ކޮރަލްގޭޓް މޯލްޑިވްސް ޕްރައިވެޓް ލިމިޓެޑް ވ. އެމްފަރ ކުޑަވިލިނގިލި ޕްރައިވެޓް ލިމިޓެޑް

ނަތީޖާ: އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް (މައްސަލަ އާބިޓްރޭޝަނަށް)

ދަށު ކޯޓު: ސިވިލް ކޯޓު 3689/Cv-C/2019

ކޯޓުން ނިންމަން ޖެހުނު ސުވާލު

ދެފަރާތުން ސޮއިކުރި ލެޓަރ އޮފް އެވޯޑުގައި ކޮންޓްރެކްޓުގެ ބައެއްކަމަށް ބަޔާންކުރާ "ޖެނެރަލް ކޮންޑިޝަންސް އޮފް ކޮންޓްރެކްޓް" (FIDIC) ގައިވާ އާބިޓްރޭޝަން މާއްދާގެ ސަބަބުން ދެފަރާތާ ދެމެދު އާބިޓްރޭޝަން އެއްބަސްވުމެއް ވެފައިވޭތޯ.

ކަނޑައެޅި ޤާނޫނީ އުޞޫލުތައް

1. ދެފަރާތުން ސޮއިކުރި އެވޯޑް ލެޓަރެއްގައި އެއްބަސްވުން ފުރިހަމަވާ ލިޔުންތައް ލިސްޓުކޮށްފައިވާނަމަ، އެ ހުރިހާ ލިޔުމަކީވެސް އެއްބަސްވުމުގެ ބައެކެވެ؛ އެވޯޑް ލެޓަރަށް އެއްބަސްވެ ސޮއިކުރުމަކީ އޭގައި ބުނާ ލިޔުންތަކަށްވެސް އެއްބަސްވުމެވެ. (ޕެރ. 13)
2. އެއްބަސްވުމުގައި ބުނާ ލިޔުމެއް ސޮއިކުރުމަށްފަހު ނުލިބޭނަމަ، އެ ލިޔުން ހޯދުމަށް މަސައްކަތް ކުރަންޖެހޭނީ އެ ފަރާތުންނެވެ؛ ޚުޞޫމާތެއް އުފެދި ޝަރީޢަތަށް ދިޔުމުން އެ ލިޔުމަކީ ކޮބައިކަން ނޭނގޭ ކަމަށް ބުނުމަކީ ޤަބޫލުކުރެވޭ ބުނުމެއް ނޫނެވެ. (ޕެރ. 13-14)
3. އެވޯޑް ލެޓަރގައި ބުނާ ޖެނެރަލް ކޮންޑިޝަންސްއަކީ އަނެއް ފަރާތުން ހުށަހަޅާ ލިޔުން (FIDIC) ކަން ނަފީކުރާ ހެއްކެއް ނުވަތަ އެ ލިޔުން ހޯދުމަށް މަސައްކަތް ކުރިކަމުގެ ހެއްކެއް ހުށަހަޅައިނުދެވޭނަމަ، އެ ލިޔުމަކީ އެއްބަސްވުމުގެ ބައެއް ކަމަށް ބަލައި، އޭގައިވާ އާބިޓްރޭޝަން މާއްދާގެ ސަބަބުން ދެފަރާތާ ދެމެދު (ލިޔުމުން) އާބިޓްރޭޝަން އެއްބަސްވުމެއް ވެފައިވާ ކަމަށް ބަލަން ޖެހޭނެއެވެ. (ޕެރ. 15)

ބަލާފައިވާ ޤާނޫނުތައް

• ޤާނޫނު ނަންބަރު 10/2013 (އާބިޓްރޭޝަން ޤާނޫނު) ގެ 13 ވަނަ މާއްދާ
• ޤާނޫނު ނަންބަރު 10/2013 (އާބިޓްރޭޝަން ޤާނޫނު) ގެ 15 ވަނަ މާއްދާގެ (ހ) (ސިވިލް ކޯޓުން ތަޠުބީޤުކޮށް، ހައިކޯޓުން ޤާއިމުކުރި)