ހައުސިންގ ޑިވެލޮޕްމެންޓް ކޯޕަރޭޝަން ލިމިޓެޑް ވ. އަޙްމަދު ސަނީޙް ހަނީފް

ނަތީޖާ: ވަޒީފާއާބެހޭ ޓްރައިބިއުނަލުގެ ވަގުތީ އަމުރު ބާޠިލު

ދަށު ކޯޓު: ވަޒީފާއާބެހޭ ޓްރައިބިއުނަލް 200-VTR/VA/2025/31

ކޯޓުން ނިންމަން ޖެހުނު ސުވާލު

އެއް އަހަރުގެ މުއްދަތަށް ނެގި މުވައްޒަފަކު އަދާކުރި މަޤާމަށް ދާއިމީ މީހަކު ނެގުން ހުއްޓުވުމަށް ވަޒީފާއާބެހޭ ޓްރައިބިއުނަލުން ނެރުނު ވަގުތީ އަމުރު، ވަގުތީ އަމުރު ނެރުމުގެ ޝަރުޠުތައް ފުރިހަމަވެގެން ނެރުނު އަމުރެއްތޯ.

ކަނޑައެޅި ޤާނޫނީ އުޞޫލުތައް

1. ވަގުތީ އަމުރެއް ނެރުމަށް (1) އެދޭ ފަރާތަށް ޤާނޫނީ ޙިމާޔަތް ލިބެންޖެހޭ މައުޟޫޢީ ޙައްޤެއް ނުވަތަ ޤާނޫނީ މަރުކަޒެއް އޮތުމުގެ އިޙްތިމާލު ފާޅުކަން ބޮޑު ގޮތެއްގައި ޤާއިމުވުން (fumus boni iuris)، (2) އަމުރު ނުނެރެ އަޞްލު ދަޢުވާ ލަސްވެއްޖެނަމަ ކުރިމަތިވާނެ ނުރައްކަލެއް އޮތުން (periculum in mora)، އަދި (3) އެދޭ ފަރާތަށް އެފަދަ އަމުރަކަށް އެދުމުގެ ޞިފަތު ނުވަތަ ޙައިޘިއްޔަތު ލިބިގެންވުން ފުރިހަމަވާންވާނެއެވެ. (ޕެރ. 16)
2. ކަމެއްގެ ޙާލާމެދު ސުވާލު އުފެދިއްޖެނަމަ، މައުޟޫޢާމެދު ވަގުތީ ގޮތުން ފިޔަވަޅު އަޅަންޖެހޭނީ އެ މައުޟޫޢު އަޞްލު އޮތް ޙާލުގެ މައްޗަށް ބަލައިގެންނެވެ؛ ފަހުން އެހެން ގޮތެއް ކަނޑައަޅަންދެން މާޒީގައި އޮތް ޙާލުގެ މައްޗަށް ކަމެއް ބޭއްވުމަކީ ޢަމަލުކުރާ އުޞޫލެވެ. ވަޒީފާ ހުށަހެޅުމާއި ޤަބޫލުކުރުމުގައި ވަޒީފާއަކީ މުއްދަތު ކަނޑައެޅިފައިވާ ވަޒީފާއެއްނަމަ، ފަހުން ދާއިމީވީކަމުގެ ސުވާލުގައި ވަގުތީ ޙިމާޔަތަށް ފާޅު ޙައްޤެއް ޤާއިމެއް ނުވެއެވެ. (ޕެރ. 19–21)
3. މުވައްޒަފަކު ވަކި ވަޒީފާއެއް އަދާކުރުމަކީ، އޭނާއަށްޓަކައި އެ ވަޒީފާ ބާއްވަންޖެހޭ ސަބަބެއް ނޫނެވެ. (ޕެރ. 20)
4. ވަގުތީ އަމުރު ނެރުމުގެ ކުރިން އުވިގެން ގޮސްފައިވާ (ވުޖޫދުގައި ނެތް) މަޤާމަކަށް ދާއިމީ މީހަކު ނުނެގުމަށް އަންގައި އެ މަޤާމު ވަގުތީގޮތުން ރައްކާތެރިކޮށްދެވޭނެ ޤާނޫނީ ހަމައެއް ނެތެވެ؛ އެއްފެންވަރުގެ މަޤާމެއް ނުވަތަ މާލީ ބަދަލެއް ދެވެން އޮތްނަމަ ވަގުތީ ފިޔަވަޅެއް ނޭޅުމަށް އިސްކަންދޭންޖެހެއެވެ. (ޕެރ. 22، 23 – ފަނޑިޔާރު ދީބާނާޒް ފަހުމީ މި ދެ ޕެރެގްރާފަށް ތާއީދު ނުކުރައްވާ)

ބަލާފައިވާ ޤާނޫނުތައް

• ސުޕްރީމް ކޯޓު: ނެކްސްބިޒް ލިމިޓެޑް (އޮސްޓްރޭލިއާ) ވ. އެންޓި ކޮރަޕްޝަން ކޮމިޝަން (2012/SC-A/21)
• ޤާނޫނުއަސާސީގެ 143 ވަނަ މާއްދާގެ (ރ) (އިސްތިއުނާފީ ނުކުތާގައި)
• ވަޒީފާއާބެހޭ ޤާނޫނުގެ 29 ވަނަ މާއްދާގެ (ށ) (އިސްތިއުނާފު ރައްދުވާ ފަރާތުގެ ބަހުސްގައި)