ޕަބްލިކް ސަރވިސް މީޑިއާ ވ. ބިޒްނަސް އިމޭޖް ގްރޫޕް ޕްރައިވެޓް ލިމިޓެޑް

ނަތީޖާ: ދަށުކޯޓުގެ ޙުކުމް ބާޠިލުކޮށް، PSM ހިމަނައި އަލުން ބެލުމަށް ސިވިލް ކޯޓަށް ތަޙުވީލުކުރި (އަޣުލަބިއްޔަތުން)

ދަށު ކޯޓު: ސިވިލް ކޯޓު 1249/Cv-C/201

ކޯޓުން ނިންމަން ޖެހުނު ސުވާލު

MNBC އާއި BIG އާ ދެމެދު 07 މާރިޗް 2010 ގައި ވެފައިވާ މާކެޓިންގ އެއްބަސްވުމުގެ ދަށުން BIG އިން ހަމައެކަނި MNBC ގެ މައްޗަށް ކުރި ދަޢުވާއެއްގައި، އެ އެއްބަސްވުން ތަންފީޛުކުރުން އެހިނދަށް ލާޒިމުވެފައިވަނީ ކޮން ފަރާތަކަށްތޯ (ޤާނޫނު 6/2010 އާއި 9/2015 ގެ ދަށުން MBC/PSM އަށް ބަދަލުވިތޯ) ނުބަލައި، PSM ގެ ބަސް ނާހައި ސިވިލް ކޯޓުން ޙުކުމްކުރުން ރަނގަޅުތޯ؛ އަދި ލަސްވުމުގެ ޖޫރިމަނާ ނަގައިދިނުމާމެދު.

ކަނޑައެޅި ޤާނޫނީ އުޞޫލުތައް

1. ޤާނޫނު ނަންބަރު 6/2010 ގެ 43 އާއި 45 ވަނަ މާއްދާގެ ދަށުން، އެ ޤާނޫނަށް ޢަމަލުކުރަން ފެށުމާއެކު ދިވެހިރާއްޖޭގެ އަޑާއި ޓެލެވިޜަން މޯލްޑިވްސް MBC ގެ ދެ ޗެނަލަށް ބަދަލުވެ، އެ ތަންތަނަށް ލިބެންޖެހޭ މުދަލާއި ފައިސާއާއި، އެ ތަންތަނުން އެވަގުތު ދައްކަންޖެހިފައިވާ ފައިސާ ނުވަތަ ދަރަނި އަދާކުރުމުގެ އިލްތިޒާމްވެސް MBC އަށް ބަދަލުވީކަމުގައި ބަލަންޖެހެއެވެ. (ޕެރ. 124-125)
2. ޓެލެވިޜަން މޯލްޑިވްސް ނުވަތަ ދިވެހިރާއްޖޭގެ އަޑުގެ ކަންކަން ބެލެހެއްޓުމަށް ސަރުކާރުން އުފައްދާފައިވާ އިދާރާއަކުން (MNBC) އެކި ފަރާތްތަކާ ކޮށްފައިވާ އެއްބަސްވުންތައް MBC އަށް ބަދަލުވެގެންދަނީ ޤާނޫނު ނަންބަރު 6/2010 ގެ 46 ވަނަ މާއްދާގައިވާ އިޖުރާއަތުގެ ތެރެއިން (ބޯޑު އުފެދޭތާ 2 މަސްދުވަހުގެ ތެރޭގައި މުރާޖަޢާކޮށް، އުވާލަން ފެންނަ އެއްބަސްވުންތައް އުވާލުމާއި އުވާލާއިރު އުފުލަންޖެހޭ މާލީ ޒިންމާ ބޯޑުން އުފުލުން) ނެވެ. (ޕެރ. 126-127)
3. އެއްބަސްވުންތައް MBC އަށް ލިބިފައިވަނީ ޤާނޫނަށް ޢަމަލުކުރަން ފެށިތާ 1 އަހަރާއި 10 މަސް ފަހުން (11 ފެބްރުއަރީ 2012 ގައި) ކަމުން، 46 ވަނަ މާއްދާގައިވާ 2 މަސްދުވަހުގެ މުއްދަތުގައި އެ އެއްބަސްވުން މުރާޖަޢާކުރުމަކީ MBC އަށް ކުރެވޭނެ ކަމެއް ނޫނެވެ. (ޕެރ. 135، 143.4)
4. 46 ވަނަ މާއްދާއިން ލާޒިމުކުރަނީ އުވާލަންޖެހޭ އެއްބަސްވުންތައް އުވާލައި، އުވާލާއިރު އުފެދޭ މާލީ ޒިންމާ ބޯޑުން އުފުލުމެވެ. އެއްބަސްވުމުގެ މަޢުލޫމާތު MBC އަށް ލިބިފައިވާއިރު، އެ އެއްބަސްވުން މުރާޖަޢާކޮށް ނުވަތަ އުވާލާ، އެކަން އަނެއް ފަރާތަށް އަންގާފައިނުވާނަމަ، އެއީ ދެމިއޮތް އެއްބަސްވުމެއްކަމުގައި ބެލުމުގެ ފުރުޞަތު އޮވެއެވެ. (ޕެރ. 136، 143.5-143.6)
5. ޤާނޫނު ނަންބަރު 9/2015 (ޕަބްލިކް ސަރވިސް މީޑިއާގެ ޤާނޫނު) ގެ 13 ވަނަ މާއްދާގެ ދަށުން، އެ ޤާނޫނު ވުޖޫދުވުމާއެކު އިތުރު އެއްވެސް ޝަރުޠެއް ނެތި، MBC އިން ޒިންމާ ނަގަންޖެހޭ އެއްބަސްވުންތަކާއި، އެހިނދަށް ދައްކަންޖެހޭ ފައިސާ ނުވަތަ އަދާކުރަންޖެހޭ ދަރަނި ދެއްކުމުގެ އިލްތިޒާމް PSM ގެ ދަށަށް ބަދަލުވިއެވެ. (ޕެރ. 139-140)
6. ދަޢުވާ ލިބިގަތުމުގެ ހައިސިއްޔަތު MNBC އަށް ލިބިގެންވޭތޯއާއި، ޤާނޫނު 6/2010 އާއި 9/2015 އެކުއެކީގައި ކިޔާއިރު އެއްބަސްވުމުގެ އިލްތިޒާމް PSM އަށް ބަދަލުވެފައިވޭތޯއާއި، ދައްކަންޖެހޭ މިންވަރާއި ޖޫރިމަނާ ދައްކަންޖެހޭތޯ، މިފަދަ ކަންކަމުގައި ތިންވަނަ ފަރާތެއް ކަމުގައިވާ PSM ގެ މަޞްލަޙަތެއް އޮތުމުގެ އިޙްތިމާލު އޮތްނަމަ، އެކަންކަން ޤާއިމުކުރެވޭނީ އެ ފަރާތް ޝާމިލުކޮށް، އެ ފަރާތަށް ބަސް ބުނުމުގެ ފުރުޞަތު ދީގެން ކުރެވޭ ޝަރީޢަތެއްގެ ތެރެއިންނެވެ. (ޕެރ. 143، 145)
7. އިސްތިއުނާފީ މަރުޙަލާގައި މައްސަލައެއް ބަލައި ގޮތެއް ކަނޑައަޅަންޖެހޭނީ އިސްތިއުނާފީ ނުކުތާތަކާއި ދެ ފަރާތުން އެދޭ ކަންކަމުގެ މައްޗަށް ބިނާކޮށެވެ. ދަށު ކޯޓުގައި ބަހުސްކުރެވިފައިނުވާ ކަންކަމާމެދު (ތަންފީޛުކުރަންޖެހޭ ފަރާތް، ޚިދުމަތް ލިބިފައިވޭތޯ، ދައްކަންޖެހޭ މިންވަރު) އިސްތިއުނާފީ މަރުޙަލާގައި ގޮތެއް ކަނޑައަޅައިފިނަމަ އިސްތިއުނާފުކުރުމުގެ އެއް ހަރުފަތް ގެއްލިގެންދާތީ، އެކަންކަމާމެދު މި މަރުޙަލާގައި ގޮތެއް ނިންމަންޖެހޭނެ ކަމަކަށް ނުދެކެއެވެ. (ޕެރ. 146-147)
8. އެއްބަސްވުމުގައި އިސްތިއުނާފުކުރާ ފަރާތުގެ ދައުރު ޤާއިމުކުރަންޖެހޭ މައްސަލައެއްގައި މަޞްލަޙަތު ބޮޑީ ދަށު ކޯޓުގައި އެ ފަރާތަށް ބަސް ބުނުމުގެ ފުރުޞަތު ދީ ޝަރީޢަތްކުރެވުމުގެ ޙައްޤު ދިނުމެވެ. އެހެންކަމުން، ސުޕްރީމް ކޯޓުގެ 2018/SC-A/40 އަށް ރިޢާޔަތްކޮށް، ޙުކުމް ބާޠިލުކޮށް، PSM ވެސް ދަޢުވާގައި ހިމަނައި ބަލުމަށް ޤާނޫނު ނަންބަރު 22/2010 ގެ 46 ވަނަ މާއްދާގެ (ށ) ގެ ދަށުން މައްސަލަ ސިވިލް ކޯޓަށް ތަޙުވީލުކުރެވެއެވެ. (ޕެރ. 148-150)

ބަލާފައިވާ ޤާނޫނުތައް

• ޤާނޫނު ނަންބަރު 6/2010 (މޯލްޑިވްސް ބްރޯޑްކާސްޓިންގ ކޯޕަރޭޝަން ޤާއިމުކުރުމުގެ ޤާނޫނު) ގެ 1 ވަނަ މާއްދާގެ (ހ)، 3 ވަނަ މާއްދާގެ (ހ)، 12، 42، 43، 44، 45، 46 (ހ) އަދި (ށ)، 47 (ހ) އަދި (ށ)، 48 ވަނަ މާއްދާ
• ޤާނޫނު ނަންބަރު 9/2015 (ޕަބްލިކް ސަރވިސް މީޑިއާގެ ޤާނޫނު) ގެ 3، 7، 8، 9، 10، 13 ވަނަ މާއްދާ
• ޤާނޫނު ނަންބަރު 10/96 (ދިވެހިރާއްޖޭގެ ކުންފުންޏާބެހޭ ޤާނޫނު) ގެ 15، 95، 97، 98 ވަނަ މާއްދާ
• ޤާނޫނު ނަންބަރު 3/2013 (ދައުލަތުގެ ވިޔަފާރި ތަންތަން ޕްރައިވަޓައިޒްކުރުމާއި ކޯޕަރަޓައިޒްކުރުމާއި އަދި މޮނިޓަރކޮށް އިވެލުއޭޓްކުރުމުގެ ޤާނޫނު) ގެ 3 ވަނަ މާއްދާ
• ޤާނޫނު ނަންބަރު 3/2006 (ދައުލަތުގެ މާލިއްޔަތު ޤާނޫނު) ގެ 4 ވަނަ މާއްދާ؛ ދައުލަތުގެ މާލިއްޔަތުގެ ޤަވާއިދު 2017 ގެ 14.03 އަދި 14.04
• ޤާނޫނު ނަންބަރު 4/2007 (އޮޑިޓް ޤާނޫނު)
• ޤާނޫނު ނަންބަރު 22/2010 (ދިވެހިރާއްޖޭގެ ކޯޓުތަކުގެ ޤާނޫނު) ގެ 46 ވަނަ މާއްދާގެ (ށ)
• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ 284 ވަނަ މާއްދާ (ހ)، (ށ)، (ނ)
• ސުޕްރީމް ކޯޓުގެ 2018/SC-A/40 (އެކްސްޕޯޓް އިމްޕޯޓް ބޭންކް އޮފް މެލޭޝިޔާ ވ. ވަން އެންޑް ހާފް ޑިގްރީ މޯލްޑިވްސް ޕްރައިވެޓް ލިމިޓެޑް)
• ސުޕްރީމް ކޯޓުގެ 2018/SC-A/46 (އިސްތިއުނާފުކުރުމުގެ ހުއްދަ؛ މައްސަލައިގެ ތާރީޚުގައި ޙަވާލާދީފައި)
• ސިވިލް ކޯޓުގެ 1374/Cv-C/2010 (2405/MC/2010) ޤަޟިއްޔާ
• ހައިކޯޓުގެ 2011/HC-A/144 ޤަޟިއްޔާ