މާލޭ ވޯޓަރ އެންޑް ސްވަރޭޖް ކޮމްޕެނީ ޕވޓ ލޓޑ ވ. ސިބްކޯ ޕވޓ ލޓޑ

މައްސަލައެއްގައި ކުރެވޭ ޙުކުމުގެ މަޤްޞަދު ޙާޞިލުނުވެ ހިނގައިދާނެކަމަށް ޤަބޫލުކުރެވޭ ސަބަބުތައް ހުރެއްޖެނަމަ، ނުވަތަ ފަރާތަކަށް ލިބިދާނެ ގެއްލުމެއް ހުއްޓުވުމަށްޓަކައި، ޝަރީޢަތް ނިމުމުގެ ކުރިން ވަގުތީ އަމުރެއް ނުވަތަ ވަގުތީ ފިޔަވަޅެއް ކޯޓަށް އެޅިދާނެއެވެ. (ޕެރ. 3.1)

ވަގުތީ އަމުރެއްގެ މައްޗަށް ގޮތެއް ކަނޑައަޅާ މަރުޙަލާއަކީ މައުޟޫޢީ ޙައްޤު ނުވަތަ ޤާނޫނީ މަރުކަޒު ސާބިތުކުރެވޭ ނުވަތަ ނަފީކުރެވޭ މަރުޙަލާއެއް ނޫނެވެ؛ އޭގެ މަޤްޞަދަކީ މައްސަލަ ހުށަހެޅިއިރު ކަންއޮތް ޙާލަތު ޝަރީޢަތުން ގޮތެއް ކަނޑައަޅަންދެން ދަމަހައްޓަންޖެހޭތޯ ކަނޑައެޅުމެވެ؛ މިގޮތުން ޙުކުމުގެ މަޤްޞަދު ގެއްލިދާނެ ސަބަބުތަކާއި، ފަރާތްތަކަށް ލިބިދާނެ ގެއްލުމާއި، އެ ގެއްލުން އަނބުރާ އިޢާދަކުރެވޭ މިންވަރު ވަޒަންކުރަންޖެހެއެވެ. (ޕެރ. 3.4)

ސުޕްރީމް ކޯޓުގެ 2012/SC-A/21 ގެ ދަށުން ވަގުތީ އަމުރު ނެރުމުގެ ޢާއްމު ޝަރުޠުތަކަކީ: ޤާނޫނީ ޙިމާޔަތް ލިބެންޖެހޭ މައުޟޫޢީ ޙައްޤެއް ނުވަތަ ޤާނޫނީ މަރުކަޒެއް އޮތުމުގެ އިޙްތިމާލު ފާޅުކަން ބޮޑުގޮތެއްގައި ޤާއިމުވުން (fumus boni iuris)، އަޞްލު ދަޢުވާ ލަސްވެއްޖެނަމަ ކުރިމަތިވެދާނެ ނުރައްކަލެއް އޮތުން (periculum in mora)، އަދި އަމުރަށް އެދުމުގެ ޞިފަތު (capacity) ލިބިގެންވުމެވެ. (ޕެރ. 3.5)

ވަގުތީ އަމުރަކަށް އެދިއްޖެނަމަ ކޯޓުން ފުރަތަމަ ބަލަންޖެހޭނީ މައުޟޫޢީ ޙައްޤެއްގެ އިޙްތިމާލާއި އެދުމުގެ ޞިފަތު އޮތްތޯއެވެ؛ އެ ދެ ޝަރުޠު ފުރިހަމަވާނަމަ، އަމުރު ނުނެރެއްޖެނަމަ ކުރިމަތިވާނެ ނުރައްކަލާއި ގެއްލުމާއި، އެ ގެއްލުމަށް އެކަށީގެންވާ ބަދަލެއް ދެވިދާނެތޯ ބަލަންޖެހޭނެއެވެ؛ އަނެއް ފަރާތަށް ކުރިމަތިވާ ގެއްލުމާއި އުނދަގޫއަށާއި، ގެއްލުމަކީ އިޢާދަނުކުރެވޭނެ ގެއްލުމެއްތޯވެސް ރިޢާޔަތްކުރަންޖެހެއެވެ. (ޕެރ. 3.5)

ވަގުތީ އަމުރުގެ ކޮންމެ މައްސަލައެއްވެސް އޭގެ ޙަޤީޤަތްތަކާއި ވަށައިގެންވާ ކަންކަމަށް ބަލައި ވަކިން ވަޒަންކުރަންޖެހޭނެއެވެ؛ ވަގުތީ އަމުރު ނެރުމުގެ އުޞޫލުތަކަކީ ޙާލަތާއި މައްސަލައިގެ ޠަބީޢަތާ ގުޅިގެން ބަދަލުވާ އުޞޫލުތަކެކެވެ. (ޕެރ. 3.6)

ގިނަ އަހަރުތަކަކަށް ކުއްޔަށް ހިފައި ޚަރަދުކޮށްފައިވާ ތަނެއްގެ އެއްބަސްވުން ބާޠިލުކުރުމުގެ ނޯޓިސްގެ މުއްދަތު، ދަޢުވާއާމެދު ގޮތެއް ނިންމުމުގެ ކުރިން ހަމަވެ، ތަން ދޫކޮށްލަން ޖެހި، އެހެން ފަރާތަކަށް އެތަން ބޭނުންކުރުމުގެ ފުރުޞަތު ލިބުމަކީ އަނބުރާ އިޢާދަކުރެވޭ ގެއްލުމެއް ނޫނެވެ؛ މިފަދަ ޙާލަތެއްގައި ދެފަރާތުގެ ގެއްލުން ވަޒަންކުރުމުން ދަޢުވާކުރާ ފަރާތަށް ލިބޭ ގެއްލުން ބޮޑުވާނަމަ، ނޯޓިސްއަށް ޢަމަލުކުރުން ފަސްކުރުމުގެ ވަގުތީ އަމުރު ނެރުމަކީ ސުޕްރީމް ކޯޓުގެ މަބްދައުތަކާ ޚިލާފު ކަމެއް ނޫނެވެ. (ޕެރ. 3.6)

ވަގުތީ އަމުރަށް އެދުނު ފަރާތް އެދިފައިވާ ފަރުވާއާ އެއްގޮތަށް (ނޯޓިސްއަށް ޢަމަލުކުރުން ފަސްކުރުމަށް) ނެރެފައިވާ އަމުރަކީ އެދިފައިވާ ފަރުވާގެ ދާއިރާއިން ބޭރުން ނެރެފައިވާ އަމުރެއް ނޫނެވެ. (ޕެރ. 3.7)