނުވަތަ އަނބުރާ އިޢާދަނުކުރެވޭ ފަދަ ޚިލާފުވުމަކުން ބައިވެރިއަކު އެއްބަސްވުމާ ޚިލާފުވެގެން އެއްބަސްވުން ބާތިލުކުރެވިދާނެއެވެ. (ޕެރ. (ކ))

ދެފަރާތެއްގެ ދެމެދުގައިވެފައިވާ އެއްބަސްވުމެއް ބާތިލުކުރުމަށް ނުވަތަ އެއްބަސްވުން ބާތިލުވެއްޖެކަމަށް ހުށަހަޅާ މައްސަލަތަކުގައި އެންމެ ފުރަތަމަ ބަލަންޖެހޭނީ، އެއްބަސްވުން ބާތިލުކުރުމަށް ނުވަތަ ބާތިލުވެއްޖެކަމަށް ކަނޑައެޅުމުގައި އެއްބަސްވުމުގެ ދެބައިވެރިންގެ މެދުގައި އެއްބަސްވެފައިވަނީ ކޮންގޮތަކަށްތޯއެވެ. (ޕެރ. (ކ))

އެއްބަސްވުމުގެ ބައިވެރިއަކު އެއްބަސްވުމާ ޚިލާފުވެގެންކަމަށް ބުނެ އެއްބަސްވުން ބާތިލުކުރަން ހުށަހަޅާއިރު، މިއީ އެއްބަސްވުމުގެ ދަށުން އެއްބަސްވުން ބާތިލުކުރުމަށް ދެފަރާތުން އެއްބަސްވެފައިވާ ސަބަބެއްތޯއާއި، އެއްބަސްވުމާ ޚިލާފުވެ ކުރިކަމަށްބުނާ ޢަމަލަކީ ދެވަނަ ބައިވެރިޔާ ޤަސްދުގައި ކުރިކަމެއްތޯ ބެލެވެންޖެހޭނެއެވެ. ޚިލާފުވިކަމަށް ބުނާ ޢަމަލަކީ ޚިލާފުވުމުގެ ނިޔަތެއްނެތި ކުރިކަމެއްކަމަށް ބައިވެރިއަކު ބުނަނީނަމަ، އެކަން ޝަރީޢަތުގެ ފަރާތުން ބަލަންޖެހޭނެއެވެ. (ޕެރ. (ކ))

ޢާއްމު އުސޫލެއްގެ ގޮތުން ދެފަރާތެއްގެ ދެމެދުގައިވެވޭ އެއްބަސްވުމެއްގެ ދަށުން އެއްފަރާތުން އަނެއްފަރާތަށް އަދާކުރަންޖެހޭ ޒިންމާތައް އެއްބަސްވެފައިވާ ގޮތަށް އަދާކުރަމުން ނުދަނީނަމަ، އެއީ އެއްބަސްވުމެއް ނިމުމަކަށް ގެނެވިދާނެ ޙާލަތެއްކަމަށް ބެލެވިދާނެއެވެ. އެހެންނަމަވެސް، އެސަބަބަށްޓަކައި އެއްބަސްވުމަކީ ބާތިލު އެއްބަސްވުމެއްކަމަށް ކަނޑައަޅާއިރު، އަދާނުކުރި ޒިންމާއަކީ އެސަބަބަށްޓަކައި އެއްބަސްވުން ބާތިލުކުރަންޖެހޭފަދަ ޒިންމާއެއްކަން ނުވަތަ ނޫންކަން ދެނެގަނެވިދާނީ ދެފަރާތުގެ ދެމެދުގައިވެފައިވާ އެއްބަސްވުމުގެ މައްޗަށް ރިޢާޔަތްކޮށްގެންނެވެ. (ޕެރ. (އ))

އެއްބަސްވުމުގެ މާއްދާއެއްގައިވާ ޒިންމާއެއް އަދާނުކޮށްފިނަމަ ކަންކުރަންޖެހޭނެ ގޮތް އެއްބަސްވުމުގެ އެމާއްދާގައި ބަޔާންކޮށްފައިވާނަމަ، އެ ޒިންމާ ބުނާ ތާރީޚުގައި އަދާނުކުރެވި އޮތުމަކީ ހަމައެކަނި އެސަބަބަށްޓަކައި މުޅި އެއްބަސްވުމަކީ ބާތިލުވެފައިވާ އެއްބަސްވުމެއްކަމަށް ބަލަންޖެހޭ ސަބަބެއް ނޫނެވެ. (ޕެރ. (އ))

އެއްބަސްވުމުގެ މުއްދަތު ހަމަވުމުގެ ކުރިން އެއްބަސްވުން ބާތިލުކުރަންޖެހޭނަމަ ޢަމަލުކުރަންޖެހޭނީ، އެކަމަށް އެއްބަސްވުމުގައި ބަޔާންކުރާ ގޮތަށެވެ. (ޕެރ. (އ))

ޙުކުމް ކުރުމަށް ބާއްވާ މަޖިލީހަށް ޙާޟިރުނުވެވޭނެ ޢުޛުރަކަށް ހައިކޯޓު ޤަވާޢިދުގައި ބަޔާންކޮށްފައިވާފަދަ މެޑިކަލް ސެޓްފިކެޓެއް ހުށަހަޅާފައި ނުވާއިރު، ޙުކުމް ކުރެވޭ މަޖިލީހަކީ ޚަސްމުންނަށް އިތުރަށް ވާހަކަ ދެއްކުމުގެ ފުރުޞަތު ނުދެވޭ މަޖިލީހަކަށްވުމުން، ޝަރީޢަތަށް ޙާޟިރުނުވީކަމުގައި ބަލައި އޭނާގެ ޣައިރު ޙާޟިރުގައި ޙުކުމް ކުރެވިދާނެއެވެ. (ޕެރ. (ވ))