ޕްރޮސިކިއުޓަރ ޖެނެރަލް ވ. ފާޠިމަތު ނަބާހާ

ކުށުގެ ދަޢުވާ ލިބޭ މީހާއަށް ތުހުމަތުކުރެވޭ ކުށް ދޭހަވާ ބަހުން ލަސްނުކޮށް އެންގުމާއި، ބަރީއަވުމަށް އެކަށީގެންވާ ވަގުތާއި ވަސީލަތް ދިނުމާއި، ޤާނޫނީ ވަކީލަކާ މަޝްވަރާކުރުމުގެ ފުރުޞަތު ދިނުން ޤާނޫނުއަސާސީގެ 51 ވަނަ މާއްދާއިން ލާޒިމުކުރާއިރު، ވަކީލެއް އައްޔަންކުރުމުގެ ފުރުޞަތު ދީފައިވާއިރު ދަޢުވާލިބޭ ފަރާތް ވަކީލަކާ ނުލައި މައްސަލަ ކުރިއަށް ގެންދަން އެދިއްޖެނަމަ، އޭނާގެ ޤާނޫނުއަސާސީ ޙައްޤުތައް ލިބިދީފައިވާ ކަމަށް ބެލެވޭނެއެވެ. (ނުކުތާ 3(ށ))

ޒިނޭގެ ކުށަކީ އިސްލާމީ ޝަރީޢަތުގައި ޙައްދު ކަނޑައެޅިފައިވާ ކުށެއް ކަމަށާއި، ޒިނޭކުރިކަން ސާބިތުކުރެވޭނީ ޒިނޭކުރި މީހާގެ އިޢުތިރާފުން ނުވަތަ މަދުވެގެން 4 ފިރިހެނުންގެ ހެކިބަހުން ކަމަށެވެ. (ނުކުތާ 3(ނ))

ޒިނޭގެ ކުށަށްވާ އިޢުތިރާފު ޞައްޙަވުމަށް، އިޢުތިރާފުވާ މީހާ ބުއްދި ސަލާމަތުން ހުރުމާއި ބާލިޣުވުމާއި، އެ އިޢުތިރާފަކީ އަމިއްލަ އިޚްތިޔާރުގައި ވެފައިވާ އިޢުތިރާފަކަށް ވުން ޝަރުޠެވެ. (ނުކުތާ 3(ނ))

ޖިނާއީ އިޢުތިރާފަކީ މައްސަލަ ބަލާ ފަނޑިޔާރުގެ އިޤްތިނާޢުގެ މައްޗަށް ބިނާކޮށް ޤާއިމުވާ ދަލީލެއް ކަމަށާއި، އިޢުތިރާފުން ރުޖޫޢަވުމާއި އެ ރުޖޫޢަވުން ބިނާކުރި ސަބަބުތައް ވަޒަންކޮށް ތަޤްޔީމުކުރުމަކީ މައްސަލަ ބަލާ ފަނޑިޔާރަށް ލިބިގެންވާ ބާރެކެވެ. (ސުޕްރީމް ކޯޓުގެ A/23-2011/SC ގެ ނުކުތާ 6 ނަޤުލުކޮށް) (ނުކުތާ 3(ރ))

ޖިނާއީ އިޢުތިރާފަކީ ރުޖޫޢަވެވޭނެ އިޢުތިރާފެއް ކަމަށާއި، ޒިނޭގެ ކުށަށްވާ އިޢުތިރާފުން ޙުކުމް ތަންފީޛުކޮށް ނިމުމުގެ ކުރިން ޢަމަލަކުން، ޢިޝާރާތަކުން ނުވަތަ ބަހަކުން ރުޖޫޢަވެވިދާނެ ކަމަށާއި، ރުޖޫޢަވެއްޖެނަމަ ޙައްދު ޤާއިމުކުރުމުން ދުރުހެލިވާން ޖެހޭނެއެވެ. (ސުޕްރީމް ކޯޓުގެ A/23-2011/SC އާއި ހައިކޯޓުގެ A/122-2013/HC އަށް ތަބާވެ) (ނުކުތާ 3(ނ)، 3(ރ))

ދަޢުވާ ސާފުވެއްޖެ ކަމަށާއި ޒިނޭއަކީ ކޮބައިކަން އެނގޭ ކަމަށް ބުނެ، ޝަރީޢަތުގެ މަޖިލީހުގައި ވެފައިވާ އިޢުތިރާފެއް ތަޙްޤީޤުގައި ދީފައިވާ ބަޔާނާ އެއްގޮތްވެ، ހައިކޯޓުގައިވެސް އެ އިޢުތިރާފު ކަށަވަރުކޮށްދީ، އެއިން ރުޖޫޢަވެފައި ނުވާނަމަ، އެއީ އަމިއްލަ އިޚްތިޔާރުގައި، ހަމަބުއްދީގައި، ބާލިޣުވެ ތަޞައްރަފު ފުދިފައިވާ ޙާލު ވެފައިވާ ޞައްޙަ އިޢުތިރާފެއް ކަމުގައި ބަލައި، އޭގެ މައްޗަށް ޒިނޭގެ ކުށް ސާބިތުވާނެއެވެ. (ނުކުތާ 3(ރ))

ޒިނޭގެ ކުށަށް އަދަބު ކަނޑައެޅުމުގައި، މި ބާވަތުގެ ކުށެއް ދަޢުވާލިބޭ ފަރާތުގެ މައްޗަށް ސާބިތުވާ ފުރަތަމަ ފަހަރުކަމަށް ރިޢާޔަތްކޮށް، ޖިންސީ ކުށުގެ ޤާނޫނުގެ 27 ވަނަ މާއްދާގެ (ށ) ގެ ދަށުން 100 އެތިފަހަރުން ޙައްދު ޖެހުމާއެކު 1 އަހަރު ގޭބަންދަށް ޙުކުމްކުރުމަކީ ޝަރުޢީ އަދި ޤާނޫނީ އުޞޫލުތަކާ އެއްގޮތް ކަމެކެވެ. (ނުކުތާ 3(ބ))