ޢަލީ މުޙައްމަދު ވ. މޯލްޑިވްސް ފައިނޭންސް ލީސިންގ ކޮމްޕެނީ

ލީސް ރެންޓަލްސްގެ ގޮތުގައި ދައްކަންޖެހޭ ފައިސާ އެއްބަސްވުމުގައި ބުނެފައިވާ ގޮތުގެ މަތިން ދައްކަމުން ނުދިއުމަކީ ލީސް އެއްބަސްވުމާ ޚިލާފުވިކަމެއްކަމުގައި ބަލައި އެއްބަސްވުން ބާތިލުކުރެވޭނެ ސަބަބެކެވެ. (ޕެރ. 3 (ށ))

ކަނޑުއުޅަނދު ފަހަރުގެ ސަލާމަތީ ސެޓްފިކެޓް ހެއްދުމަށްޓަކައި ހުށަހަޅަންޖެހޭ "ކަނޑު އުޅަނދުގެ ސަރވޭއަށް އެދޭ ފޯމް" އަށް ބެލުމުން، އުޅަނދުގެ ވެރިފަރާތް ނޫން އެހެން ފަރާތަކުންވެސް އުޅަނދުގެ ސަރވޭއަށް އެދި ހުށަހެޅިދާނެއެވެ. އުޅަނދުގެ ސަލާމަތީ ސެޓްފިކެޓް ހެއްދުމަށް ބޭނުންވާ މަޢުލޫމާތު ހޯދުމަށް ލީސްއަށް ހިފި ފަރާތުން ލީސްދިން ފަރާތުގައި އެދިފައިވާކަން އެނގެން ނެތްނަމަ، ސަލާމަތީ ސެޓްފިކެޓް ނުހެއްދިގެން އުޅަނދުގެ ބޭނުން ނުހިފުނުކަން ޝަރުޢީ އަދި ޤާނޫނީ ހަމަތަކުގެ މަތިން ޘާބިތުވުމަށް ފުދޭ ހެކި ދެއްކިފައިވާކަމަށް ނުބެލެވޭނެއެވެ. (ޕެރ. 3 (ނ))

ލީސް އެއްބަސްވުމުގައި އުޅަނދު އަނބުރާ ޙަވާލުކުރަންޖެހޭނީ އުޅަނދު ގެންދިޔަ ކޮންޑިޝަނުގައި، އެގްރީމެންޓުގައި ބުނެފައިވާ އެޑްރެހަށް ނުވަތަ ލީޒްކުރި ފަރާތުން އަންގާ ތަނަކަށްކަމަށް ބަޔާންވެގެން އޮންނައިރު، އުޅަނދު އަނބުރާ ޙަވާލުކުރަން ބޭނުންވެގެން ލީޒްކުރި ފަރާތަށް އަންގާފައިވާކަން ޘާބިތުކުރެވޭ ފަދަ ލިޔެކިޔުމެއް ނެތްނަމަ، ހެކިބަހުންވެސް އެކަން ޘާބިތުނުވާނަމަ، އުޅަނދު އަނބުރާ ޙަވާލުކުރުމަށް މަސައްކަތްކޮށްފައިވަނީ ލީސް އެގްރީމެންޓުގައި ބުނެފައިވާ ގޮތާ އެއްގޮތަށްކަމުގައި ބެލެވެން ނެތެވެ. (ޕެރ. 3 (ރ))

އެއްބަސްވުމާ ޚިލާފުވެގެން އެއްބަސްވުން ބާތިލުކުރުމުގައި، އެއްބަސްވުމުގައި ބަޔާންކުރާ ކަންތައްތަކުގެ ތެރެއިން ކަމެއް ވަކިން ނުވަތަ އެކުއެކީގައި އިޚްތިޔާރުކުރުމުގެ ބާރު ލީސްދިން ފަރާތަށް ލިބިގެންވާއިރު، އެ ފަރާތުން އިޚްތިޔާރުކޮށްފައިވަނީ ލީޒް އެއްބަސްވުމުގައި ބަޔާންކުރާ މުޅި ޖުމްލަ ޢަދަދުގެ ފައިސާ ހޯދުން ނޫން، އެއްބަސްވުން ބާތިލުކުރެވުނު ދުވަހާ ހަމައަށް ލީޒް ރެންޓުގެ ގޮތުގައި ދައްކަންޖެހޭ ފައިސާ ހޯދުންކަމަށް ވާނަމަ، ދައްކަންޖެހޭ ލީޒް ރެންޓް ހިސާބުކުރެވޭނީ ލީޒް ރެންޓް ދައްކަން ފެށި ތާރީޚުން ފެށިގެން އެއްބަސްވުން ބާތިލުކުރި ތާރީޚާ ހަމައަށެވެ. (ޕެރ. 3 (ބ)، (ޅ))

ސެކިއުރިޓީ ޑިޕޮޒިޓުގެ ގޮތުގައި ދައްކާފައިވާ ފައިސާއަކީ ލީޒް ރެންޓް ނުދެއްކިގެން އެއްބަސްވުން ބާތިލުކުރާ ޙާލަތުގައި ލީޒް ރެންޓަލްގެ ގޮތުގައި އިތުރަށް ދައްކަންޖެހޭ ފައިސާއިން އަޅައި ކެނޑެންޖެހޭނެ ފައިސާއެއްކަމަށް ލީސްދިން ފަރާތުން އިންކާރުނުކުރާނަމަ، ލީޒް ރެންޓުގެ ގޮތުގައި ދައްކަންޖެހޭ ފައިސާގެ މުޅި ޖުމްލަ ޢަދަދުގެ ތެރެއިން ލީޒް ރެންޓުގެ ގޮތުގައި ދެއްކި ފައިސާއާއި ސެކިއުރިޓީ ޑިޕޮޒިޓެއްގެ ގޮތުގައި ދެއްކި ފައިސާ އުނިކުރަންޖެހޭނެއެވެ. (ޕެރ. 3 (ޅ))

ކުރިން ޘާބިތުނުވާކަމަށް ކަނޑައެޅި ފައިސާއެއް ދައްކަންޖެހޭ ފައިސާކަން ޘާބިތުވާކަމަށް ޙުކުމުގައި ނިންމާއިރު، އެކަމަށް ނިންމި ތަފްޞީލީ ސަބަބުތަކާއި ކުރިން ޘާބިތުނުވާ ފައިސާއެއް ފަހުން ޘާބިތުވާކަމަށް ބިނާކުރި މައިގަނޑު ސަބަބުތައް ފާހަގަކޮށްފައި ނެތްނަމަ، އަދި ހުށަހެޅި އިންވޮއިސްތަކުގައިވާ ޚަރަދުތަކަކީ ކޮންކަމަކަށް ހޭދަކުރަންޖެހުނު ފައިސާއެއްކަމާއި އެ އިންވޮއިސްތަކަށް ފައިސާ ދެއްކިކަން އެނގެން ނެތްނަމަ، އިންވޮއިސްތަކުގައިވާ ޢަދަދުގެ ޞައްޙަކަން ކަށަވަރުކުރުމަށްޓަކައި އެ ނުކުތާގެ މައްޗަށް އަލުން ދަށުކޯޓުގައި ބަލަންޖެހޭނެއެވެ. (ޕެރ. 3 (ކ))