ރެއިންބޯ ކޮންސްޓްރަކްޝަން ޕްރައިވެޓް ލިމިޓެޑް ވ. އަލީ ތަމީމް

ނަތީޖާ: އިސްތިއުނާފު ބާޠިލް، ޓްރައިބިއުނަލުގެ ނިންމުން ޤާއިމް

ދަށު ކޯޓު: ވަޒީފާއާބެހޭ ޓްރައިބިއުނަލް 5/VTR/2019

ކޯޓުން ނިންމަން ޖެހުނު ސުވާލު

ސަބަބު އަންގައި ނުލައި ގާތްގަނޑަކަށް އެއް މަސްދުވަހު ވަޒީފާއަށް ހާޟިރުނުވިކަމަށް ބުނެ ނޯޓިސް ނުދީ ވަކިކުރުމުގައި މައުޟޫޢީ ޢަދުލުވެރިކަން ޤާއިމުނުވާކަމަށް ޓްރައިބިއުނަލުން ނިންމި ނިންމުން ޞައްޙަތޯ؛ އަދި ވަޒީފާއަށް އަނބުރާ ރުޖޫޢަކޮށް، ވަކިކުރި ދުވަހުން ފެށިގެން މުސާރައާއި އިނާޔަތްތައް ނަގައިދިނުމަށް ނިންމުމަކީ 2018/SC-A/49 ގެ އުޞޫލާ ޚިލާފު ނިންމުމެއްތޯ.

ކަނޑައެޅި ޤާނޫނީ އުޞޫލުތައް

1. މުވައްޒަފަކު ވަކިކުރުމުގައި މައުޟޫޢީ ޢަދުލުވެރިކަމާއި އިޖުރާއީ ޢަދުލުވެރިކަން ޤާއިމުވެފައިވޭތޯ ބަލަންޖެހެއެވެ؛ މައުޟޫޢީ ޢަދުލުވެރިކަމަކީ ވަކިކުރުން ޢަދުލުވެރި ނުވަތަ އެކަށީގެންވާ ސަބަބަކަށް ބިނާވުމެވެ؛ އަދި ވަކިކުރި ސަބަބު އެކަށީގެންވާ ސަބަބެއްކަން މަދަނީ މައްސަލަތަކުގެ މިންގަނޑު ކަމުގައިވާ ބޮޑަށް ބުރަވެވޭ މިންގަނޑުން ސާބިތުކުރުމަކީ ވަޒީފާދޭ ފަރާތުގެ ޒިންމާއެކެވެ. (ޕެރ. 21-22)
2. ވަޒީފާއާބެހޭ ޤާނޫނުގެ 23 ވަނަ މާއްދާގެ ދަށުން ނޯޓިސް ނުދީ ވަކިކުރެވޭނީ ސަބަބެއް އޮވެގެން، ޚާއްޞަކޮށް ފާޅުކަންބޮޑު ޣައިރު ސުލޫކީ ޢަމަލެއް ނުވަތަ ޚިޔާނާތެއް ވެފައިވާނަމައެވެ؛ އެއީ ވަޒީފާގެ ގުޅުން އެއްކޮށް ކެނޑޭ މިންވަރުގެ ޢަމަލެއް، އެބަހީ އެއްބަސްވުމުގެ ޖައުހަރީ ޝަރުޠަކާ ޚިލާފުވުން، ދެފަރާތުގެ އިތުބާރާއި އަމާނާތްތެރިކަން ގެއްލުން، ނުވަތަ ވަޒީފާގެ އިލްތިޒާމްތަކާ އަސާސީ ގޮތުން ޚިލާފުވުމެވެ. (ޕެރ. 24-25)
3. ހުއްދައާއި ނުލައި ސަބަބު ނާންގައި ވަޒީފާއަށް ހާޟިރުނުވުމަކީ އާންމު ޙާލަތުގައި ނޯޓިސް ނުދީ ވަކިކުރުމަށް އެކަށީގެންވާ ސަބަބެއް (2013/HC-A/77) ނަމަވެސް، ހާޟިރުނުވީ ވަކިކުރުމުގެ ބާރު ލިބިފައިވާ އެޗް.އާރު މެނޭޖަރު ވަޒީފާއިން ވަކިކުރިކަމަށް މުޙާތަބުކުރުމުން ކަމަށާއި، މުވައްޒަފަކީ ވަކިކުރެވިފައިވާ މީހެއްކަމަށް އެކަށީގެންވާ ހަމައަކުން ޤަބޫލުކުރެވޭ ޙާލަތެއްގައި، އެ އާންމު އުޞޫލު އެގޮތަށް ތަޠުބީޤު ނުކުރެވޭނެއެވެ. (ޕެރ. 27-34)
4. ވަޒީފާއަށް ހާޟިރުނުވާ ސަބަބު ހޯދުމަށް ފޯނުން ގުޅުމަށް މަސައްކަތްކުރިކަމަށް ބުނާ ހެކިބަހަށް ޓްރައިބިއުނަލުން ރިޢާޔަތްކޮށް، ސިޓީ، އީމެއިލް ނުވަތަ މެސެޖެއް މެދުވެރިކޮށް އޮޅުންފިލުވާފައި ނުވާކަމަށް ނިންމާފައިވާނަމަ، ހެކިތައް މަދަނީ މިންގަނޑުން ވަޒަންކޮށް ނިންމި އެ ނިންމުމަކީ ހެކިބަހަށް ރިޢާޔަތްނުކުރުމެއް ނޫނެވެ. (ޕެރ. 37-39)
5. އެކަށީގެންވާ ސަބަބެއް ނެތި ވަކިކުރެވިއްޖެނަމަ ވަޒީފާއާބެހޭ ޤާނޫނުގެ 29 (ހ) ގެ ދަށުން ލިބޭ އެންމެ އަސާސީ ޙައްލަކީ ވަޒީފާއަށް އަނބުރާ ރުޖޫޢަކުރުމެވެ؛ ރުޖޫޢަކުރުމަށް ހުރަސްއަޅާ ޙާލަތްތަކުގެ ތެރޭގައި އަނބުރާ އިޢާދަނުކުރެވޭ މިންވަރަށް އިތުބާރު ގެއްލުން ހިމެނޭ ނަމަވެސް، ވަކިކުރުމުގެ ސަބަބަކަށް ނުވާ، ވަކިކުރިކަމުގެ ލިޔުމުގައި ނުހިމެނޭ، ފިޔަވަޅެއްވެސް ނާޅާ ކަމަކަށް ބިނާކޮށް އިތުބާރު ގެއްލިކަމަށް ބުނުމަކީ އަސާސެއް ނެތް ބުނުމެކެވެ. (ޕެރ. 41-48)
6. ވަޒީފާއަށް ރުޖޫޢަކުރާ ދުވަހާ ހަމައަށް ލިބެންޖެހޭ މުސާރައާއި އިނާޔަތްތައް ނަގައިދިނުމުގައި، ވަކިކުރުމަށްފަހު އެހެން ވަޒީފާއަކުން ލިބުނު އުޖޫރަ އުނިކޮށް ނަގައިދިނުމަކީ މިބާވަތުގެ މައްސަލަތަކުގައި ޢަމަލުކުރެވޭ އުޞޫލާ އެއްގޮތް ގޮތެކެވެ. (ޕެރ. 50-51)

ބަލާފައިވާ ޤާނޫނުތައް

• ޤާނޫނު ނަންބަރު 2008/2 (ވަޒީފާއާބެހޭ ޤާނޫނު) ގެ 23 ވަނަ މާއްދާގެ (ހ) އަދި (ށ)، 27 ވަނަ މާއްދާ، 29 ވަނަ މާއްދާގެ (ހ) (1) އަދި (ށ)
• ޤާނޫނުއަސާސީގެ 42 ވަނަ މާއްދާ (އިސްތިއުނާފީ ނުކުތާގައި)
• ޤާނޫނު ނަންބަރު 76/24 (ހެއްކާބެހޭ ޤާނޫނު) ގެ 1 ވަނަ މާއްދާ (އިސްތިއުނާފީ ނުކުތާގައި)
• ޤާނޫނު ނަންބަރު 2021/32 (މަދަނީ އިޖުރާއަތުގެ ޤާނޫނު) ގެ 284 ވަނަ މާއްދާ (ހ)، (ށ)، (ނ)، (ރ) (އިސްތިއުނާފުގެ މުއްދަތު)
• ސުޕްރީމް ކޯޓު 2018/SC-A/49 (މޯލްޑިވްސް އެއަރޕޯޓްސް ކޮމްޕެނީ ލިމިޓެޑް ވ. ޖާބިރު ޢަބްދުއްރަޙްމާން)
• ސުޕްރީމް ކޯޓު 2017/SC-A/44
• ސުޕްރީމް ކޯޓު 2019/SC-A/23
• ސުޕްރީމް ކޯޓު 2017/SC-A/14
• ހައިކޯޓު 2013/HC-A/77
• ހައިކޯޓު 2010/HC-A/237