—

ދޭދޭ ފަރާތްތަކުގެ ދެމެދުގައި ހިނގާ މާލީ މުޢާމަލާތްތަކުގެ އެންމެ މުހިއްމު އެއް އަސާސަކީ އެ މުޢާމަލާތެއް ހިންގާ ދެފަރާތެއްގެ ދެމެދުގައި އޮންނަ އިތުބާރާއި ޔަޤީންކަމެވެ. މާލީ މުޢާމަލާތެއްގެ ބައިވެރިން އެ މުޢާމަލާތެއްގެ ތެރެއަށް ވަންނަނީ އޭގެ ދަށުން ޤާނޫނީގޮތުން އުފުލަންޖެހޭ އިލްތިޒާމްތައް އެމުޢާމަލާތެއްގެ އެންމެހައި ބައިވެރިން އަދާކުރަމުންދާނެކަމުގެ ޔަޤީންކަމުގެ މައްޗަށް ބިނާކޮށެވެ. (ޕެރ. 3 (ކ))

ކޮންޓްރެކްޓެއް ބާޠިލުކޮށްފައިވަނީ ކޮންޓްރެކްޓުގައި ބަޔާންކޮށްފައިވާ ގޮތާ ޚިލާފަށާއި ޤާނޫނު ނަންބަރު 4/91 (ކޮންޓްރެކްޓާބެހޭ ޤާނޫނު) ގެ 21 އަދި 22 ވަނަ މާއްދާގައި ބަޔާންކޮށްފައިވާ ގޮތާ ޚިލާފަށްކަން ސާބިތުވާއިރު، އެ ޤާނޫނުގެ 23 ވަނަ މާއްދާގެ ދަށުން ކޮންޓްރެކްޓެއްގެ ބައިވެރިޔަކު އެ ކޮންޓްރެކްޓަކާ ޚިލާފު ޢަމަލެއް ކޮށްފިނަމަ، އެޢަމަލެއް ކުރުމުން ލިބުނު ގެއްލުމަކަށް އެޢަމަލުކުރި ފަރާތަކުން ބަދަލުދޭން ޖެހޭނެއެވެ. (ޕެރ. 3 (އ))

ކޮންޓްރެކްޓެއްގެ ބައިވެރިޔަކު އެ ކޮންޓްރެކްޓަކާ ޚިލާފު ޢަމަލެއްކުރުމުން އެކަން ޝަރީޢަތަށް ސާބިތުވާ ޙާލަތްތަކުގައްޔާއި، ކޮންޓްރެކްޓެއްގެ ދަށުން ބައިވެރިއަކު އުފުލަންޖެހޭ އިލްތިޒާމްތައް އަދާކޮށްފައި ނުވާނަމަ، ކޮންޓްރެކްޓާބެހޭ ޤާނޫނުގެ 23 ވަނަ މާއްދާގެ ދަށުން ކޮންޓްރެކްޓާ ޚިލާފުވުމުގެ ސަބަބުން ސީދާ ލިބުނު ގެއްލުމާއި ލިބިދާނެކަމަށް ކޮންޓްރެކްޓްގެ ބައިވެރިންނަށް އެނގިފައިވާ ގެއްލުމުގެ ބަދަލު ޝަރީޢަތުން ނަގައިދެމުންދެއެވެ. (ޕެރ. 3 (ވ))

އޮޕޯރޗުނިޓީ ކޯސްޓް ނުވަތަ ލިބެންހުރި މަންފާއަކީ ކޮންޓްރެކްޓާބެހޭ ޤާނޫނުގެ 23 ވަނަ މާއްދާގެ (ށ) ގެ 2 ވަނަ ނަންބަރުގެ ދަށުން، ކޮންޓްރެކްޓެއްގެ ބައިވެރިޔަކު އެ ކޮންޓްރެކްޓަކާ ޚިލާފު ޢަމަލެއްކުރުމުން ލިބިދާނެކަން ކޮންޓްރެކްޓްގެ ބައިވެރިންނަށް އެނގިފައިވާ ގެއްލުމުގެ ދަށުން ޝަރީޢަތުން ނަގައިދެމުންދާ އުޞޫލެކެވެ. (ޕެރ. 3 (ވ))

ކުއްޔަށް ގެންދާ ތަކެތީގެ ކުއްޔާގުޅޭ މައްސަލަތައް ފިޔަވައި އެހެން މައްސަލަތަކުގައި ޤާނޫނީ ވަކީލުންގެ ފީ މައްސަލައިގެ އަނެއް ޚަސްމުގެ އަތުން ނަގައިދެވޭނެ ގޮތްތަކެއް ބަޔާންކުރާ ޤާނޫނެއް އަދި ގަވާއިދެއްވިޔަސް ނެތެވެ. ވަކީލު ފީ އަނެއް ޚަސްމުގެ އަތުން ނަގައިދެވޭނީ ދެޚަސްމުން ދެމެދު މިކަމާގުޅޭ ގޮތުން އެއްބަސްވުމެއް އޮތްނަމަ އެއާ އެއްގޮތަށެވެ. އެފަދަ އެއްބަސްވުމެއް ނެތްނަމަ ޤާނޫނީ ވަކީލުންގެ ފީ ނަގައިދެވޭނެ ތަނެއް ނެތެވެ. (ޕެރ. 3 (މ))

ކޮންޓްރެކްޓެއްގެ ބައިވެރިޔަކު އެކޮންޓްރެކްޓަކާ ޚިލާފު ޢަމަލެއް ހިންގުމުން، އެޢަމަލުގެ ސަބަބުން ސީދާ ލިބޭ ގެއްލުންތަކަކީ ލިޔެކިޔުމުން ފެންނަން ހުންނަންޖެހޭނެ ގެއްލުންތަކެއްކަމަށް ޝަރީޢަތުން ދެކެއެވެ. (ޕެރ. 3 (މ))

ގެއްލުން ސާބިތުކުރުމަށް ހުށަހަޅާ ރިޕޯޓެއްގައި ޢަދަދުތަކުގެ ޞައްޙަކަމުގެ މިންވަރާ މެދު ޚުދު އެރިޕޯޓުގައިވެސް ސުވާލު އުފައްދާފައިވާނަމަ، އޭގެ ޒާތުން އެރިޕޯޓުގެ ޙުއްޖިއްޔަތު ނެތިގެންދެއެވެ. އެ ރިޕޯޓް ފިޔަވައި އިތުރު ލިޔެކިޔުމެއް ހުށަހަޅާފައި ނުވާނަމަ، ސީދާ ލިބުނު ގެއްލުން ސާބިތުކުރުމަށް ކާފީ ހެކި ހުށަހަޅާފައިވާކަމަށް ބެލެވެން ނެތެވެ. (ޕެރ. 3 (މ))

ރަށްތައް ޓޫރިސްޓް ރިސޯޓްގެ ގޮތުގައި ތަރައްޤީކޮށް ހިންގައިގެން ލިބެންއޮތް މަންފާއަކީ ޖޮއިންޓްވެންޗަރ ކުންފުނިތަކަށް ލިބެންއޮތް އެއްޗެއް ކަމުގައި ވީހިނދު، އެމަންފާއިން ޙިއްޞާދާރަކަށް ލިބޭނެ މިންވަރަކީ ޖޮއިންޓްވެންޗަރ ކުންފުނިތަކުގައި އެ ފަރާތުގެ ޙިއްޞާވާ މިންވަރުން ލިބެންއޮތް މަންފާއެއްކަމުގައި ޝަރުޢީ ޤާނޫނީ ގޮތުން ބަލަންޖެހެއެވެ. (ޕެރ. 3 (މ))

ލިބެންއޮތް މަންފާގެ ގޮތުގައި އެދޭ ޢަދަދަކީ މަޙްދޫދުކުރެވޭ ޝަރުޠުތަކެއްގެ މަތިން ތައްޔާރުކޮށްފައިވާ ރިޕޯޓެއްގެ މައްޗަށް ބިނާކޮށް ހުށަހަޅާފައިވާ ޢަދަދަކަށް ވެ، އެ ރިޕޯޓް ތައްޔާރުކުރުމުގެ ފަހުގެ ތާރީޚެއްގައި އެ ޢަދަދުގެ މިންވަރަށް ބަދަލު އަންނަ ޓެކްސްތަކެއް ތަޢާރަފުވެގެން ގޮސްފައިވާނަމަ، އެ ރިޕޯޓްގެ މައްޗަށް ބުރަވެ އެ ބަދަލު ނަގައިދެވޭނެ ޝަރުޢީ ޤާނޫނީ ހަމައެއް ނެތެވެ. (ޕެރ. 3 (މ))