ނަން ފޮރުވާފައި ވ. ޕްރޮސިކިއުޓަރ ޖެނެރަލް

މި ޤަޟިއްޔާގައި ފަރާތްތަކުގެ ނަން ފޮރުވާފައި.

ނަތީޖާ: ބައެއް ބަދަލުކުރި: ކުޑަކުއްޖެއްގެ ޖިންސީ ގުނަވަނެއް ހާމަވާގޮތަށް އޮރިޔާންކާޑު ހެދުމުގެ ކުށް ސާބިތުވާކަމަށް ކަނޑައެޅި ބައާއި އަދަބު ބާޠިލު

ދަށު ކޯޓު: ކޯޓުގެ ނަން ސިއްރު ކުރެވިފައި xxx

ކޯޓުން ނިންމަން ޖެހުނު ސުވާލު

ކުއްޖާގެ ހެކިބަސް ޝަރީޢަތުގައި ނުނަގައި ކުށް ސާބިތުކުރެވޭތޯ، އަދި ފޯނުން ފެނުނު ވީޑިއޯގައި ފެންނަނީ ކުޑަކުއްޖެއް ކަމާއި މައްސަލައިގައިވާ ކުއްޖާކަން ސާބިތުނުވެ ކުޑަކުއްޖެއްގެ ޖިންސީ ގުނަވަނެއް ހާމަވާގޮތަށް އޮރިޔާންކާޑު ހެދުމުގެ ކުށް ސާބިތުވޭތޯ.

ކަނޑައެޅި ޤާނޫނީ އުޞޫލުތައް

1. ކުއްޖާގެ ހެކިބަސް ވަޒަންކުރުމުގައި ކުއްޖާގެ ހެކިބަސް ޝަރީޢަތުގެ މަޖިލީހުގައި ނެގުން ލާޒިމުކަމަށް ސުޕްރީމް ކޯޓުގެ 2019/SC-A/77 ގައި ކަނޑައަޅާފައި ނުވާތީ، ކުއްޖާގެ ހެކިބަސް ޝަރީޢަތުގައި ނުނެގުމަކީ އެ ޤަޟިއްޔާގެ އުޞޫލާ ޚިލާފު ކަމެއް ނޫނެވެ. (ޕެރ. 10)
2. ހައިކޯޓުގެ 2022/HC-A/407 ގައި ކަނޑައެޅުނު އުޞޫލު ބިނާވެފައިވަނީ ކުއްޖާގެ އަސާސީ ކިޔައިދިނުމެއް ޝަރީޢަތަށް ހުށަނާޅައި ހަމައެކަނި ހިއަރސޭ ހެކި ހުށަހެޅިފައިވާ ވާޤިޢާތަކުގެ މައްޗަށެވެ؛ ކުއްޖާގެ އިންޓަރވިއުގެ އޯޑިއޯ ވީޑިއޯ ރެކޯޑިންގ ހުށަހެޅިފައިވާ މައްސަލައަކަށް އެ އުޞޫލު ތަޠްބީޤުނުކުރެވޭނެއެވެ. (ޕެރ. 11، 12)
3. ހެކިވެރިޔާއާ ސުވާލުކުރުމުގެ ފުރުޞަތު ޝަރީޢަތުން ދީފައިވާކަން މަޙްޟަރުން އެނގޭނަމަ، އެ ފުރުޞަތު ނުލިބުނުކަމަށް ހުށަހަޅާ ނުކުތާއަކީ އެކަށީގެންވާ ޤާނޫނީ ބަހުސެއް ނޫނެވެ. (ޕެރ. 15-17)
4. ޤާނޫނުގައި ފާޅުކަންބޮޑުކޮށް ވަކި ކަމެއް ފާހަގަވާނަމަ، ޚަޞްމުންގެ ބަސް އަޑުއެހުމަށްފަހު، އެއްވެސް ފަރާތަކުން ފާހަގަނުކުރި ނުކުތާއެއްގައިވެސް ޢަދުލުއިންސާފު ޤާއިމުކުރުމަށްޓަކައި އިސްތިއުނާފީ ކޯޓަށް ގޮތެއް ނިންމިދާނެއެވެ. (ޕެރ. 20)
5. މީހަކު ކުޑަކުއްޖެއްގެ ޖިންސީ ގުނަވަނެއް ހާމަކޮށް ފެންނަގޮތަށް އޮރިޔާންކާޑު ހެދުމުގެ ކުށުގެ އެންމެ އަސާސީ އުންސުރަކީ އޮރިޔާންކާޑު ހަދާފައިވަނީ 18 އަހަރުން ދަށުގެ ކުޑަކުއްޖެއްގެ ކަމަށް ވުމެވެ؛ ވީޑިއޯގައި ފެންނަނީ ކުޑަކުއްޖެއްކަން ނުވަތަ މައްސަލައިގައިވާ ކުއްޖާކަން އެކަށީގެންވާ ޝައްކެއް ނެތް މިންވަރަށް ސާބިތުނުވާނަމަ، ތަން (ގިފިލި) ކަށަވަރުވުމަކުން ނުވަތަ އަންހެނަކުކަން ކަށަވަރުވުމަކުން އެ ކުށް ސާބިތެއް ނުވެއެވެ. (ޕެރ. 21-26)
6. ދަށުކޯޓަށް ތަޙުވީލުކުރެވިދާނެ ބައެއްގައި ސާބިތުވިޔަސް ދެވޭނެ އެންމެ ބޮޑު އަދަބަށްވުރެ ގިނަ މުއްދަތެއް ތުހުމަތުކުރެވޭ ފަރާތް ބަންދުގައި ހޭދަކޮށްފައިވާނަމަ، މައްސަލަ ދަށުކޯޓަށް ތަޙުވީލުކުރުމުގެ ބޭނުމެއް ނެތެވެ. (ޕެރ. 27)

ބަލާފައިވާ ޤާނޫނުތައް

• ޤާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަށް ޢަމަލުކުރުމުގެ ޤާނޫނު) ގެ 18 ވަނަ މާއްދާގެ (ހ) އަދި (ށ)
• ޤާނޫނު ނަންބަރު 9/2014 (ދިވެހިރާއްޖޭގެ ޤާނޫނުލްޢުޤޫބާތު) ގެ 622 ވަނަ މާއްދާގެ (ހ) ގެ 7 ވަނަ ނަންބަރު އަދި (ބ) ގެ 2 ވަނަ ނަންބަރު
• ޤާނޫނު ނަންބަރު 9/2014 (ދިވެހިރާއްޖޭގެ ޤާނޫނުލްޢުޤޫބާތު) ގެ 1002 ވަނަ މާއްދާގެ (ހ) (ކަނޑައެޅޭނެ އަދަބުގެ މިންވަރު ބަޔާންކޮށްދޭ ތާވަލު)
• ޤާނޫނު ނަންބަރު 22/2010 (ދިވެހިރާއްޖޭގެ ކޯޓުތަކުގެ ޤާނޫނު) ގެ 48 ވަނަ މާއްދާގެ (ށ)
• ޤާނޫނުއަސާސީގެ 51 ވަނަ މާއްދާ (ދަށުކޯޓުގެ ޙުކުމުގައި)؛ 42 ވަނަ މާއްދާގެ (ހ)، (ށ) އަދި 51 ވަނަ މާއްދާގެ (ކ) (އިސްތިއުނާފީ ނުކުތާގައި)
• ސުޕްރީމް ކޯޓުގެ 2019/SC-A/77 (ޕްރޮސިކިއުޓަރ ޖެނެރަލް ވ. އަޙްމަދު މުޚްތާރު)
• ހައިކޯޓުގެ 2022/HC-A/407 (ޕްރޮސިކިއުޓަރ ޖެނެރަލް ވ. އިލްހާމް)
• ސުޕްރީމް ކޯޓުގެ 2020/SC-A/44 (އިސްމާޢީލް ޝުޖާޢު ވ. ޔޫސުފް ރިޟާ) ގެ 68 އަދި 69 ވަނަ ނުކުތާ
• ހައިކޯޓުގެ 2015/HC-A/104 (އިސްތިއުނާފުކުރި ފަރާތުން ހަވާލާދީފައި)
• ހައިކޯޓުގެ 2022/HC-A/285 (ދައުލަތުން ހަވާލާދީފައި)