ނަޢީމާ އިބްރާހީމް ވ. ޝަކީލާ ޙަމްޒާ

ނަތީޖާ: އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދަށު ކޯޓު: ސިވިލް ކޯޓު 3229/Cv-C/2021

ކޯޓުން ނިންމަން ޖެހުނު ސުވާލު

ބަނޑާރަ ބިމާ އިންވެގެން ހުރި އަމިއްލަ ބިމެއްގައި ޢިމާރާތް ކުރުމުގައި އިހުމާލުވުމުގެ ސަބަބުން ލިބުނު ގެއްލުމުގެ ބަދަލު ނަގައިދިނުމަށް ސިވިލް ކޯޓުން ކުރި ޙުކުމް ބަދަލުކުރަންޖެހޭތޯ؛ އަދި އިސްތިއުނާފު ރައްދުވާ ފަރާތުން ޝަރީޢަތުގެ ނިޒާމު ނަހަމަގޮތުގައި ބޭނުންކުރުމުގެ ސަބަބުން އިސްތިއުނާފު ބާޠިލުކުރުމަށާއި ސެކިއުރިޓީގެ ގޮތުގައި ފައިސާ ބެހެއްޓުމަށް އެދުނު އެދުންތައް ޤަބޫލުކުރެވޭތޯ.

ކަނޑައެޅި ޤާނޫނީ އުޞޫލުތައް

1. މަދަނީ އިޖުރާއަތުގެ ޤާނޫނުގެ 421 ވަނަ މާއްދާގެ ދަށުން ޝަރީޢަތުގެ ނިޒާމު ނަހަމަގޮތުގައި ބޭނުންކުރުމުގެ ސަބަބުން މައްސަލައެއް ބާޠިލުކުރުމަށް އެދޭ ފަރާތުން، އެ މާއްދާގެ ކޮން އަކުރަކަށް ޙަވާލާދީ، ނިޒާމު ނަހަމަގޮތުގައި ބޭނުންކުރިކަމަށް ބުނާ ބުނުން ސަބަބާއެކު ބުނެދީފައި ނުވާނަމަ، އެ އެދުމުގެ މައްޗަށް އިސްތިއުނާފު ބާޠިލުކުރެވޭނެ ކަމަކަށް ނުދެކެވެއެވެ. (ޕެރ. 75، 76)
2. އިސްތިއުނާފުގެ ޖަވާބުގައި ސެކިއުރިޓީގެ ގޮތުގައި ފައިސާ ބެހެއްޓުމަށް އެދޭނަމަ، އެދެނީ މަދަނީ އިޖުރާއަތުގެ ޤާނޫނުގެ ކޮން މާއްދާއެއްގެ ދަށުންކަން ބަޔާންކޮށް، އެދޭ މިންވަރަކީ ޚަރަދުގެ ގޮތުގައި ހިނގާ މިންވަރުކަން އެނގޭނެ ލިޔެކިއުން ހުށަހަޅައި، ޤާނޫނުގައި ބަޔާންކުރާ މުއްދަތުގެ ތެރޭގައި ހުށަހަޅަންވާނެއެވެ. އެކަންކަން ނުވާނަމަ ސެކިއުރިޓީ ބެހެއްޓުމަށް އަންގާނެ ތަނެއް ނެތެވެ. (ޕެރ. 78)

ބަލާފައިވާ ޤާނޫނުތައް

• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ 421 ވަނަ މާއްދާ
• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ 287 ވަނަ މާއްދާގެ (ހ)