—

ކޮންޓްރެކްޓަކީ ދެ މީހެއްގެ ދެމެދުގައި ނުވަތަ އެއަށްވުރެ ގިނަ ބައެއްގެ މެދުގައި އެއްބަސްވެވޭ އެއްބަސްވުމެއް ކަމަށާއި، އެ އެއްބަސްވުމަކީ ޤާނޫނު ޤަބޫލުކުރާ ނުވަތަ ޤާނޫނު ބާރުދޭ އެއްބަސްވުމަކަށް ވާންވާނެ ކަމަށާއި، ކޮންޓްރެކްޓެއްގައި އެއްބަސްވާ މީހުން ރުހި ޤަބޫލުވާންވާނީ އެއްވެސް މަޖްބޫރުކަމެއް ނެތި އަމިއްލަ އިޚްތިޔާރުގައި ކަމަށާއި، އެ މީހުންނަކީ ކޮންޓްރެކްޓް ކުރުމަށް ޤާނޫނު ޤަބޫލުކުރާ ފަދަ މީހުން ކަމުގައި ވާންވާނެ ކަމަށާއި، އެކަކު އަނެކަކަށް ހުށަހަޅާ ހުށަހެޅުން އެހުށަހެޅުން ރައްދުވީ ފަރާތުން ޤަބޫލު ކުރުމުން ކޮންޓްރެކްޓެއް ކުރެވޭނެ ކަމަށް ކޮންޓްރެކްޓާބެހޭ ޤާނޫނުން އެނގެއެވެ. (ޕެރ. 2(ށ))

ޢާންމު އުޞޫލެއްގެ ގޮތުން ދެފަރާތެއްގެ ދެމެދު ވެވޭ އެއްބަސްވުމަކަށް ޢަމަލުކުރަން ޖެހޭނީ އެއެއްބަސްވުމުގެ ބައިވެރިންގެ މައްޗަށް ކަމާއި، އެއެއްބަސްވުމުގައި ބައިވެރިއެއް ކަމުގައިނުވާ ފަރާތެއްގެ މައްޗަށް ޢާންމު އުޞޫލެއްގެ ގޮތުން އެއްބަސްވުމުގެ ދަށުން ކަންކަން ލާޒިމްނުކުރެވޭނެއެވެ. މިއީ ކޮމަންލޯގައި ބޭނުންކުރާ "ޕްރިވިޓީ އޮފް ކޮންޓްރެކްޓް" (Privity of Contract) ގެ މަބްދަޢު ކަމާއި، މި މަބްދަޢުއަކީ ދިވެހިރާއްޖޭގެ ޝަރުޢީ ކޯޓުތަކުން ވެސް ބަލައިގަނެފައިވާ މަބްދަޢެކެވެ. (ޕެރ. 2(ރ))

"ޕްރިވިޓީ އޮފް ކޮންޓްރެކްޓް" މަބްދަޢުން އިސްތިސްނާކުރެވޭ ޚާއްޞަ ޙާލަތްތަކަކީ: އެޖެންޓަކު އޭނާ ޢައްޔަންކުރި ފަރާތް ތަމްސީލުކޮށް އޭނާއަށް ދީފައިވާ ބާރުގެ ތެރެއިން ވެވޭ އެއްބަސްވުމަށް އެ އެޖެންޓް ތަމްސީލުކުރާ ފަރާތް (ޕްރިންސިޕަލް) ޒިންމާވާން ޖެހޭ ޙާލަތާއި، ކޮލެޓްރަލް އެއްބަސްވުމެއްގެ ދަށުން ތިންވަނަ ފަރާތަކަށް ޒިންމާވާން ޖެހޭ ޙާލަތާއި، އިކުއިޓީގެ މަބްދަޢުގެ ދަށުން މުދަލެއް އަމާނާތެއްގެ ގޮތުގައި ބެލެހެއްޓުމަށް ޙަވާލުވެފައިވާ ފަރާތަކުން ތިންވަނަ ފަރާތަކަށް ޒިންމާވާންޖެހޭ ޙާލަތާއި، އެއްބަސްވުމެއްގައި ހިމެނޭ ޝަރުޠެއްގެ ސަބަބުން ތިންވަނަ ފަރާތަކަށް ޒިންމާވާންޖެހޭ ޙާލަތާއި، ޤާނޫނެއްގެ ދަށުން ތިންވަނަ ފަރާތަކަށް ޒިންމާވާންޖެހޭ ޙާލަތާއި، ކޮންޓްރެކްޓެއްގެ ދަށުން ގެއްލުމުގެ ބަދަލު ތިންވަނަ ފަރާތަކަށް އަދާކުރަންޖެހޭ ޙާލަތްތަކެވެ. (ޕެރ. 2(ރ))

ބިމާއި ޢިމާރާތުގެ ކުރީގެ މިލްކުވެރިޔާއާއި ކުލިހިފި ފަރާތާ ދެމެދު ވެފައިވާ އެއްބަސްވުމާ އެއްގޮތަށް ޢަމަލުކުރުން އެތަން ގަތް ފަރާތުގެ މައްޗަށް ލާޒިމްކޮށްފައިވާ ފަދަ ޝަރުޠެއް ނުވަތަ މާއްދާއެއް ވިއްކުމުގެ މުޢާމަލާތުގެ ތެރޭގައި ހިމެނިފައިވާކަން ސާބިތުނުވާނަމަ، އަދި އެއްބަސްވުމުގައި ނުހިމެނޭ ތިންވަނަ ފަރާތަކަށް އެއެއްބަސްވުމުގެ ބައިވެރިއަކު ޒިންމާވާންޖެހޭ އިސްތިސްނާ ޙާލަތެއް ނެތްނަމަ، ކުރިން ވެފައިވާ ކުއްޔަށް ދިނުމުގެ އެއްބަސްވުމަށް ޢަމަލުކުރުމަށް އެތަން ގަތް ފަރާތުގެ މައްޗަށް ލާޒިމްކުރެވޭނެ ސަބަބެއް ނެތެވެ. (ޕެރ. 2(ރ)، 2(ށ))