ޢައްޒާ ޙަމީދު ވ. މުޙައްމަދު ޢަރީފް އަދި ޢަބްދުﷲ މާނިޢު

ނަތީޖާ: ދަށުކޯޓުގެ ޙުކުމް ބާޠިލު

ދަށު ކޯޓު: ރ. ރަސްމާދޫ މެޖިސްޓްރޭޓް ކޯޓު 2023-E10C-CIV-2

ކޯޓުން ނިންމަން ޖެހުނު ސުވާލު

ހިބަ ދިން މީހާގެ 18 އަހަރު ނުފުރޭ ދަރިއަކު ހުއްޓައި، ބަންޑާރަ ގޯތީގެ ބައެއް އަނެއް ދަރިއަށް ހިބައިން ލިބިދިނުމަށް ދަށުކޯޓުން ކަނޑައެޅުމަކީ ބިމާބެހޭ ޤާނޫނާއި ހިބައިން ނުވަތަ ވަޞިއްޔަތުން ދިނުމާބެހޭ ގަވާއިދާ އެއްގޮތްތޯ.

ކަނޑައެޅި ޤާނޫނީ އުޞޫލުތައް

1. ހިބައިން ނުވަތަ ވަޞިއްޔަތުން ދިނުމާބެހޭ ގަވާއިދުގެ 2 ވަނަ މާއްދާގެ (ހ) ގެ ދަށުން ހިބައިން ދެވޭނީ އަނބިމީހާ ނުވަތަ ފިރިމީހާ، ދަރިން، މަންމަ، ބައްޕަ، މަރުވެފައިވާ ދަރިއެއްގެ އުފަންދަރިންނަށެވެ؛ (ށ) ގެ ދަށުން ދޭ މީހާއާއި އޭނާ ބަލަންޖެހޭ މީހުން ދިރިއުޅޭނެ ތަނެއް ހަމަޖެހިފައިވުން ޝަރުޠެކެވެ. (ޕެރ. 15)
2. ގަވާއިދުގެ 6 ވަނަ މާއްދާގެ ދަށުން 2 (ހ) ގައިވާ ފަރާތްތަކުން ވަކި ފަރާތަކަށް ހިބައިން ދެވޭނީ ދެން ތިބި ފަރާތްތަކުން އިޢުތިރާޟުނުކުރާނަމައެވެ. (ޕެރ. 15)
3. ގަވާއިދުގެ 15 ވަނަ މާއްދާގެ ދަށުން 2 (ހ) ގައިވާ ފަރާތްތަކުގެ ތެރޭގައި 18 އަހަރު ނުފުރޭ ކުއްޖަކު ނުވަތަ ބުއްދީގެ ތަޞައްރުފު ނުފުދޭ ފަރާތެއް ހުރެ، އެ ފަރާތަކީ 7 (ހ) ގައިވާ ފަދައިން ބިމުގެ ތަނަވަސްކަން ހުރި ފަރާތެއް ނޫންނަމަ، އެ ފަރާތް ހިބައަށް އިޢުތިރާޟުކުރާކަމަށް ބެލެވޭނެއެވެ. (ޕެރ. 16)
4. އެހެންކަމުން، ބިމުގެ ތަނަވަސްކަން ނެތް 18 އަހަރު ނުފުރޭ ދަރިއަކު ހުއްޓައި، އޭނާގެ ބިމުގެ ތަނަވަސްކަމަށް ރިޢާޔަތްނުކޮށް އަނެއް ދަރިއަށް ހިބައިން ބިން ލިބިދިނުމަށް ކަނޑައެޅުން ރަނގަޅެއް ނޫނެވެ. (ޕެރ. 17)
5. ހިބަ ދޭ މީހާ ގޯތީގެ ބައެއް އަނެއް ދަރިއަށް ދިނުމުގެ މަޤްޞަދުގައި ބާއްވާކަމަށް ބުނުމަކުން އެކަނި، އެ ބައަކީ އެ ދަރިއަށް ލިބިފައިވާ ނުވަތަ ލިބޭނެ ބައެއްކަމަށް ނުބެލެވޭނެއެވެ. (ޕެރ. 18)

ބަލާފައިވާ ޤާނޫނުތައް

• ދިވެހިރާއްޖޭގެ ބިމާބެހޭ ޤާނޫނުގެ 2 ވަނަ މާއްދާ އަދި 17 ވަނަ މާއްދާގެ (ރ)، (ބ) (އިސްތިއުނާފުކުރި ފަރާތުން ހަވާލާދިން)
• ހިބައިން ނުވަތަ ވަޞިއްޔަތުން ދިނުމާބެހޭ ގަވާއިދުގެ 2 ވަނަ މާއްދާގެ (ހ) އަދި (ށ)، 6 ވަނަ މާއްދާ، 7 ވަނަ މާއްދާގެ (ހ)، 15 ވަނަ މާއްދާ