ނަން ފޮރުވާފައި ވ. ނަން ފޮރުވާފައި

މި ޤަޟިއްޔާގައި ފަރާތްތަކުގެ ނަން ފޮރުވާފައި.

ނަތީޖާ: ދަށުކޯޓުގެ ޙުކުމް ބާޠިލު، އަލުން ބެލުމަށް ސިވިލް ކޯޓަށް ފޮނުވި

ދަށު ކޯޓު: ފެމިލީ ކޯޓު 1318/Fm-C/2016

ކޯޓުން ނިންމަން ޖެހުނު ސުވާލު

މަރުޙޫމްގެ ދަރިއެއްކަމަށް ކުރިން ކޯޓު ޙުކުމަކުން ކަނޑައެޅިފައިވާ ފަރާތެއް ވާރިސުންގެ ތެރެއިން ދޫކޮށްލައި ފެމިލީ ކޯޓުން ތަރިކައިގެ ވާރިސުން ކަނޑައެޅުން ޞައްޙަތޯއާއި، ދެފަރާތުން އެދުނު ގޮތަށް މައްސަލަ ތަޙުވީލުކުރެވޭތޯ.

ކަނޑައެޅި ޤާނޫނީ އުޞޫލުތައް

1. މަރުޙޫމްގެ ދަރިއެއްކަމަށް ކުރިން ކޯޓުގެ ޙުކުމަކުން (ދަރިލެއްވުމުގެ ގަވާއިދުގައިވާ ގޮތުގެމަތިން) ކަނޑައެޅިފައިވާ ފަރާތެއް ވާރިސުންގެ ތެރޭގައި ނުހިމަނައި ވާރިސުން ކަނޑައެޅުމަކީ އެ ޙުކުމާ ޚިލާފަށް ނިންމާފައިވާ ނިންމުމެއް ކަމުން، އެ ނިންމުން ބާޠިލުކުރަންޖެހެއެވެ. (ޕެރ. 27، 33.1)
2. އިސްތިއުނާފުގެ ތެރެއިން ވާރިސުން ކަނޑައެޅުމަށް ކުރިން އެދިފައިވާ ގޮތަށް ޝަރީޢަތުގެ މަޖިލީހުގައި ބަދަލުގެނެސް، އިސްތިއުނާފުކުރާ ފަރާތާއި ރައްދުވާ ފަރާތް ދެފަރާތުންވެސް މައްސަލަ އަލުން ބެލުމަށް ދަށުކޯޓަށް ތަޙުވީލުކުރުމަށް އެދޭނަމަ، ކަންހިނގާފައިވާ ގޮތަށް ރިޢާޔަތްކޮށް ދެފަރާތުން އެދިފައިވާ ގޮތަށް ޢަމަލުކުރުމަށް ޤާނޫނީ ހުރަހެއް ނެތެވެ. (ޕެރ. 32)
3. ތަރިކައިގެ މައްސަލަތަކުގައި ވާރިސުން ކަނޑައަޅަނީ ދަށުކޯޓުން ކަމުން، ވާރިސުން ކަނޑައަޅައި މައްސަލަ އަލުން ބެލުމަށް ސިވިލް ކޯޓަށް ތަޙުވީލުކުރެވެއެވެ. (ޕެރ. 25، 32-33.2)

ބަލާފައިވާ ޤާނޫނުތައް

• ދިވެހިރާއްޖޭގެ ދަރިލެއްވުމުގެ ގަވާއިދު
• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު)
• ހައިކޯޓުގެ ނަންބަރު 2022/HC-IH/4 (އިސްތިއުނާފުކުރުމުގެ ހުއްދައަށް އެދި ހުށަހެޅި މައްސަލައާމެދު ނިމުނު ގޮތް، 01 މާރޗް 2022)
• ސުޕްރީމް ކޯޓުގެ (ނަންބަރު ސިއްރުކުރެވިފައިވާ) SC-HCL ނިންމުން: ކާވެނީގެ ގޮތުން ގުޅިފައިވާ ދެމީހުން ފިޔަވައި ތިންވަނަ ފަރާތަކަށް ދަރިލެއްވުމުގެ ނިންމުމާމެދު ސުވާލުއުފެއްދުމުގެ ފުރުޞަތު ނެތްކަމަށް