އުރީދޫ މޯލްޑިވްސް ޕަބްލިކް ލިމިޓެޑް ކޮމްޕެނީ

ނަތީޖާ: އިސްތިއުނާފު ބާޠިލް، ސިވިލް ކޯޓުގެ ނިންމުން ޤާއިމް

ދަށު ކޯޓު: ސިވިލް ކޯޓު 24/Cv-C(A)/2021

ކޯޓުން ނިންމަން ޖެހުނު ސުވާލު

ޓެކްސް އެޕީލް ޓްރައިބިއުނަލްގެ ނިންމުން ތަންފީޛުކުރުމަށް ސިވިލް ކޯޓުން ކުރި ޙުކުމުގައިވާ ފައިސާ މީރާއިން ކޯޓަށް ދައްކައި ޚަލާޞްކުރުމަށްފަހު، މީރާއިން ހަމަ އެ އަދަދު ޓެކްސް ކްލިއަރެންސްގެ ގޮތުގައި އުރީދޫއިން ހޯދި ކަމަށް ބުނެ، އަލުން ޙުކުމް ތަންފީޛުކުރުމަށް އެދުނު ހުށަހެޅުން ބަލައިނުގަތް ރަޖިސްޓްރާރގެ ނިންމުމަށް ސިވިލް ކޯޓުން ތާއީދުކުރުން ރަނގަޅުތޯ.

ކަނޑައެޅި ޤާނޫނީ އުޞޫލުތައް

1. ޙުކުމް ތަންފީޛުކުރުމުގެ މައްސަލަތަކުގައި ޝަރީޢަތުގެ ކުރިމައްޗަށް ހުށަހެޅޭނީ ތަންފީޛުކުރުމަށް އެދޭ ޙުކުމް ތަންފީޛުކުރުމާ ގުޅޭ ކަންކަން އެކަނި ކަމަށާއި، ތަންފީޛުކުރުމަށް އެދޭ މައްސަލައިގެ މައުޟޫޢު އަލުން ހުޅުވައި ބެލުމެއް ނޯންނާނެއެވެ (ސުޕްރީމް ކޯޓުގެ 2019/SC-A/07 ޤަޟިއްޔާގައި ކަނޑައެޅި އުޞޫލު).
2. ޙުކުމުގައި ދައްކަން އަމުރުކުރި ފައިސާ ކޯޓަށް ދައްކައި ޚަލާޞްކޮށްފައިވާކަން ކޯޓުގެ ސާބިތު ދަރަނި ރިކޯޑުން ލިޔުމުން އެނގެން އޮތްނަމަ، އެ ޙުކުމް ތަންފީޛުކުރުން ނިމުމަކަށް އައިސްފައިވާ ކަމަށް ބެލެވޭނެއެވެ.
3. ތަންފީޛުކުރުމުގެ މައްސަލަ ނިމުމަށްފަހު މެދުވެރިވި ޙާލަތަކަށް ބިނާކޮށް (ޙުކުމް ތަންފީޛުކުރުމަށް ދެއްކި ފައިސާ ފަރާތެއްގެ އަތުން އެހެން ގޮތަކަށް ހޯދިކަމަށް ބުނެ) އަލުން ތަންފީޛުކުރުމަށް އެދުމަކީ މައުޟޫޢީ މައްސަލަ އަލުން ހުޅުވައި ބެލުމަށް އެދުމެއް ކަމުން، އެކަން ޙުކުމް ތަންފީޛުކުރުމުގެ މަރުޙަލާގެ ތެރެއިން ކުރެވޭނެ ކަމެއް ނޫނެވެ.
4. އެފަދަ ފައިސާއަކީ އަނބުރާ ރައްދުކުރަންޖެހޭ ފައިސާއެއް ކަމަށް ފަރާތަކުން ދެކޭނަމަ، އެ ފައިސާ ހޯދުމަށް ވަކިން ދަޢުވާކުރުމުގެ ފުރުޞަތު އެ ފަރާތަށް ލިބިގެންވެއެވެ.

ބަލާފައިވާ ޤާނޫނުތައް

• ސުޕްރީމް ކޯޓުގެ ނަންބަރު 2019/SC-A/07 ޤަޟިއްޔާ (ދައުލަތް (މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރ) ވ. މަޢުރޫފާ އަބޫބަކުރު)