—

ވަޒީފާއިން ވަކިކުރާ ފަރާތްތަކަށް ވަޒީފާއާބެހޭ ޓްރައިބިއުނަލްގައި ޝަކުވާ އުފުލުމުގެ ޙައްޤު ވަޒީފާއާބެހޭ ޤާނޫނުގެ ދަށުން ލިބިދީފައިވަނީ އެޤާނޫނުގެ 28 ވަނަ މާއްދާގެ ދަށުންކަމާއި، 28 ވަނަ މާއްދާއަކީ އެޤާނޫނުގެ 4 ވަނަ ބާބުގައި ހިމެނޭ މާއްދާއަކަށްވާތީ، އެޤާނޫނުގެ 34 ވަނަ މާއްދާގެ (ހ) ގައި ބަޔާންކުރެވިފައިވާ ފަރާތްތައް 4 ވަނަ ބާބުގައިވާ މާއްދާތަކުން އިސްތިސްނާވާނެކަމަށް ބުނެފައި އޮތުމުން، ވަޒީފާއާބެހޭ ޤާނޫނުގެ 28 ވަނަ މާއްދާގެ ދަށުން ވަޒީފާއާބެހޭ ޓްރައިބިއުނަލަށް ޝަކުވާ ހުށަހެޅުމުގެ ޙައްޤު 34 ވަނަ މާއްދާގެ (ހ) ގައި ބަޔާންކުރާ ފަރާތްތަކަށް ލިބިގެން ނުވެއެވެ. (ޕެރ. 03 (ނ))

ޤާނޫނު ނަންބަރު 22/2010 (ދިވެހިރާއްޖޭގެ ކޯޓުތަކުގެ ޤާނޫނު) ގެ ޖަދުވަލު 1 ގެ 27 ވަނަ ނަންބަރުގެ ދަށުން، ވަޒީފާއާބެހޭ ޤާނޫނުގެ 34 ވަނަ މާއްދާގެ (ހ) ގައި ބަޔާންކުރާ ފަރާތްތަކުގެ މިފަދަ މައްސަލަތައް ބެލުމުގެ އިޚްތިސާސް ލިބިގެންވަނީ ސިވިލް ކޯޓަށެވެ. (ޕެރ. 03 (ނ))

ސިވިލް ކޯޓުން މިފަދަ މައްސަލަތަކުގައި ގޮތެއް ކަނޑައެޅުއްވުމުގައި ވަޒީފާއާބެހޭ ޤާނޫނުގެ 34 ވަނަ މާއްދާގެ (ހ) ގައި ބަޔާންކުރާ ފަރާތްތަކުގެ ޙައްޤުތައް ތަންޒީމުކުރާ ވަކި ޤާނޫނެއް ނުވަތަ ޤަވާޢިދެއް ނެތްނަމަ، ވަޒީފާދޭ ފަރާތާއި ވަޒީފާ ލިބޭ ފަރާތާއި ދެމެދު އެއްބަސްވުމެއްވާނަމަ އެއެއްބަސްވުމަކަށް ރިޢާޔަތްކުރެވިދާނެއެވެ؛ އަދި އެފަދަ އެއްބަސްވުމެއް އޮތްނަމަވެސް، ޤާނޫނުއަސާސީގެ 37 ވަނަ މާއްދާގެ ދަށުން އެފަދަ ފަރާތްތަކަށް ލިބިދޭ ޙައްޤުތައް ކަށަވަރުކޮށްދެއްވުމަށްޓަކައި ޤާނޫނުއަސާސީގެ 68 ވަނަ މާއްދާއަށް ރިޢާޔަތްކުރައްވައި ކޯޓުން ވަކި ގޮތެއް ކަނޑައެޅުއްވިދާނެއެވެ. (ޕެރ. 03 (ނ))

ވަޒީފާއާބެހޭ ޤާނޫނުގެ 34 ވަނަ މާއްދާގެ (ހ) ގައި ހިންގުމުގެ އިސްމަޤާމުގައި ތިބޭ މުވައްޒަފުން ހިމެނިފައިވީނަމަވެސް، ހިންގުމުގެ އިސްމަޤާމުގެ ތެރޭގައި ހިމެނޭ މުވައްޒަފުންނަކީ ކޮބައިކަމާއި އެފަދަ މީހުން ދެނެގަންނާނެ ގޮތަކީ ކޮބައިކަން އެޤާނޫނުގައި ބަޔާންކޮށްފައި ނެތުމުން، ހިންގުމުގެ އިސްމަޤާމުތައް ދެނެގަތުމުގައި އެމީހެއްގެ ވަޒީފާގެ ނަމާއި، ވަޒީފާގައި އެމީހަކު ކުރާ މަސައްކަތާއި، އެމީހެއްގެ ބޮލުގައި އެޅިފައިވާ ޒިންމާތަކާއި، އެމީހަކު މަސައްކަތްތައް ހިންގާ އުސޫލުތަކުގެ މައްޗަށް ރިޢާޔަތްކުރެވިދާނެއެވެ. (ޕެރ. 03 (ރ))

ހިންގުމުގެ އިސްމަޤާމުތަކަކީ ކޮބައިކަން ކަނޑައެޅުމުގައި ބަލަންޖެހޭ ޢުންސުރުތަކަކީ، އެމީހަކަށް އެއޮފީހެއް ނުވަތަ ކުންފުންޏެއްގެ ނިންމުންތައް ނިންމުމުގެ ބާރު ލިބިފައިވާ މިންވަރާއި، އެމީހެއްގެ މަސައްކަތު މާހައުލުގައި ކުރާކަންތައްތަކަށް ލިބިފައިވާ މިނިވަންކަމާއި، ކުންފުނީގެ ނުވަތަ އިދާރާއެއްގެ ސްޓްރެޓަޖިކް ނިންމުންތަކަށް ނުފޫޛު ފޯރުވޭ މިންވަރާއި، އެމުވައްޒަފަކު އޭނާގެ މަތީ ފަންތީގެ ފަރާތްތަކަށް ޖަވާބުދާރީވާންޖެހޭ މިންވަރެވެ؛ އަދި މިގޮތަށް ބަލާބެލުމުގައި ކުންފުނީގެ ނުވަތަ ވިޔަފާރީގެ އަސްލަކީ ކޮބައިކަންވެސް ބެލެވެންޖެހޭނެއެވެ. (ޕެރ. 03 (ރ))

ވަޒީފާގެ މަސްއޫލިއްޔަތުގެ ގޮތުން ކުންފުނީގެ ފައިސާގެ ކަންތައްތަކާބެހޭ އެންމެ އިސްފަރާތެއްގެ ގޮތުން މަސައްކަތްކުރާ، ސީދާ ކުންފުނީގެ ސީ.އީ.އޯ އަށް ރިޕޯޓުކުރާ މަޤާމެއްގައި ހުންނަ ބޭފުޅަކީ އެއްވެސް ޙާލެއްގައި އެކުންފުނީގެ ފުރަތަމަ ދަރަޖައިގެ މުވައްޒަފުންނާއި މެދުފަންތީގެ މުވައްޒަފުންގެ ތެރޭގައި ހިމެނޭ މީހެއްކަމުގައި ނުބެލެވޭނެއެވެ؛ އަދި މަޤާމުގެ ނަމަށާއި، ވަޒީފާގެ މަސްއޫލިއްޔަތަށާއި، ކުންފުނީގެ އޯގަނައިޒޭޝަނަލް ސްޓްރަކްޗަރަށް ބަލާއިރު، އެފަދަ މީހަކީ ވަޒީފާއާބެހޭ ޤާނޫނުގެ 34 ވަނަ މާއްދާގެ (ހ) ގެ 5 ވަނަ ނަންބަރުގެ ތެރޭގައި ހިމެނޭ ހިންގުމުގެ އިސްމަޤާމެއްގައި ހުރި މީހެކެވެ. (ޕެރ. 03 (ބ))

ވަޒީފާއާބެހޭ ޤާނޫނުގެ 34 ވަނަ މާއްދާގެ (ހ) ގެ 5 ވަނަ ނަންބަރުގެ ތެރޭގައި ހިމެނޭ ފަރާތެއްގެ މައްސަލަ ބަލައިގަނެ ވަޒީފާއާބެހޭ ޓްރައިބިއުނަލުން ކުރިއަށް ގެންގޮސްފައިވަނީ ޤާނޫނީ އުސޫލުތަކާއި ޚިލާފަށެވެ. (ޕެރ. 03 (ބ))