—

ކޯޓު އަމުރެއްގެ ދަށުން ލާޒިމްކުރި ކަމެއް އެއަމުރާއި އެއްގޮތަށް ނުކުރުމުގެ ސަބަބުން ޤާނޫނު ތަންފީޒުކުރާ މުވައްޒަފެއްގެ މަސައްކަތަށް ޤަޞްދުގައި ހުރަސްއެޅުމުގެ ކުށުގެ ދަޢުވާއާއި ގުޅިގެން ޝަރީޢަތުން ބައްލަވަންޖެހޭ ކަންތައްތަކަކީ، ކޯޓުގެ އަމުރާ އެއްގޮތަށް ޢަމަލުކޮށްފައިވޭތޯއާއި، ޢަމަލުކުރި ގޮތުގެ ސަބަބުން ޤާނޫނު ތަންފީޒުކުރާ މުވައްޒަފެއްގެ މަސައްކަތަށް ހުރަސް އެޅިފައިވޭތޯއާއި، ހުރަސް އެޅިފައިވާނަމަ، އެޢަމަލު ހިންގާފައިވަނީ ޤަޞްދުގައިކަން ނުވަތަ ނޫންކަން ދެނެގަނެ، އެކަންތައްތަކާމެދު ޝަރުޢީ އަދި ޤާނޫނީ ހަމަތަކުގެމަތިން ގޮތެއް ކަނޑައެޅުމެވެ. (ޕެރ. 4 (ށ))

ވަކިކަމަކަށް ތުހުމަތުކޮށް ހިންގުނު ތަޙްޤީޤަކުން ހޯދިފައިވާ ހެކި ޤަރީނާގެ މައްޗަށް ބިނާކޮށް ކޮށްފައިވާ ދަޢުވާއެއް ނޫން، ކޯޓު އަމުރެއްގެ ދަށުން ލާޒިމްކުރި ކަމެއް ނުކުރުމުގެ ދަޢުވާއެއްގައި، ތަޙުޤީޤު ހިންގާފައިވަނީ ޤާނޫނާ ޚިލާފަށްކަމަށާއި ހެކިޤަރީނާއަކީ ޤާނޫނުއަސާސީގެ 27 ވަނަ މާއްދާއަށް ރިޢާޔަތްކުރާއިރު ޝަރީޢަތަށް ބަލައިގަނެވޭނެ ހެކިތަކެއް ނޫންކަމަށް ނިންމުމަކީ، ދަޢުވާއާއި އެއްވެސް ގުޅުމެއް ނެތްގޮތުގައި އެދަޢުވާގެ މައުޟޫޢުން ބޭރުން ނިންމާ ނިންމުމެކެވެ. (ޕެރ. 4 (ށ))

ހެކިބަހުގައި ފުށުއެރުންތަކެއް ހުރިކަން ފާހަގަކުރެވިފައިވަނީ ހުށަހެޅިފައިވާ ދަޢުވާގެ މައުޟޫޢުން ބޭރުން ކުރެވުނު ސުވާލުތަކާއި ގުޅިގެންކަމަށް ވެފައި، ދަޢުވާގެ އަޞްލު މައުޟޫޢުގެ ދާއިރާގެ ތެރޭގައި ހެކިންގެ ހެކިބަހުގައި ފުށުއެރުން އެކުލެވިފައިވާކަން އެނގެން ނެތްނަމަ، ހެކިބަހުގައި ގިނަ ފުށުއެރުންތަކެއް ހުރިކަމަށް ބަޔާންކުރުމަކީވެސް ދަޢުވާގެ މައުޟޫޢުން ބޭރުން ކުރާ ނިންމުމެކެވެ. (ޕެރ. 4 (ށ))

ޝަރީޢަތުގައި ހުށަހެޅުނު ދަޢުވާގެ މައުޟޫޢުގެ ބޭރުން ނިންމަވާފައިވާ ނިންމުންތަކަކީ ޤާނޫނީގޮތުން ޞައްޙަ ނޫން ނިންމުންތަކެއްކަމުގައި ބަލަންޖެހެއެވެ. (ޕެރ. 4 (ށ))

ޖިނާއީ އިޖުރާއަތުގެ ޤާނޫނުގެ 11 ވަނަ މާއްދާގެ (ރ) ގައި، ހަނުހުރުމުގެ ޙައްޤުގެ ދާއިރާގެ ތެރޭގައި ނުވަތަ އަމިއްލަ ނަފްސާ ދެކޮޅަށް ބަޔާން ނުދިނުމުގެ ޙައްޤުގެ ތެރޭގައި، 10 ވަނަ މާއްދާގެ (ށ) ގައި ބަޔާންކޮށްފައިވާ ޙާލަތުގެ ދާއިރާއިން ބޭރުގައި، ވަކި އެއްޗެއް އޮތްތަނެއް ނުވަތަ ވަކި ތަނެއް ހުޅުވޭނެގޮތް ނުވަތަ ތަޅުދަނޑިއެއް ނުވަތަ ޕާސްވޯޑެއް ނުވަތަ ތަޅެއް ހުޅުވޭނެ ނަންބަރުތަކެއް ނުވަތަ ވަކި އެކައުންޓެއް އެއީ ކޮން އެކައުންޓެއްކަން ބުނެދޭން ޖެހުމެއް ނުހިމެނޭނެކަމަށް ބަޔާންކޮށް، 10 ވަނަ މާއްދާގެ (ށ) އިން އިސްތިޘްނާކޮށްފައިވާ ކަންތައްތައް ސާފުކޮށް ބަޔާންކޮށްދީފައިވެއެވެ. (ޕެރ. 4 (ނ))

ކޯޓު އަމުރެއްގެ ދަށުން ކަމެއް މީހެއްގެ މައްޗަށް ލާޒިމްކުރުމުން، އެކަމެއް އެއަމުރެއްގައިވާ ގޮތަށް ކޮށްގެންނޫނީ އެއަމުރެއް ތަންފީޛުނުކުރެވޭނަމަ، ‹ما لا يتم الواجب إلا به فهو واجب› މި ޝަރުޢީ ޤާޢިދާގެ ދަށުން، ފޯނުގައިވާ އެންމެހައި މަޢުލޫމާތުތަކާއި ތަކެއްޗަށް ވާޞިލުވެވެން އޮތް ހަމައެކަނި ގޮތަކީ އެފޯނު ހުޅުވޭ ލޮކް ކޯޑު ނުވަތަ ޕާސްވޯޑް ހިއްސާކޮށްގެން ކަމުގައިވާނަމަ، އެ ލޮކް ކޯޑު ނުވަތަ ޕާސްވޯޑް ހިއްސާކުރުމަކީ ކޯޓު އަމުރުން ކުރުން ލާޒިމްކޮށްފައިވާ ކަމެކެވެ. (ޕެރ. 4 (ނ))

ފޯނުގައި ހިމެނޭ އެންމެހާ މަޢުލޫމާތު ދިނުމަށް ކޯޓު އަމުރުކޮށްފައިވާނަމަ، ފޯނު ހުޅުވުމަށް ބޭނުންވާ އެންމެހާ މަޢުލޫމާތުގެ ތެރޭގައި ހިމެނޭ ޕިން ކޯޑު ދިނުން ލާޒިމްވެއެވެ. މިހާލަތަކީ ޖިނާއީ އިޖުރާއަތުގެ ޤާނޫނުގެ 10 ވަނަ މާއްދާގެ (ށ) ގައި ބަޔާންކުރާ ހަނުހުރުމުގެ ޙައްޤުގެ ތެރޭ ހިމެނޭ ހާލަތެއް ނޫނެވެ. 11 ވަނަ މާއްދާގެ (ރ) ގައިވާ ހާލަތެކެވެ. (ޕެރ. 4 (ނ)، 4 (ރ))

ކުށް ސާބިތުވާކަމަށް ކަނޑައެޅުމަށްފަހު އަދަބު ކަނޑައެޅުމަށްޓަކައި، މައްސަލާގައި ހިމެނޭ ދެފަރާތަށް އަދަބާ ބެހޭގޮތުން ވާހަކަ ދެއްކުމަށް ފުރުޞަތު ދީ، ދެފަރާތުން ދައްކާ ވާހަކަތަކަށާއި، މައްސަލާގައި ކަންހިނގާފައިވާ ގޮތުގެ މައްޗަށާއި، ކަމާ ގުޅުން ހުރި ޤާނޫނީ މާއްދާތަކަށް ރިޢާޔަތްކުރުމަށްފަހު، ކުށުގެ އަދަބު އަސާސީ މިންގަނޑަށްވުރެ ލުއިކޮށްދޭންޖެހޭ ސަބަބެއް ނެތްނަމަ، ޤާނޫނުލްޢުޤޫބާތުގެ 1002 ވަނަ މާއްދާގެ (ހ) ގެ ތާވަލުގައިވާ އަސާސީ އަދަބު ކަނޑައަޅަންޖެހެއެވެ. (ޕެރ. 4 (ބ))