މޯލްޑިވްސް އެއަރޕޯޓްސް ކޮމްޕެނީ ލިމިޓެޑް ވ. ހާމިދު ރިޟާ

ވަގުތީ އަމުރަކީ ހުށަހެޅިފައިއޮތް ޤަޟިއްޔާއެއްގައި ޝަރީޢަތުން ޙުކުމްކުރުމުގެ ކުރިން ބީވެގެން ހިނގައިދާނެ މަޞްލަޙަތެއް ޙިމާޔަތްކުރުމުގެ ގޮތުން ވަކި ކަންތައްތަކަކަށް ރިޢާޔަތްކޮށް ވަގުތީގޮތުން ނެރޭ އަމުރެކެވެ؛ ވަޒީފާއާބެހޭ ޓްރައިބިއުނަލުގެ ޤަވާޢިދުން ވަގުތީ އަމުރު ނެރުމުގެ އިޚްތިޔާރު ލިބިދީފައިވާ ނަމަވެސް އެއީ މުޠުލަޤު ބާރެއް ނޫނެވެ. (ޕެރ. 5.5)

ވަގުތީ އަމުރު ނެރުމުގައި ސުޕްރީމް ކޯޓުގެ 2012/SC-A/21 ގައި ކަނޑައަޅާފައިވާ ޝަރުޠުތައް ފުރިހަމަވޭތޯ ކޯޓުތަކާއި ޓްރައިބިއުނަލްތަކުން ބަލަންޖެހެއެވެ: (ހ) ޤާނޫނީ ޙިމާޔަތް ލިބެންޖެހޭ މައުޟޫޢީ ޙައްޤެއް ނުވަތަ ޤާނޫނީ މަރްކަޒެއް އޮތުމުގެ އިޙްތިމާލު ފާޅުކަން ބޮޑުކޮށް ޤާއިމުވުން (fumus boni juris)؛ (ށ) ވަގުތީ އަމުރު ނުނެރެ މައުޟޫޢީ ދަޢުވާ ލަސްވެއްޖެނަމަ ކުރިމަތިވެދާނެ ނުރައްކަލެއް އޮތުން (periculum in mora)؛ (ނ) އަމުރަށް އެދޭ ފަރާތަށް އެކަމަށް އެދުމުގެ ޞިފަތު (capacity) ލިބިގެންވުން. (ޕެރ. 5.6)

ވަގުތީ އަމުރު ނުނެރެފިނަމަ ކުރިމަތިވާނެ ނުރައްކާ ނުވަތަ ގެއްލުން ވަޒަންކުރުމުގައި، އެ ގެއްލުމަށް އެކަށީގެންވާ ބަދަލެއް ދެވިދާނެތޯ ބަލަންޖެހޭއިރު، އަމުރު ނެރުމުން އަނެއް ޚަޞްމަށް ކުރިމަތިވާ ގެއްލުމަކީ މާލީ ގޮތުން އަގުކުރެވިދާނެ ކަމެއްނަމަ އެކަމަށާއި، ލިބޭ ގެއްލުމަކީ އިޢާދަ ނުވަތަ އިޞްލާޙު ނުކުރެވޭނެ ގެއްލުމެއްނަމަ އެކަމަށްވެސް ކޯޓުން ރިޢާޔަތްކުރަންޖެހެއެވެ. (ޕެރ. 5.7)

ވަގުތީ އަމުރެއް ނެރުމުގައި ޝަރުޠުތައް ފުރިހަމަވޭތޯ ކަނޑައަޅަނީ އެ މައްސަލައެއްގެ ޙަޤީޤަތްތަކާއި ވަށައިގެންވާ ކަންކަމަށް ބަލައި، ޙާލަތާއި މައްސަލައިގެ ޠަބީޢަތާ ގުޅޭ ގޮތަށެވެ. (ޕެރ. 5.8)

ވަޒީފާ އިޢާދަކުރުމަށް އެދި ހުށަހަޅާ މައްސަލައެއްގައި، އެ މަޤާމަށް ދާއިމީ ގޮތެއްގައި އެހެން މީހަކު ޢައްޔަންކުރެވިއްޖެނަމަ ވަޒީފާ އިޢާދަކުރުމުގެ ނިންމުމެއްގެ ބާރު ނެތިދާނެ އިޙްތިމާލު އޮތުމަކީ މައުޟޫޢީ ޙައްޤެއް އޮތުމުގެ އިޙްތިމާލާއި ލަސްވުމުގެ ނުރައްކަލުގެ ޝަރުޠު ފުރިހަމަވާ ޙާލަތެކެވެ؛ ހަމައެކަނި ދާއިމީ މުވައްޒަފަކު ނެގުން މަޑުޖައްސާލާ އަމުރަކީ ދެފަރާތަށް ކުރިމަތިވާ ގެއްލުމަށް ރިޢާޔަތްކޮށްފައިވާ އަމުރެކެވެ. (ޕެރ. 5.9)

ވަގުތީ އަމުރަކަށް އެދޭ ފަރާތަށް ލިބިދާނެކަމަށް ފެންނަ ގެއްލުމެއް ސާބިތުކޮށްދޭން ނުޖެހެއެވެ؛ ނަމަވެސް އެ ފިޔަވަޅު ނާޅައިފިނަމަ ޙުކުމުގެ މަޤްޞަދު ޙާޞިލުނުވެ ހިނގައިދާނެކަމަށް ޤަބޫލުކުރެވޭ ސަބަބުތަކެއް ހުރެއްޖެނަމަ ނުވަތަ ފަރާތަކަށް ގެއްލުމެއް ލިބިދާނެކަމަށް ފެނިއްޖެނަމަ ވަގުތީ އަމުރު ނެރުމުގެ ބާރު ލިބިގެންވެއެވެ. (ޕެރ. 5.9)