މަރްޔަމް ޝިފާ ވ. މުހައްމަދު އަނީސް

ނަތީޖާ: ދަށުކޯޓުގެ ޙުކުމް ބާޠިލު

ކީވޯޑުތައް: މަދަނީ، އެއްބަސްވުމާ މެދު ޚިލާފު އުފެދިގެން

ދަށު ކޯޓު: ސިވިލް ކޯޓު 2491/Cv-C/2016

ކޯޓުން ނިންމަން ޖެހުނު ސުވާލު

ސުޕްރީމް ކޯޓު 2012/SC-A/30 ގެ ޙުކުމުން ޙަވާލުކުރަން އަމުރުކުރި 'ބެއްލަންވިލާ' ދޯނި އޭގެ ޒާތުގައި ޙަވާލުކުރެވޭނެތޯ ބެލުމުގެ ތަންފީޛީ މައްސަލަ އިސްތިއުނާފީ މަރުޙަލާގައި ކުރިއަށް ދަނިކޮށް، އެ ދޯނީގެ އަގު ކަނޑައަޅައި ސިވިލް ކޯޓުން ކުރި ޙުކުމަކީ ޞައްޙަ ޙުކުމެއްތޯ.

ކަނޑައެޅި ޤާނޫނީ އުޞޫލުތައް

1. ސުޕްރީމް ކޯޓުގެ ޙުކުމެއް ތަންފީޛުކުރުމާ ގުޅޭ މައްސަލައެއް (ޙުކުމުގައިވާ ތަކެތި އޭގެ ޒާތުގައި ޙަވާލުކުރެވިދާނެތޯ ކަނޑައެޅުމުގެ މައްސަލަ) އިސްތިއުނާފީ މަރުޙަލާގައި ކުރިއަށް ދަނިކޮށް، އެ ތަކެއްޗާ ނުވަތަ އޭގެ ބަދަލާ ގުޅޭ އެއް މައުޟޫޢެއްގައި ދަށުކޯޓުން ތަކެތީގެ އަގު ނުވަތަ ބަދަލު ކަނޑައަޅައި ޙުކުމްކުރުމަކީ ސުޕްރީމް ކޯޓުގެ ނިންމުން ތަންފީޛުކުރުމަށް ހުރަސްއެޅިދާނެ ކަމެއް ކަމަށާއި، ޢަދުލުއިންޞާފު ޤާއިމުކުރުމަށް ހުރަސްއަޅައި ޝަރުޢީ ނިޒާމަށް އޮންނަ އިތުބާރަށް އަސަރުކުރާނެ ކަމެއް ކަމަށް؛ އެފަދަ ޙުކުމަކީ ސުޕްރީމް ކޯޓު 2016/SC-A/20 ގެ ނިންމުމަށް ރިޢާޔަތްކޮށް ބާޠިލުކުރަންޖެހޭ ޙުކުމެއް ކަމަށް.
2. ދެ މައްސަލައެއްގެ މައުޟޫޢު އެއްކަން ކަނޑައަޅަން ބަލަނީ ދެ މައްސަލައިގައި ނިންމަންޖެހޭ މައިގަނޑު ކަމަށް ކަމަށާއި، ތަންފީޛީ މައްސަލައާއި އަގު ހޯދުމުގެ މައްސަލަ ދެކޮޅުވެސް 'ބެއްލަންވިލާ' ދޯނި ނުވަތަ އެ ދޯނީގެ ބަދަލާ ގުޅޭ ހަމަ އެއް މައުޟޫޢެއް ކަމަށް ފާހަގަކުރި.

ބަލާފައިވާ ޤާނޫނުތައް

• ސުޕްރީމް ކޯޓު 2016/SC-A/20
• ސުޕްރީމް ކޯޓު 2012/SC-A/30
• ސުޕްރީމް ކޯޓު 2020/SC-HCL/02 (އިސްތިއުނާފުކުރުމުގެ ހުއްދަ ދިން ނިންމުން)
• ސުޕްރީމް ކޯޓު 2017/SC-A/39 (މުޙައްމަދު ޝަވީދު ވ. މުޙައްމަދު ލަޠީފު) (ފުޓްނޯޓު)
• ހައިކޯޓު 2003/HC-A/127 (ފަސްމަންޒަރު)
• ހައިކޯޓު 2009/HC-A/319 (ފަސްމަންޒަރު)