އަލިބޭ މޯލްޑިވްސް ޕްރައިވެޓް ލިމިޓެޑް ވ. އަޙްމަދު މުއާޒު

ނަތީޖާ: ބައެއް ބަދަލުކުރި: އަންފެއަރ ޑިސްމިސަލް އާއި ވަޒީފާއަށް ރުޖޫޢުކުރުން ޤާއިމް، މުސާރައާއި އިނާޔަތް 01 ޖަނަވަރީ 2021 އާ ހަމައަށް ލިމިޓްކުރި

ދަށު ކޯޓު: ވަޒީފާއާބެހޭ ޓްރައިބިއުނަލް 119/VTR/2020

ކޯޓުން ނިންމަން ޖެހުނު ސުވާލު

ވަޒީފާގެ އެއްބަސްވުމުގައި ބަޔާންކުރާ 'އިފެކްޓިވް ޑޭޓް' އާއި މުވައްޒަފު މަސައްކަތަށް ނިކުތް ތާރީޚު ތަފާތުވާއިރު، ވަޒީފާއާބެހޭ ޤާނޫނުގެ 13 (ކ) އާއި 16 ވަނަ މާއްދާގެ ބޭނުމަށް ވަޒީފާގެ މުއްދަތު ގުނަންވާނީ ކޮން ތާރީޚަކުންތޯ އާއި، އެއްބަސްވުމަކީ ވަކި މުއްދަތެއް ކަނޑައެޅިފައިނުވާ އެއްބަސްވުމެއްތޯ؛ އަދި ވަޒީފާއަށް ރުޖޫޢުކުރާއިރު ގެއްލުނު މުސާރައާއި އިނާޔަތްތައް ނަގައިދޭންވީ މިންވަރު.

ކަނޑައެޅި ޤާނޫނީ އުޞޫލުތައް

1. ދެފަރާތުން ސޮއިކުރި ޞައްޙަ އެއްބަސްވުމެއް އޮތް ހާލަތްތަކުގައި، މުއްދަތާ ގުޅޭ ނިންމުންތަކުގައި އެއްބަސްވުމަކީ އެންމެ އިސް އަދި conclusive ހެއްކެވެ. ނަމަވެސް އެއްބަސްވުމާ ތަފާތު ގޮތަކަށް ކަންކަން ކުރުމަށް ދެފަރާތުން އެއްބަސްވެފައިވާނަމަ އެފަދަ ބަދަލުތަކަށް ރިޢާޔަތްކުރެވިދާނެއެވެ. (ޕެރ. 27)
2. ވަޒީފާގެ އެއްބަސްވުމުގައި ވަޒީފާގެ ގުޅުން ފެށޭނެ ތާރީޚެއް ދެފަރާތުން އެއްބަސްވެ ބަޔާންކޮށްފައިވާނަމަ، ފިޒިކަލްކޮށް ވަޒީފާއަށް ނުނިކުތް ނަމަވެސް އެ ތާރީޚުން ފެށިގެން ވަޒީފާގެ ގުޅުން އުފެދި އެ މީހަކީ މުވައްޒަފެއް ކަމުގައި ވާނެއެވެ. ދެފަރާތުގެ ރުހުމުގައި އެއްބަސްވުމަށް ބަދަލެއް ނުގެނައި ވަޒީފާއަށް ނިކުތުން ލަސްވުމުން އެއްބަސްވުމުގެ މުއްދަތު ފެށުން ފަސްނުވާނެއެވެ. (ޕެރ. 40-43)
3. ވަޒީފާއާބެހޭ ޤާނޫނުގެ 16 ވަނަ މާއްދާގެ ބޭނުމަށް ވަޒީފާގެ މުއްދަތު ގުނަންވާނީ ދެފަރާތުން އެއްބަސްވެ ކަނޑައަޅާފައިވާ ތާރީޚުން ފެށިގެންނެވެ. އެ ތާރީޚުގައި ވަޒީފާއަށް ނުނިކުމެ، ދެފަރާތް ރުހިގެން އެގޮތަށް ކުރިއަށް ދިޔުމަކީ 16 (ށ) ގައިވާ "ވަޒީފާދޭ ފަރާތުން އެއްބަސްވެގެން މަސައްކަތަށް ނުނިކުމެ ހުންނަ ހުރުމެއް" ކަމުގައި ބެލެވޭނެއެވެ. (ޕެރ. 44)
4. ވަޒީފާގެ ޖުމްލަ މުއްދަތު 2 އަހަރަށްވުރެ އިތުރުވެއްޖެނަމަ 13 ވަނަ މާއްދާގެ (ކ) ގެ ދަށުން އެއްބަސްވުމަކީ ވަކި މުއްދަތެއް ކަނޑައެޅިފައިނުވާ އެއްބަސްވުމެކެވެ. އެފަދަ މުވައްޒަފަކު މުއްދަތު ހަމަވުމުގެ ސަބަބަށް ބަލައިގެން ވަކިކުރުމަކީ މައުޟޫޢީ ޢަދުލުވެރިކަން ޤާއިމުވާ ރަނގަޅު ޤާނޫނީ އަސާސެއް ނޫނެވެ. (ޕެރ. 21، 46، 48-50)
5. 2018/SC-A/49 ގެ 61 ވަނަ ނުކުތާގެ ގެއްލުން ކުޑަކުރުމުގެ އުޞޫލަށް ބަލާއިރު، ވަޒީފާއަށް ރުޖޫޢުކުރާ ދުވަހާ ހަމައަށް މުސާރައާއި އިނާޔަތްތައް ނަގައިދިނުމަކީ ލާޒިމު ކަމެއް ނޫނެވެ. މުވައްޒަފަށް އެހެން ވަޒީފާއެއް ލިބިފައިވާނަމަ، ނަގައިދެވޭނީ އެ ވަޒީފާ ހަމަޖެހުނު ތާރީޚާ ހަމައަށެވެ. (ޕެރ. 51-52، 59-61)
6. އިސްތިއުނާފުގެ މަރުޙަލާގައި ބަލަންޖެހޭ ހަމައެކަނި ނުކުތާއަކަށް މައްސަލަ ދަށުކޯޓަށް ފޮނުވުމުން ހޭދަވާ ވަގުތާއި އިޖުރާއަތާއި ޚަރަދަށް ބަލައި، ބޭނުންވާ މަޢުލޫމާތު ހައިކޯޓަށް ލިބިފައިވާނަމަ އެ ނުކުތާގައި ހައިކޯޓުން ގޮތެއް ކަނޑައެޅުމަކީ އެންމެ އިންސާފުވެރި ގޮތެވެ. (ޕެރ. 57-60)

ބަލާފައިވާ ޤާނޫނުތައް

• ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 13 ވަނަ މާއްދާގެ (ބ)، (ކ) އަދި (އ)
• ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 16 ވަނަ މާއްދާގެ (ހ) އަދި (ށ)
• ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 29 ވަނަ މާއްދާގެ (ހ) ގެ (1) އަދި (ރ)
• ޤާނޫނު ނަންބަރު 4/2011 (މާނަކުރުމުގެ ހަމަތައް ބަޔާންކުރުމުގެ ޤާނޫނު) ގެ 37 ވަނަ މާއްދާގެ (ހ)
• ގަވާއިދު ނަންބަރު 2015/R-20 (ވަޒީފާއާބެހޭ ޓްރައިބިއުނަލްގެ ގަވާއިދު 2015) ގެ 39 ވަނަ މާއްދާ
• ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ 284 ވަނަ މާއްދާގެ (ހ)، (ށ)، (ނ)
• 2018/SC-A/49 (61 ވަނަ ނުކުތާ)
• 2019/SC-A/36
• 2016/HC-A/555