ނަން ފޮރުވާފައި ވ. ނަން ފޮރުވާފައި

މި ޤަޟިއްޔާގައި ފަރާތްތަކުގެ ނަން ފޮރުވާފައި.

ނަތީޖާ: ދަށުކޯޓުގެ ނިންމުން ބާޠިލު

ދަށު ކޯޓު: ފެމިލީ ކޯޓު 1228/Fm-C/2025

ކޯޓުން ނިންމަން ޖެހުނު ސުވާލު

ގެވެށި އަނިޔާ ހުއްޓުވުމުގެ ޤާނޫނުގެ ދަށުން ރައްކާތެރިކުރުމުގެ އަމުރަކަށް އެދޭ މައްސަލައެއްގައި، ގެވެށި އަނިޔާގެ ޢަމަލު ވަޒަންކުރުމުގައި ޢަމަލު ހިންގިކަމަށް ބުނާ މީހާގެ ނިޔަތަށް ބުރަދަން ދީގެން އަމުރު ނުނެރުމަށް ފެމިލީ ކޯޓުން ނިންމީ ޤާނޫނާ އެއްގޮތަށްތޯ.

ކަނޑައެޅި ޤާނޫނީ އުޞޫލުތައް

1. ރައްކާތެރިކުރުމުގެ އަމުރުތަކަކީ ޖިނާއީ އަދަބެއް ނޫން، މަދަނީ ސިފައެއް އެކުލެވޭ އަމުރުތަކެއް ކަމުން، އޭގެ މައިގަނޑު އަމާޒަކީ މާޒީގެ ޢަމަލަކަށް އަދަބު ދިނުމުގެ ބަދަލުގައި ކުރިމަގުގައި ލިބިދާނެ އަނިޔާއިން ޝިކާރައަކަށްވާ ފަރާތް ސަލާމަތްކުރުމެވެ. (ޕެރ. 62-63)
2. ގެވެށި އަނިޔާ ހުއްޓުވުމުގެ ޤާނޫނުގެ 18 ވަނަ މާއްދާގައިވާ 'ނިޔަތް' މި ލަފުޒު އައިސްފައިވަނީ ޝިކާރައަށް ރައްކާތެރިކަން ފޯރުކޮށްދިނުމުގެ މަޤްޞަދަށް ބުރަވާ ގޮތަށް ކަމުން، އެއީ ޢަމަލު ހިންގާ މީހާގެ ނިޔަތަށް ބަލަންޖެހޭ ޝަރުޠެއް ނޫނެވެ. (ޕެރ. 94-97)
3. ރައްކާތެރިކުރުމުގެ އަމުރެއް ނެރުމުގައި ކޯޓުން ބަލަންޖެހެނީ، ހެކި ޤަރީނާ ޖުމްލަކޮށް ވަޒަންކުރާއިރު ގެވެށި އަނިޔާގެ ޢަމަލެއް ހިނގާފައިވާކަން، ހިނގަމުންދާކަން ނުވަތަ ހިނގާފާނެކަން ބޮޑަށް ބުރަވެވޭ (މަދަނީ) މިންގަނޑުން ޤަބޫލުކުރެވޭތޯ، އެ ޢަމަލުގެ ސަބަބުން ބިރުވެރިކަމެއް ނުވަތަ ގެއްލުމުގެ ބިރެއް އުފެދޭތޯ، އަދި ޝިކާރައާއި ދަރިންނާއި ޢާއިލާގެ މަޞްލަޙަތު ހިމާޔަތްކުރުމަށް އަމުރު ކޮންމެހެން ބޭނުންތޯއެވެ. (ޕެރ. 89، 99-100، 110، 113)
4. މިފަދަ ކަންކަން ސާބިތުވާނަމަ، އަނިޔާ ދިނުމުގެ ނިޔަތެއް ނެތްކަމަށް ރައްދުވާ ފަރާތުން ބުނުމަކުން ރައްކާތެރިކުރުމުގެ އަމުރު ނެރުމަށް ހުރަހެއް ނާޅައެވެ؛ ޢަމަލު ހިންގި މީހާގެ ނިޔަތަށް ބަރޯސާވުމަކީ ޤާނޫނުގެ މަޤްޞަދާ ފުށުއަރާ ކަމެކެވެ. (ޕެރ. 111-112، 115)
5. ވަޒަންކުރުމުގައި ޢަމަލުގެ ބާވަތާއި ނުރައްކާތެރިކަމާއި، ހިނގި މުއްދަތާއި ތަކުރާރުވުމާއި، ބޭނުންކުރި ވަސީލަތްތަކާއި ގުޅުމުގައިވާ ބާރުގެ ތަފާތާއި، ޝިކާރައަށް ނުވަތަ ކުދިންނަށް އޮތް ނުރައްކަލާއި، އަމުރުގެ ޒަރޫރަތްތެރިކަމަށް ރިޢާޔަތްކުރެވިދާނެއެވެ. (ޕެރ. 105، 108-109)
6. ގެވެށި އަނިޔާ އާންމުކޮށް ސިއްރުގައި ހިނގާތީ ކޮންމެ ފަހަރަކު ސީދާ އިތުބާރުހުރި ހެކި ނެތުން އެކަށީގެންވެއެވެ؛ މެޑިކަލް ރެކޯޑާއި ފުލުހުންނަށް ހުށަހެޅި ޝަކުވާއާއި ވުޒާރާތަކަށް ދިން ބަޔާންތަކާއި ރިޕޯޓުތަކާއި ފެނިދެނެވި މީހުންގެ ބަސް ހެއްކެއްގެ ގޮތުގައި ވަޒަންކުރެވިދާނެ ކަމަށާއި، ހެކި ވަޒަންކުރަންވާނީ މައްސަލައިގެ ޙާލަތުން ޤާނޫނުގެ މަޤްޞަދަށް އިސްކަންދީގެންނެވެ. (ޕެރ. 106-107)
7. ކުޑަކުދިން ހިމެނޭ ޙާލަތްތަކުގައި ކޯޓުން މައްސަލައަށް ބަލަންވާނީ ކުއްޖާގެ ނަޒަރިއްޔާތުން، ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނުގެ 8 ވަނަ މާއްދާއާ އެއްގޮތަށް ކުއްޖާގެ މަޞްލަޙަތު އިސްކުރުމަށް އަމުރު މުހިންމުތޯ ބަލައިގެންނެވެ؛ ކުދިންނަށް ނުރައްކަލެއް އޮތް ކޮންމެ ޙާލަތެއްގައި އަމުރުގެ ޒަރޫރަތްތެރިކަން އިތުރުވެއެވެ. (ޕެރ. 109)
8. ވަގުތީ އަމުރުތަކުގެ މުރާޖަޢާގެ ތެރެއިން ނުވަތަ ޙަޟާނަތުގެ މައްސަލަތަކުގެ ތެރެއިން ނިންމަންޖެހޭ ބައްދަލުކުރުމާ ގުޅޭ ފަރުވާއާމެދު ދަށު ކޯޓުން ކަނޑައެޅި ގޮތް ތަޢުނުކޮށް އިސްތިއުނާފީ ނުކުތާއެއް ހުށަނާޅާހިނދު، އެ ފަރުވާއާ ގުޅިގެން އިސްތިއުނާފުގައި ގޮތެއް ނުކަނޑައެޅޭނެއެވެ. (ޕެރ. 118-119)

ބަލާފައިވާ ޤާނޫނުތައް

• ޤާނޫނު ނަންބަރު 3/2012 (ގެވެށި އަނިޔާ ހުއްޓުވުމުގެ ޤާނޫނު) ގެ 1 (ށ)، 2 (ހ)، (ށ)، 3، 4 (ހ)، 18 (ހ)، (ށ)، (ނ)، 24، 32، 67 ވަނަ މާއްދާތައް
• ގެވެށި އަނިޔާ ހުއްޓުވުމުގެ ޤާނޫނުގެ ކޮމެންޓަރީ (ފެމިލީ ޕްރޮޓެކްޝަން އޮތޯރިޓީ)
• ޤާނޫނު ނަންބަރު 19/2019 (ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނު) ގެ 8 ވަނަ މާއްދާ
• ޤާނޫނު ނަންބަރު 13/2010 (ދިވެހިރާއްޖޭގެ ފަނޑިޔާރުންގެ ޤާނޫނު) ގެ 5 ވަނަ މާއްދާގެ (ށ) ގެ (1)
• 2018/SC-A/49 (މޯލްޑިވްސް އެއަރޕޯޓްސް ކޮމްޕެނީ ވ. ޖާބިރު ޢަބްދުއްރަޙްމާން) (އިސްތިއުނާފުކުރި ފަރާތުގެ ޙަވާލާ)
• Singapore Women's Charter 1961 / Women's Charter (Family Violence and Other Matters) (Amendment) Act 2023 (s.58B)
• Sim Tze Long v Chua Suat Kheng [2003] SGDC 125
• Malaysia Domestic Violence Act 1994 (Act 521)
• India Protection of Women from Domestic Violence Act 2005
• Indra Sarma v V.K.V. Sarma (2013) 15 SCC 755
• V.D. Bhanot v Savita Bhanot (2012) 3 SCC 183
• Hiral P. Harsora v Kusum Narottamdas Harsora (2016) 10 SCC 165
• UK Domestic Abuse Act 2021
• F v M [2021] EWFC 4 (Fam)
• Jemmett v Chief Constable of Cleveland Police [2024] EWHC 1172 (Admin); Crime and Security Act 2010 s.28
• Opuz v Turkey [2009] ECHR 33401/02
• Wing-Cheong Chan, 'A Review of Civil Protection Orders in Six Jurisdictions', Statute Law Review (2017)