އިޒްމިއާ ޒާހިރު

ނަތީޖާ: އިސްތިއުނާފު ބާޠިލް، ދަށުކޯޓުގެ ނިންމުން ޤާއިމް

ދަށު ކޯޓު: ސިވިލް ކޯޓު 02/RNA/2020

ކޯޓުން ނިންމަން ޖެހުނު ސުވާލު

އަބުރާބެހުމާއި ފުރައްސާރަކުރުމާއި ނަފްސާނީ ތުރާކުރުން ހިމެނޭ ދަޢުވާއެއް އަބުރާބެހުމުގެ ދަޢުވާތަކަށް ޚާއްޞަ ފޯމުން ހުށަހަޅަން އަންގާ، ދަޢުވާ ފޯމު ރައްދުކުރި ސިވިލް ކޯޓުގެ ރަޖިސްޓްރާރގެ ނިންމުމާއި އެ ނިންމުމަށް ތާއީދުކުރި ނިންމުމަކީ ޤާނޫނުއަސާސީގެ 43 ވަނަ މާއްދާގެ (ނ) ގެ ދަށުން ކޯޓަށް މައްސަލަ ހުށަހެޅުމުގެ ޙައްޤު ހަނިކުރާ ނިންމުމެއްތޯ.

ކަނޑައެޅި ޤާނޫނީ އުޞޫލުތައް

1. ކޯޓަކުން ބަލާ ވަކި ބާވަތެއްގެ މައްސަލަތައް ހުށަހެޅުމަށް ވަކި ފޯމުތައް ޚާއްޞަކުރުމަކީ ޝަރީޢަތް ހިންގުމުގެ އިދާރީ އިންތިޒާމްތައް ފަސޭހަކުރުމަށް އެ ކޯޓެއްގެ އިޚްތިޔާރުގެ ތެރޭގައި ހަމަޖެހިފައިވާ އުޞޫލުތަކެއް ކަމުން، އެ އުޞޫލުތަކާ އެއްގޮތަށް ޢަމަލުކުރުމަށް އެންގުމަކީ އޭގެ ޒާތުގައި އިންސާފު ހޯދުމަށް ހުރަސް އެޅުމެއް ކަމަށް ނުބެލޭނެއެވެ. (ޕެރ. 15)
2. ހުށަހެޅި ދަޢުވާގެ އެއްވެސް ބައެއް ބެލެން ނެތްކަމަށް ކަނޑައަޅައި ނުވަތަ ދަޢުވާއިން އުނިކުރަން އަންގައި ނޫނީ، ދަޢުވާ ހުށަހަޅަންޖެހޭ ފޯމާމެދު އިރުޝާދުދީ ދަޢުވާ ފޯމު ރައްދުކުރާ ނިންމުމަކީ ޤާނޫނުއަސާސީގެ 43 ވަނަ މާއްދާގެ (ނ) ގެ ދަށުން ކަށަވަރުކޮށްދީފައިވާ ޙައްޤެއް ގެއްލޭގޮތަށް ނިންމާފައިވާ ނިންމުމެއް ކަމަށް ނުބެލޭނެއެވެ. (ޕެރ. 14، 16)
3. ދަށުކޯޓުގެ ފަނޑިޔާރު އިޚްތިޔާރެއް ބޭނުންކުރި ގޮތުގެ މައްޗަށް އިސްތިއުނާފީ ކޯޓަކުން ވަދެވޭނީ، ރަނގަޅު ނޫން އުޞޫލަކަށް ބިނާކޮށް ނުވަތަ ކަމާނުބެހޭ ކަންކަމަށް ރިޢާޔަތްކޮށް ގޮތް ނިންމާފައިވުން، ވާޤިޢާތަކުގެ ޙަޤީޤަތް އޮޅިފައިވުން، މައިގަނޑު ވާޤިޢާއަކަށް ރިޢާޔަތްކޮށްފައި ނެތުން، ނުވަތަ އެ ނިންމުމުގެ ސަބަބުން އެކަށީގެންނުވާ ކަމެއް ނުވަތަ ބޭއިންސާފެއް މެދުވެރިވުން ފަދަ ޙާލަތްތަކުގައެވެ. (ޕެރ. 17)

ބަލާފައިވާ ޤާނޫނުތައް

• ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 43 ވަނަ މާއްދާގެ (ނ)
• ސުޕްރީމް ކޯޓުގެ 2022/SC-A/51 (ޕްރޮސިކިއުޓަރ ޖެނެރަލްގެ އޮފީސް ވ. ...)